KUZOYA 6 - Biblia Ilagho Jiboie Kwa Wandu Wose

Wuwiwi ghwa mdamu

¹ Nao ikakaia iji wadamu werezoeghe kuchurikia ndoenyi, na wana wa waka kuvalwa,

² wana wa Mlungu wikawiwona awo wai wa wadamu kukaia wighokie, nawo wikakusaghuya wai welowua sa iji koni werekundieghe.

³ BWANA ukaghamba, “Roho yapo ndeichaaduanya na mdamu kwa kala, angu uo si odua, kwa huwo miaka yake ichakaia ighana na mirongo iwi.”

⁴ Kufuma ngelo ija na konyuma, Wanefilimu werekoghe wikilowua wai wa wadamu, na kuva wana. Awo niwo wandu werekoghe mang'oni wikumikie matuku ghaja.

⁵ Nao BWANA ukaghuwona wuwiwi ghwa mdamu sa iji ghwakaia m'baa ndoenyi, na kula ighesho ja ngolonyi kwake ni wuwiwi mduu matuku ghose.

⁶ BWANA ukawawa na kusirimika ngolonyi angu oremuumbieghe mdamu na kummbika ndoenyi.

⁷ Kwa huwu ukaghamba, “Nichamuinja na mbai uhu mdamu neremuumbieghe, usoweke ndoenyi andwamweri na nyamandu, na iro riavuagha andoenyi, na nyonyi ra mbeonyi; angu nasirimika na ndighi kwa kukaia nerevibonyereghe.”

⁸ Ela Nuhu orerumirikieghe imbiri ya BWANA.

Nuhu na Safina

⁹ Ichi nicho kivalwa cha Nuhu. Nuhu orekoghe mundu wa hachi, usezughunukilwagha ni mndungi wa iro ngelo; nao orewadaneghe na Mlungu.

¹⁰ Nao orekoghe na wana wa womi wadadu, Shemu, Hamu, na Jafethi.

¹¹ Wurumwengu ghorekoghe ghwanoneka na kuchulwa ni wuwiwi mesonyi kwa Mlungu.

¹² Mlungu ukazighana nao ukawona seji wurumwengu ghunonekie, angu wandu wose werekoghe wikibonya mawiwi ndoenyi.

¹³ Nao Mlungu ukamzera Nuhu, “Nachawona niwimeria wadamu wose, kwa kukaia wurumwengu ghose ghwachulwa ni wuwiwi ghwawo, nani nichawitoteshanya na ugho wurumwengu.

¹⁴ Kwa huwo kukubonyere kumoni safina kwa mbau ra mwingo, kudumbuo vumba andenyi, nao kuikande lami cha nandenyi, na cha shighadi wori.

¹⁵ Nayo kuchaibonya huwu: Wulacha ghwaro ghuchakaia meta ighana na mirongo idadu, na wushapa ghwaro meta mirongo iwi na iwi, na wuighu ghwaro meta ikumi na idadu.

¹⁶ Kuibonyere safina ipaa, kujitanye na wurigha kipimo cha sentimeta mirongo ina na inya, sena kubonye mnyango ghwa safina luwarunyi kwake, nayo ikaie na ghorofa idadu; ya ndonyi, ya ghadi na ghadi, na ya ighu.

¹⁷ Nao ola nichareda gharika ndoenyi kose, nipate kunona kula mumbi ghuko na miruke ya irangi aisi ya mlungunyi; na icho chose chiko ndoenyi chichafwa.

¹⁸ Ela nichajimangisha ilaghano japo na oho, na oho kuchangia safinenyi andwamweri na wana wako, na muka wako, na waka wa wana wako.

¹⁹ Wokoni kuviwadie viwi viwi va icho chose chiko na mumbi chiko moyo kuvingire safinenyi; kula kichuku cha womi na cha waka wori, vikaie moyo andwamweri na oho.

²⁰ Vichuku vose va nyonyi, nyamandu rose, na shimandu rose riavuagha andoenyi, kucharingira iwi iwi eri rikaie moyo.

²¹ Sena kuwike vindo andenyi va mbari rose vifwanagha kujighwa kwa wundu ghwako na kwa wundu ghwa nyamandu wori.”

²² Nuhu ukabonya ghose orelaghiriloghe ni Mlungu.