LUKA 13 - Biblia Ilagho Jiboie Kwa Wandu Wose

Sighenyi kaung'a renyu msechefwa

¹ Ngelo ija cheni, korekoghe na wandu wamu weremghorieghe Jesu malagho gha Wagalilaya werebwaghiloghe ni Pilato; iji werekoghe wikibwagha nyamandu ra vizongona vawo.

² Nao ukawitumbulia, “Muaghesha awo Wagalilaya wedeeka wakaung'a wichumbie Wagalilaya wose angu wipatiro ni agho matiriro?

³ Namzera si huwo kungi; ela hata inyo ngera mseheagha, mchatota wokoni mmbose.

⁴ Angu, awo ikumi na wunyanya wereghuloghe ni mnara aja Siloamu ghukawibwagha, muaghesha wedeeka wawiwi kuchumba wandu wazima wose werekaieghe Jerusalemu?

⁵ Namzera si huwo kungi; ela hata na inyo ngera mseheagha, mchatota wokoni mmbose.”

Mfwano ghwa mtini ghusevagha

⁶ Nao Jesu ukawighoria mfwano ughu; “Mndumu orewaeghe mtini ghwake mbuwenyi ya mizabibu, ukacha ukilola matunda ghangi aighu yaro ukaghisowa.

⁷ Ukamzera uja mlimi, ‘Zighana miaka ihi idadu naawuyacha ngilola matunda aighu ya ughu mtini, ngadaghisowa. Idana kughudeme, kwaki ghunonagha ndoe duu?’

⁸ Ela uja mlimi ukamtumbulia, ‘Bwana, ghusighe nighuchimbie mbai-mbai, na ughu mwaka wori nighudungie mbolea.

⁹ Ghukava matunda mwaka ghuchagha ni nicha, ela ghukalemwa ni kuva, niko aho kughudeme.’”

Jesu kuboisa muka umu ukelemere ituku ja Sabato

¹⁰ Ituku jimu ja Sabato, Jesu orekoghe ukifundisha andenyi ya sunagogi imu.

¹¹ Na aho korekoghe na muka umu uko na pepo ya wunyonge miaka ikumi na wunyanya, ikamkomesha hata nderedimieghe kughoroka anduangi.

¹² Nao iji Jesu wammbona, ukammbanga, ukamzera, “Muka, kwafungulwa wunyonge ghwako.”

¹³ Ukammbikiria mikonu yake, na shwa wori ukaghoroka na kumkasa Mlungu.

¹⁴ Ela uja m'baa wa sunagogi ukajokwa ni machu angu Jesu oreboisireghe ituku ja Sabato ukawizera wandu, “Gheko matuku arandadu ghebonya kazi; choonyi m'boiso agho matuku, ela ituku ja Sabato mbai.”

¹⁵ Nao Bwana ukamzera, “Inyo waji-kuwi, huwo ungi onyu aha ndefunguagha ng'ombe angu punda wake ughende machinyi ituku ja Sabato?

¹⁶ Na muka uhu nao ni wa kivalwa cha Abrahamu, Shetani umfungie miaka ikumi na wunyanya, ndeifwaneghe ufungulo ituku ja Sabato anguwada?”

¹⁷ Uendaghora huwo, wamaiza wake wose wikafushwa waya, na wandu wose wikaboilwa kwa wundu ghwa iro maza ndicha rose Jesu oreribonyereghe.

Mfwano ghwa mbeu ya haradali

¹⁸ Kwa huwu Jesu ukaghamba, “Wuzuri ghwa Mlungu ghwafanane naki? Nagho nighukatanisha naki?

¹⁹ Ghwafwanana na mbeu ya haradali, mundu oreiwaeghe mbuwenyi kwake, nayo ikabuka na kuzoghua mudi m'baa, hata nyonyi rikaagha vijungu vawo mbashunyi kwaro.”

Mfwano ghwa chachu

²⁰ Nao Jesu ukaghamba sena, “Nighukatanisha naki Wuzuri ghwa Mlungu?

²¹ Ghwafwanana na chachu, muka oreidungieghe andenyi ya vipimo vidadu va mufu, nagho ghukawurushwa ghose.”

Mnyango msuse

²² Nao Jesu ukaghenda chia yake, ukaida aghadi ya mizi mibaa na mitini, ukifundisha na kuchuria kughenda cha Jerusalemu.

²³ Mndumu ukamzera, Bwana, ni watini awa wikiagha anguwada?

²⁴ Ukawizera, “Fungenyi ndighi kungia kwa mnyango msuse, angu namghoria, wengi wichakunda kungia, ela ndewichaadima anduangi.

²⁵ Iji mundu wa nyumba wawuka na kughurugha mnyango, inyo mchakaia kimusi shighadi na kukongoda mnyango mkighamba, ‘Bwana dirughuye.’ Nao uchamtumbulia, ‘Simmanyire andu mfumagha anduangi.’

²⁶ Niko mchazoya kughora, ‘Derejieghe dikanywa chiaimweri na oho, sena kukafundisha mizinyi mzedu.’

²⁷ Ela uo uchamtumbulia, ‘Namzera simwichi andu mfumagha anduangi, fumenyi kwapo inyo wabonyi wuwiwi!’

²⁸ Aho mchalila na kuja maghegho ghenyu, iji mchaammbona Abrahamu, Isaaka, na Jakobo, na walodi wose andenyi ya wuzuri ghwa Mlungu, na inyo mmbeni mwadeghwa shighadi.

²⁹ Sena wandu wichacha kufuma mashariki na magharibi, kaskazinyi, nawo wichasea kidombo mezenyi kwa wuzuri ghwa Mlungu.

³⁰ Nao ola wamu weko wa kutua wichaakaia wa imbiri na wamu weko wa imbiri wichaakaia wa kutua.”

Lukundo lwa Jesu kwa Jerusalemu

³¹ Ngelo iyo cheni, Mafarisayo wamu weremchieghe Jesu wikamzera, “Fuma aha kughende, angu Herode ookunda kukubwagha.”

³² Nao ukawizera, “Ghendenyi mughuzere ghuja mzozo, ‘Ola idime na kesho niawinga pepo na kuboisa wakongo, na ituku ja kadadu, niameria kazi yapo.

³³ Elaima sena, yanifwana kughenda chia yapo idime, na kesho, na lawuke; angu ndeimfwane mlodi ubwagho shighadi ya Jerusalemu anduangi.’”

³⁴ “Ee Jerusalemu, Jerusalemu, kubwaghagha walodi na kuwilasa na magho awa widumwagha kwako, ni kalinga neretimieghe kuwikwanya wana wako sa iji nguku ikwanyagha vana vake aisi ya mawawa ghake kukalegha!

³⁵ Ola kwasighilwa nyumba yako. Nani namghoria loli, ndemchaaniwona, hata ituku jija mchaaghamba, ‘Warasimilwa uo uchagha kwa irina ja Bwana.’”