KUZOYA 8 - Biblia Ilagho Jiboie Kwa Wandu Wose

Kutua kwa gharika

¹ Ela Mlungu ukamkumbuka Nuhu, nyamandu na mfugho rose rerekwanyeghe nao safinenyi. Mlungu ukareda kuweta kwa mbeo aighu ya ndoe, machi ghikazoya kupungua.

² Ndoria ra machi gha ndoenyi na madirisha gha mlungunyi ghikarughika na vua kufuma mlungunyi ikaela.

³ Machi ghikakaia ghikipungua ndoenyi mboa-mboa. Na kutua kwa matuku ighana na mirongo misanu, agho machi ghikapungua putu.

⁴ Hata ituku ja ikumi na mfungade ja mori ghwa mfungade, ija safina ikakaria aighu ya mighondi ya Ararati.

⁵ Machi ghikachuria kupungua hata mori ghwa ikumi, ituku ja imbiri ja mori ugho, mido ya mighondi ikazoya kuwoneka.

⁶ Nyuma ya matuku mirongo ina, Nuhu ukarughua jija idirisha ja safina orejibonyereghe,

⁷ ukaifunya ngorusa cha shighadi, nayo ikakaia ikimara-mara ii chia na ii chia hata agho machi ghikaoma.

⁸ Niko ukafunya mbughi uwone ngera machi ghapungua ndoenyi,

⁹ ela mbughi ikasowa andu kungi kokaria, nayo ikammburia aho safinenyi, angu machi gherekoghe ndoenyi kose; Nuhu ukaghughorua mkonu ghwake ukaiwada mbughi na kuingiria safinenyi.

¹⁰ Nao ukaweseria matuku mfungade ukaifunya mbughi ukaiduma sena kufuma safinenyi;

¹¹ na mbughi ikammburia luma lwa kenyi, nao ola yadwae ilemba iwishi ja mzeituni momunyi kwake. Niko Nuhu ukamanya angu machi ghapungua ndoenyi.

¹² Nao ukawesera matuku mfungade, ukaiduma ija mbughi sena, nayo ndeeremmburieghe anduangi.

¹³ Nao ituku ja imbiri ja mori ghwa imbiri, mwaka ghwa maghana arandadu na imweri, machi ghikaoma ndoenyi kose; Nuhu ukachiinja kilemeko cha safina, ukazighana ukawona angu ndoe yaoma.

¹⁴ Ituku ja mirongo iwi na mfungade, mori ghwa kawi, ndoe erekoghe yaoma putu.

¹⁵ Nao Mlungu ukamzera Nuhu,

¹⁶ “Fuma safinenyi oho na muka wako, na wana wako, na waka wa wana wako.

¹⁷ Sena kufunye icho chose chiko moyo kukwanye nacho: nyonyi, nyamandu, na icho chose chiavuagha andoenyi, eri rive kwa wungi na kuchurikia ndoenyi.”

¹⁸ Niko Nuhu ukafuma na wana wake, na muka wake, na waka wa wana wake,

¹⁹ na kula nyamandu, na iro riavuagha andoenyi, na nyonyi rose, na icho chose chighendagha ndoenyi kwa mbari raro, vose verefumieghe safinenyi.

Nuhu kufunya kizongona

²⁰ Nao Nuhu ukamwaghia BWANA madhabahu; ukawada imu ya nyamandu rielie na imu ya nyonyi rielie, ukarifunya kizongona chekora aighu ya madhabahu.

²¹ Hata iji BWANA wasikira irumba jiboie ja icho kizongona, ukaghamba ngolonyi kwake, “Sichaaiwasira ndoe njowe sena kwa wundu ghwa mdamu, kwa kukaia maririkanyo gha ngolo ya mdamu kari kose ni mawiwi kufuma wanake ghwake, hata sichaachitotesha icho chose chiko moyo sena sa iji nabonya.

²² Wurumwengu ghukikaia aeni, kimu cha kuwa na cha kukuwida, mbeo na mruke, ngelo ya kwari na ya sumesu, kio na dime wori ndevichaaida anduangi.”