LUKA 3 - Biblia Ilagho Jiboie Kwa Wandu Wose

Machilo gha Johane M'baputizi

¹ Erekoghe mwaka ghwa ikumi na isanu ghwa kubonya nguma kwake Kaisari Tiberia. Pontio Pilato orekoghe m'baa wa Judea, na Herode m'baa wa Galilaya, na mruna Filipo m'baa wa isanga ja Iturea na Trokoniti, na Lusania m'baa wa Abilene.

² Matuku gha wukohani m'baa ghwa Anasi na Kayafa, ilagho ja Mlungu jeremchieghe Johane mwana wa Zakaria uko kireti;

³ nao ukaghenda isanga jose ja Jordani, ukichilia wandu wihee na kubaputizwa, Mlungu upate kuwileka kaung'a rawo.

⁴ Sa iji koni iandikilo chuonyi cha mlodi Isaya, “Lwaka lwa mndumu lwasikirika kireti, ‘Boisenyi chia ya Bwana, ghoruonyi mivori yake.

⁵ Kula vololo ichachurwa, na kula lughongo na mghondi vichaserwa, chia rikomekie richaghorolwa, na iro rizamie richadendereshwa;

⁶ na kula mundu uchawona kukia kwa Mlungu.’”

⁷ Niko aho ukawizera wandu awo werechieghe uwibaputize, “Inyo kivalwa cha choka! Nani oremnekieghe njama eghikimbia agho makabo ghichagha?

⁸ Idana bonyenyi maza rifwananagha na uko kuhea konyu, hata msakeghora wei, ‘Deko na aba odu Abrahamu:’ angu namzera, Mlungu wadima kumfunyira Abrahamu wana kufuma kwa magho agha!

⁹ Na hata idana isoka jawikwa tayari mirinyi ya midi, kudema mudi ugho ghose ghusevagha matunda mecha, ghukumbo modonyi.”

¹⁰ Nao awo wandu wikamkotia, “Da dibonya wada?”

¹¹ Ukawitumbulia, “Uo uko na makoti awi, ndemmbaghie uo usewadie jingi, na uo uko na vindo ndebonye wokoni.”

¹² Na wawadi wushuru wori, wikacha kwa wubaputizo, nawo wikamkotia, “Mwalimu na isi dibonya wada?”

¹³ Ukawitumbulia, “Msakewusa kuchumba icho kipimo chilaghirilo.”

¹⁴ Masikari nawo wikacha na kumkotia, “Na isi dibonya wada?” Ukawizera, “Msakemsoka mndungi kilambo chingi kwa ndighi, angu kwa chia ya kumzighiria kwa tee, nenyo mkato ni mishahara enyu.”

¹⁵ Hata iji wandu werekoghe wikisuwiria na kughesha ngolonyi kwawo kewada Johane nuo Masiha,

¹⁶ Johane ukawitumbulia wose ukawizera, “Ini nam'baputiza kwa machi, ela umu oko uchagha uko nandighi kunichumba ini, nisefwane hata kufungua kamba ra vadu vake; uo ucham'baputiza kwa Roho Mweli na modo.

¹⁷ Na lungo lwake loko mkonunyi kwake upate kuinja makanda ghose na kungira ngano nganyenyi kwake, ela makanda uchaghikora kwa modo ghuserimikagha anduangi.”

¹⁸ Na kwa malagho mecha mengi Johane ukawichilia ijo Ilagho Jiboie.

¹⁹ Ela Johane ukamkemia Herode m'baa wa isanga kwa wundu ghwa kumlowua Herodia mka mruna, na kwa wundu ghwa mawiwi mazima ghose oreghibonyereghe.

²⁰ Na Herode ukachuria agho mawiwi ghake kwa kumngira Johane kifungonyi.

Wubaputizo ghwa Jesu

²¹ Nao nyuma ya wandu wose kubaputizwa, Jesu wori orebaputiziroghe, nao ukilomba, mlungunyi kukafunukulwa,

²² na Roho Mweli ukamseria aighu kwake uko na fwana ya mumbi sa mbughi, na lwaka lukafuma mlungunyi, “Oho ko Mwana wapo mkundwa, niboilwagha ni oho loli-loli.”

Kivalwa cha Jesu

²³ Jesu ukizoya wudumiki ghwake orekoghe mundu wa miaka sa mirongo idadu, ukiririkanywa kukaia mwana wa Josefu, mwana wa Heli.

²⁴ Heli orekoghe mwana wa Mathati, uhu orekoghe mwana wa Lawi, mwana wa Meliki, mwana wa Janai, mwana wa Josefu;

²⁵ uo orekoghe mwana wa Matathia, mwana wa Amosi, mwana wa Nahumu, mwana wa Esili, mwana wa Nagai;

²⁶ uo orekoghe mwana wa Maati, mwana wa Matathia, mwana wa Semeini, mwana wa Joseki, mwana wa Juda;

²⁷ uo orekoghe mwana wa Johanani, mwana wa Resa, mwana wa Zerubabeli, mwana wa Shealtieli, mwana wa Neri,

²⁸ mwana wa Meliki, mwana wa Adi, mwana wa Kosamu; uo orekoghe mwana wa Elimadamu, mwana wa Eri;

²⁹ uo orekoghe mwana wa Joshua, mwana wa Eliezeri, mwana wa Joarimu, mwana wa Mathati, mwana wa Lawi;

³⁰ uo orekoghe mwana wa Simeoni, mwana wa Juda, mwana wa Josefu, mwana wa Jonamu, mwana wa Eliakimu;

³¹ uo orekoghe mwana wa Melea, mwana wa Mena, mwana wa Matatha, mwana wa Nathani, mwana wa Daudi;

³² uo orekoghe mwana wa Jese, mwana wa Obedi, mwana wa Boazi, mwana wa Salmoni, mwana wa Naashoni;

³³ uo orekoghe mwana wa Aminadabu, mwana wa Adimini, mwana wa Arni, mwana wa Hezroni, mwana wa Perezi, mwana wa Juda;

³⁴ uo orekoghe mwana wa Jakobo, mwana wa Isaaka, mwana wa Abrahamu, mwana wa Tera, mwana wa Nahori;

³⁵ uo orekoghe mwana wa Serugi, mwana wa Reu, mwana wa Pelegi, mwana wa Eberi, mwana wa Shela;

³⁶ uo orekoghe mwana wa Kainani, mwana wa Arifakishadi, mwana wa Shemu, mwana wa Nuhu, mwana wa Lameki;

³⁷ uo orekoghe mwana wa Methusela, mwana wa Enoko, mwana wa Jaredi, mwana wa Mahalaleli, mwana wa Kainani;

³⁸ uo orekoghe mwana wa Enoshi, mwana wa Sethi, mwana wa Adamu; uo orekoghe mwana wa Mlungu.