KUZOYA 50 - Biblia Ilagho Jiboie Kwa Wandu Wose1 Nao Josefu ukamghuya ndee wushunyi, ukamsusugha ukilila na ndighi. 2 Ukawilaghira waghanga wighuboise mumbi ghwa ndee kwa maghanga ghusakewoa. Na waghanga wikaghuboisa mumbi ghwa Israeli; 3 nagho ghoredwaeghe matuku mirongo ina ghukiboiswa, angu nigho gherekundikieghe kwa kuibonya iyo kazi. Wamisri wikamlilia Israeli matuku mirongo mfungade. 4 Hata iji agho matuku gha kulila gherekateghe, Josefu ukaghora na wandu wa nyumba ya mzuri ukighamba, “Ngera narumirikia mesonyi konyu, namlomba mumghorie mzuri huwu: 5 Aba orenighemeshereghe ukighamba, ‘Ini neko kaavui na kufwa; kunirike kaburinyi kwapo iyo nereikotereghe isanga ja Kanaani.’ Kwa huwu nakulomba kunisighe nighende nimrike aba, ima niwuye.” 6 Mzuri ukamtumbulia ukighamba, “Ghenda kumrike ndeyo sa iji koni orekughemeshereghe.” 7 Niko Josefu ukaghenda kumrika ndee, na wadumiki wa mzuri wose wikafuma wikaghendanya na Josefu, na wabaa wose wa nyumba ya mzuri, na wabaa wose wa isanga ja Misri. 8 Wokoni na nyumba yose ya Josefu, waruna wose na kinyumba chose cha ndee, wikaghendanya nao. Wandu weresigharikieghe Gosheni ni wana watini, andwamweri na ng'ondi, mburi, na ng'ombe. 9 Wikadwa magare na farasi wori. Werekoghe wandu wengi na ndighi. 10 Hata iji werevikieghe lwala loelia viro lwa Atadi, luko kimonu cha Jordani, wikalila kililo kibaa cha wasi, na Josefu ukabonya ifwa aho kwa wundu ghwa ndee matuku mfungade. 11 Iji wandu wa ijo isanga ja Kanaani werewonieghe icho kililo, na ijo ifwa jerebonyeroghe aho Atadi lwala loelia viro wikaghamba, “Ichi kililo cha Wamisri ni kibaa na ndighi!” Kwa huwu andu aho kukawangwa Abel-misraimu, kuko kimonu cha Jordani. 12 Niko huwu wana wa Israeli wikabonya sa iji koni werelaghiriloghe ni ndee; 13 angu wana wake weremdwaeghe hata isanga ja Kanaani, wikamrika andenyi ya mbanga, mbuwenyi Makpela, iko mashariki ya Mamre, iyo Abrahamu oreighueghe chiaimweri na mbuwa yaro kufuma kwa Efroni Mhiti, ipate kukaia andu korikia wandu. 14 Nao nyuma ya kumrika ndee, Josefu chiaimweri na waruna na wose wereghendanyeghe marikonyi gha ndee wikawuya cha Misri. Malaghiro gha Josefu kwa waruna 15 Nyuma ya kifwa cha ndee, waruna Josefu wikaghamba, “Wele ikaia wada ikakaia Josefu uduagha na luwawo ngolonyi, kwa wundu ghwa iro maza rizamie derem'bonyereghe?” 16 Kwa huwo wikaduma momu kwa Josefu wikighamba, “Ndeyo oredinekieghe momu imbiri usefue ukadizera, 17 ‘Mumzere Josefu angu namlomba umfuye wughoma kwa wundu ghwa ugho wuwiwi ghose morem'bonyereghe.’ Na idana dakulomba kudifuye wughoma ugho wuwiwi dikubonyere isi wadumiki wa Mlungu wa ndeyo.” Josefu uendasikira huwo ukalila. 18 Na awo waruna wikacha na kughoghoma hata andonyi imbiri kwake wikighamba, “Ola isi deko wadumiki wako.” 19 Ela Josefu ukawizera, “Msakeobua, angu ini siko wulalo ghwa Mlungu. 20 Inyo loli morekoghe na njama enibonya kiwiwi, ela Mlungu oreibonyereghe njama iyo irede mecha gha kukira marangi gha wengi sa iji yawuyakaia idime. 21 Kwa huwu msakeobua; nichamneka kula kilambo, inyo na wana wenyu wori.” Huwo ukawikumba ngolo na kuwihoresha. Kifwa cha Josefu 22 Josefu ukakaia Misri na kinyumba chose cha ndee, ukakaia moyo miaka ighana na ikumi. 23 Josefu ukawiwona wana wa Efraimu hata kivalwa cha kadadu; na wana wa Makiri mwana wa Manase werevaloghe mangonyi kwa Josefu. 24 Nao Josefu ukawizera waruna, “Ini neko kaavui na kufwa, ela Mlungu uchamchea na kumfunya isanga iji, umghenje jija isanga oremghenjereghe Abrahamu, Isaaka na Jakobo.” 25 Josefu ukawighemesha wana wa Israeli ukighamba, “Iji Mlungu wamchea na kumfunya isanga iji, mchaghidwa maindi ghapo wori ghifume isanga iji.” 26 Nao Josefu ukafwa uko na miaka ighana na ikumi, nawo wikaghuboisa mumbi ghwake kwa maghanga, na kughungira andenyi ya isanduku ahoeni Misri. |