LUKA 19 - Biblia Ilagho Jiboie Kwa Wandu Wose

Jesu na Zakio

¹ Jesu ukangia Jeriko, nao orekoghe ukiida.

² Aho korekoghe na m'baa umu wa wawadi wushuru uwangwagha Zakio, orekoghe mzuri wa mali.

³ Ukalola kummbona Jesu ni mnduki, ela kwa wundu ghwa wungi ghwa wandu, nderedimieghe kummbona anduangi, angu orekoghe mundu mvui.

⁴ Ukakiria na iseghe, ukaghenda na kujoka aighu ya muku upate kummbona angu uchaidiria chia ija.

⁵ Nao iji Jesu wavika andu aja, ukazighana aighu, ukamzera, “Zakio, sea shwa-shwa; angu suti nikaie nyumbenyi kwako idime.”

⁶ Zakio ukasea shwa wori, ukamkaribisha kwa kuboilwa kubaa.

⁷ Wandu wose wiendawona agho wikamzughunukia wikighamba, “Mundu uhu wangia kukaia mghenyi wa mundu uko mkaung'a.”

⁸ Nao Zakio ukawuka kimusi ukamzera Bwana, “Zighana Bwana, nusu ya mali rapo, nichawineka wakiwa, na ngera namkalie mndungi kwa kindo chingi, nichammbunjira mando ana.”

⁹ Jesu ukamzera, “Idime kukia kwaichea nyumba ihi, kwa kukaia mundu uhu wori, ni wa kivalwa cha Abrahamu.

¹⁰ Angu Mwana wa Mdamu orechieghe kulola na kukira icho cherelagharieghe.”

Mfwano ghwa feza

¹¹ Nao iji wandu werekoghe wikimsikiria, Jesu ukachuria kuwighoria mfwano, angu orekoghe kaavui na Jerusalemu, nawo wereririkanyireghe angu ahoeni Wuzuri ghwa Mlungu ghuchawoneka shwa wori.

¹² Niko ukaghamba, “Mundu umu m'baa wa ishima oredambieghe isanga ja kula ukupatire wuzuri, ima uwuye.

¹³ Ukawiwanga wadumiki wake ikumi na kuwineka kula umu feza yake, ukawizera, ‘Shamenyi naro hata nawuya.’

¹⁴ Ela waisanga wake ndeweremkundeghe, nawo wikamdumia wandu wikighamba, ‘Ndedikunde uhu mundu udibonyere nguma.’

¹⁵ “Nao nyuma ya mundu uo kubonywa mzuri, ukawuya; ukawiwanga waja wadumiki wake orewinekieghe feza wimchee, upate kumanya seji wishamie.

¹⁶ Ukacha wa imbiri ukaghamba, ‘Bwana, nashamie na feza yako ngapata feza rimu ikumi.’

¹⁷ Nao ukamzera, ‘Kwabonyere nicha, mdumiki uboie oho! Kwa kukaia korekoghe mloli kwa rija ndini, kuchabonya nguma aighu ya mizi ikumi!’

¹⁸ Ukacha wa kawi ukaghamba, ‘Bwana nashamie na ngapata feza rimu isanu!’

¹⁹ Nao ukamzera, ‘Na oho kuchabonya nguma aighu ya mizi misanu.’

²⁰ Ukacha mdumiki mzima ukaghamba, ‘Bwana feza yako hei, nereifungieghe na kitambaa ngaivisa; kwa kukaia

²¹ nerekuobueghe angu kuko mundu ubirie, kwadawusa iro riseko rako, na kukuwida ivo kusereviwaeghe anduangi.’

²² Ukamzera, ‘Mdumiki mmbiwi oho, nichakutanya kwa malagho ghako gheni; korenimanyireghe neko mundu ubirie, niwusagha iro riseko rapo, na kukuwida ivo nisereviwaeghe.

²³ Kwaki sena kusereiwikagha feza yapo bengi, kumangu huwu nicha naipata chiaimweri na fwaida yaro?’

²⁴ Nao ukawizera awo werekoghe kimusi aho, ‘Msokenyi iyo feza mumneke uo uko na feza ikumi.’

²⁵ Wikamzera, ‘Bwana, e uo uko na feza ikumi-e!’

²⁶ Ukatumbulia, ‘Namghoria, uo ose uko nacho uchanekwa nyingi, ela uo usewadie, uchasokwa hata icho uko nacho.

²⁷ Ela awa wamaiza wapo wiserekundieghe niwibonyere nguma, wiredenyi aha muwibwaghe imbiri kwapo.’”

Jesu kungia Jerusalemu ukizumilwa

²⁸ Nao iji Jesu waghora agho, ukakiria imbiri kwawo kughenda Jerusalemu.

²⁹ Hata iji walighisa kuvika Bethfage na Bethania, kaavui na Mghondi ghwa Mizeituni, ukawiduma wanughi wake wawi

³⁰ ukawilaghira huwu, “Ghendenyi ghuja muzi ghwa kimonu, mkakangia mummbona mwana wa punda ufungilo, jingi usejokelo ni mndungi. Mfunguonyi mumrede aha.

³¹ Na ngera mndungi wamkotia kwaki mumfunguagha, mzerenyi, Bwana wamkunda.”

³² Nao wikaghenda wikawona wokoni sa iji orewizerieghe.

³³ Hata iji werekoghe wikimfungua mwana wa punda, mundu waro ukawikotia, “Kwaki mumfunguagha?”

³⁴ Wikamtumbulia, “Bwana waamkunda.”

³⁵ Wikamghenja mwana wa punda kwa Jesu; wikaala nguwo rawo aighu yake, na kumjosa Jesu.

³⁶ Nao Jesu ukighenda wajoka aighu ya punda, wandu wikaala nguwo rawo chienyi.

³⁷ Hata iji wavika kaavui na Jerusalemu, ija chia eseria Mghondi ghwa Mizeituni, izungu jose ja wanughi wikazoya kuboilwa na kumkasa Mlungu kwa lwaka lubaa kwa wundu ghwa iro maza mbaa wereriwonieghe;

³⁸ wikighamba, “Nderasimilo Mzuri uo uchagha kwa irina ja Bwana, sere ndeikaie mlungunyi, na wubaa mlungunyi aighu nandighi.”

³⁹ Mafarisayo wamu wiko izungunyi wikamzera Jesu, “Mwalimu, wizere wanughi wako winyame kima.”

⁴⁰ Jesu ukawizera, “Namghoria, wandu awa wikanyama, agha magho ghichakema.”

Jesu kughulilia muzi ghwa Jerusalemu

⁴¹ Nao iji wavika kaavui na ghuja muzi na kughuwona ukaghulilia,

⁴² ukighamba, “Na wei kodemanya idime iji iro maza riredagha sere! Ela idana rakuvisikia!

⁴³ Angu matuku ghichacha, na wamaiza wako wichakurighia, wikumarie na kukutangala chia rako rose.

⁴⁴ Nawo wichakutotesha putu, andwamweri na wana wako wiko andenyi ya wurigha ghwako; ndewichaasighara igho hata jimweri jiseinjiro andu kwaro, kwa kukaia ndekoremanyireghe ngelo Mlungu orechieghe kukukira anduangi.”

Jesu kughenda Hekalunyi

⁴⁵ Nao Jesu ukangia Hekalunyi, ukazoya kuwiwinga cha shighadi awo wereuzagha;

⁴⁶ ukawizera, “Yaandikwa, ‘Nyumba yapo ichakaia nyumba elombia.’ Ela inyo mwaibonya ikaie mbanga ya viting'a.”

⁴⁷ Nao kula ituku Jesu ukakaia ukifundisha Hekalunyi. Wakohani wabaa, walimu wa Sharia, na vilongozi va wandu wikakunda kum'bwagha.

⁴⁸ Ela wikasowa chia ingi ebonya, angu wandu wose werekoghe wikimsikiria kwa loli, wisekunde kuidwa ni ilagho jingi.