LUKA 16 - Biblia Ilagho Jiboie Kwa Wandu Wose

Mnyapara uko na akili

¹ Nao Jesu ukawizera wanughi wake sena, “Korekoghe na mundu umu mzuri, nao orekoghe na mnyapara wake, ela ukakaia ukiredelwa mashitaka aighu yake sa iji orekoghe ukinona mali rake.

² Ukammbanga na kumzera, ‘Ni malaghoki agha nawuyasikira aighu yako? Niredie mtalo ghwa wunyapara ghwako; angu ndekuchaakaia mnyapara sena.’

³ Uja mnyapara ukaririkanya ngolonyi kwake, ‘Nibonya wada e hoku bwana wapo wanifunya kazi ya wunyapara? Ndighi relima siwadie, kulomba-lomba nako niafwa waya.

⁴ Namanya seji nichaabonya, hata iji kazi yapo yasia, nipate waghenyi wenikaribisha nyumbenyi kwawo.’

⁵ “Nao ukawiwanga wasile wose wa bwana wake, na kuwikotia umu umu ukizoya na wa imbiri, ‘Kwalawilwagha kii ni bwana wapo?’

⁶ Ukaghamba, ‘Vipimo ighana va mavuda.’ Ukamzera, ‘Wada iyo karatasi yako kusee kidombo shwa-shwa kuandike mirongo misanu.’

⁷ Ukamkotia mzima, ‘Na oho kwalawilwagha kii?’ Ukamzera, ‘Vipimo ighana va ngano.’ Ukamzera, ‘Wada iyo karatasi yako kuandike mirongo wunyanya.’

⁸ Uja bwana ukamkasa mnyapara useko mloli, angu orejieghe akili; kwa kukaia wandu wa wurumwengu ughu wawadie akili rebonya malagho ghawo weni, kuchumba wandu wa mwengere.

⁹ “Nani namzera, mkubonyere mmbeni waghenyi kwa chia ya mali risene hachi ra ndoenyi, hata iji rasia, wipate kumkaribisha kwa malalo gha kala na kala.

¹⁰ Uo uko mloli kwa ghaja matini na ndighi, oko mloli kwa ghaja mabaa wori, na uo useko mloli kwa kaja katini na ndighi, ndeuko mloli kwa ghaja mabaa wori.

¹¹ Idana ngera mserekoghe waloli kwa mali risene hachi ra ndoenyi, nani uchaamrumiria kwa mali ra loli?

¹² Na ngera mseko wa loli kwa mali ra wandu wazima, nani uchaamneka iro riko renyu?

¹³ Ndekuwadie mdumiki ungi udimagha kuwidumikia weke bwana wawi, angu uchazamilwa ni uhu, na kumkunda uja, angu uchakufunya kwa uhu, na kummenya uja. Ndemdimagha kumdumikia Mlungu na mali anduangi.”

Malagho ghamu gha Jesu

¹⁴ Nao iji Mafarisayo wereghisikireghe agho, nawo ni wandu wikundagha mali, wikamseka kwa lumenyo.

¹⁵ Ela Jesu ukawizera, “Inyo moko wandu mkunekagha mmbeni hachi imbiri ya wandu, ela Mlungu warimanya ngolo renyu; angu icho chikaswagha imbiri ya wandu, chakaia chizamie imbiri ya Mlungu.

¹⁶ “Sharia na maandiko gha walodi verekoghe hata ngelo ya Johane M'baputizi; kufuma aho, malagho mecha gha Wuzuri ghwa Mlungu ghaawuyachilwa, na kula umu wadaghungia kwa kufunga ndighi.

¹⁷ Ela kwaangue mlungunyi na ndoenyi kuida, kuchumba kalagho katini ka Sharia kuida duu.

¹⁸ “Uo ose utanagha na mkake na kumlowua mzima walaka, na uo umlowuagha muka usighilo ni mumi walaka wokoni.

Mzuri na Lazaro

¹⁹ “Korekoghe na mndumu mzuri urwae nguwo ra zambarau na kitani iboie, ukija manori na maseko matuku ghose.

²⁰ Na mkiwa umu uchue vonda uwangwagha Lazaro orekoghe ukiwikwa mnyangonyi ghwa nyumba yake;

²¹ nao orekoghe ukikunda kuja misusure erepotokagha kufuma mezenyi kwa uja mzuri; na koshi rikacha na kumleta-leta vonda vake.

²² “Nao uja mkiwa ukafwa, ukadalwa ni weke malaika, ukasea kidombo kaavui na Abrahamu.

²³ Wokoni uja mzuri ukafwa, ukarikwa, nao uko matirironyi kwa wafu, ukammbona Lazaro kula koni uko kaavui na Abrahamu.

²⁴ Ukawanga ukighamba, ‘Ee Aba Abrahamu, niwonie wughoma, kumdume Lazaro ungire mudo ghwa chala chake machinyi uche unihoreshe lumi lwapo, angu niatirirwa kwa luwawo lubaa lwa ulu lumu lwa modo.’

²⁵ “Ela Abrahamu ukamtumbulia, ‘Mwanwapo, kumbuka seji korekoghe kukikaia ndoenyi; korepatireghe maza rako ndicha, na Lazaro wokoni orepatireghe rizamie, nao idana uo aha wahoreshwa na oho kuatirirwa.

²⁶ Na aighu ya agha ghose, jeko ivongo ibaa jiwikilo aghadi ya isi na inyo, eri wandu wangi wedu wisedime kuruwuka cha konyu, na wenyu kuruwuka cha kodu.’

²⁷ Uja mzuri ukaghamba, ‘Kamanya ni huwo, nakulomba ee aba, kumdume nyumbenyi kwa aba,

²⁸ angu neko na wanidu wa womi wasanu, ughende uwionye wisechecha andu aha kwa matiriro.’

²⁹ “Ela Abrahamu ukaghamba, ‘Wanyinyu weko na Musa na walodi, ndewiwisikire awo.’

³⁰ Nao ukaghamba, ‘Ai hata aba Abrahamu, ela ngera umu wadawighendia kufuma kwa wafu wichahea.’

³¹ Abrahamu ukamzera, ‘Ngera wisewisikiragha Musa na walodi, hata ukaruka mundu kufuma kwa wafu, ndewichaaghaluka anduangi.’”