KUZOYA 47 - Biblia Ilagho Jiboie Kwa Wandu Wose

¹ Niko Josefu ukafuma ukaghenda na kumghoria mzuri ukighamba, “Aba na wanidu, mfugho rawo na vilambo vose vameria kucha kufuma isanga ja Kanaani; nawo idana weko Gosheni.”

² Josefu orekoghe wasaghua waruna wasanu na kuwidwa kwa mzuri.

³ Mzuri ukawikotia awo waruna, “Kazi yenyu ni kaziki?” Nawo wikatumbulia, “Isi wadumiki wako de walisha karakara na weke aba.”

⁴ Sena wikachuria kughora, “Daacha dikaie sa waghenyi andenyi ya isanga iji kwa kukaia njala yakaia mbaa isanga ja Kanaani, hata ndediwadie andu kolishira mfugho redu. Kwa huwo dakulomba kudirumirie dikaie isanga ja Gosheni.”

⁵ Nao mzuri ukamzera Josefu, “Idana kwa kukaia ndeyo na wanyinyu wakuchea,

⁶ isanga ja Misri jeko imbiri kwako, wineke ndeyo na wanyinyu andu kuboie kuchumba isangenyi; ndewikaie Gosheni. Na ngera kwawuyamanya wandu wangi aghadi kwawo wiichi iyo kazi, wiwike wikaie wazighaniri wa ng'ombe rapo.”

⁷ Niko Josefu ukamreda ndee Jakobo imbiri ya mzuri. Jakobo ukamrasimia mzuri.

⁸ Mzuri ukamkotia Jakobo, “Miaka yako ni ilinga?”

⁹ Nao Jakobo ukamtumbulia mzuri, “Miaka ya kumara-mara kwapo ni ighana na mirongo idadu, miaka mitini na ya wasi, nayo yadua isekatane na miaka ya kumara-mara kwa weke wawa.”

¹⁰ Jakobo ukamrasimia mzuri, ukafuma ukaghenda.

¹¹ Nao Josefu ukawiwika ndee na waruna isangenyi, ukawineka ndoe isanga ja Misri andu kuboie kuchumba kwa isanga kuwangwaghwa Ramesesi, sa iji koni mzuri oremlaghirieghe.

¹² Josefu ukawineka ndee na waruna, na nyumba ya ndee yose vindo kunughana na mtalo ghwa wandu wawo.

Iyo njala

¹³ Njala ikakaia mbaa na ndighi hata ndekorekoghe na vindo andu kungi. Wandu wa Misri na wandu wa Kanaani wikasirimika kwa wundu ghwa iyo njala.

¹⁴ Josefu ukakwanya pesa rose ra Misri na ra isanga ja Kanaani kwa kuwiuzira wandu viro, ukarireda pesa rose nyumbenyi kwa mzuri.

¹⁵ Nao iji pesa rose ra isanga ja Misri na ra isanga ja Kanaani reresirieghe, wandu wa Misri wikamchea Josefu wikighamba, “Pesa redu rasia! Dineke vindo; diafwa kukiwona?”

¹⁶ Nao Josefu ukawizera, “Ikakaia pesa renyu rasia, funyenyi mfugho nimneke vindo.”

¹⁷ Nao wikafunya mfugho, na Josefu ukawiuzira vindo kwa kuindana na farasi, ng'ondi, mburi, ng'ombe na weke punda. Mwaka ghuja ghukaida kwa kuindanisha vindo na mfugho.

¹⁸ Nyuma ya mwaka ugho, wikacha sena kwa Josefu wikighamba, “Ndedikuvisagha bwana; pesa redu rose rasia, na mfugho naro ramerie kuwuya rako; chasigharika aha ni mimbi yedu na isanga jedu jeni!

¹⁹ Kwaki ditotagha andwamweri na isanga jedu kukiwona? Dighuo andwamweri na isanga jedu kwa vindo, nesi dichakaia wazumba wa mzuri andwamweri na isanga jedu. Dineke vindo dipate kukaia moyo disechefwa, na mbeu rewa mbuwenyi kodu isanga jedu jisekenoneka.”

²⁰ Kwa huwu Josefu ukaghua isanga jose ja Misri jikaie ja mzuri, angu kula mundu oreuzireghe mbuwa yake kwa wundu ghwa iyo njala kukaia mbaa nandighi; na isanga jose jikawuya ja mzuri.

²¹ Josefu ukawibonya wandu wikaie wazumba kufuma kutua uku kwa isanga hata kutua kuja kwa ijo isanga ja Misri.

²² Isanga ja wakohani jiekeri nijo userejighueghe angu wakohani werekoghe wikipata vindo vawo kufuma kwa mzuri. Kwa huwo ndewereuzireghe isanga jawo anduangi.

²³ Nao Josefu ukawizera wandu, “Olenyi idime iji namghua inyo mmbose andwamweri na isanga jenyu mukaie wa mzuri. Idana mbeu hei namneka muwe viro isangenyi.

²⁴ Ngelo ya makuwido mchafunya ifungu jimweri ja kasanu kwa mzuri, na mafungu ana ghichakaia ghenyu kwa wundu ghwa mbeu na vindo venyu inyo na wana wenyu.”

²⁵ Nawo wikaghamba, “Oho kwameria kukira marangi ghedu; kwakaie mucha kodu bwana, nesi dichawuya wazumba wa mzuri.”

²⁶ Nao Josefu ukaibonya ikaie sharia ya isanga ja Misri, nayo yatumilwa hata linu ighambagha: Mzuri uwuseghe ifungu jimweri ja kasanu ja makuwido gha mbuwa. Isanga ja wakohani jiekeri nijo jiserewurieghe ja mzuri.

Ilombi ja kutua ja Jakobo

²⁷ Niko huwu Waisraeli wikakaia andenyi ya isanga ja Misri aja Gosheni, wikashama aho, wikava na kuchurikia kwa wungi.

²⁸ Jakobo ukakaia isanga ja Misri miaka ikumi na mfungade; kwa huwo miaka ya irangi jake erekoghe ighana na mirongo ina na mfungade.

²⁹ Nao iji ngelo ya kufwa kwake Israeli yalighisa, ukammbanga mwana wake Josefu ukamzera, “Ngera narumirikia mesonyi kwako, ngira mkonu ghwako barenyi kwapo, nao kunighemie angu kuchanibonyera malagho gha loli na gha hachi.

³⁰ Kusakenirika aha Misri, ela kunighenje mzedu kunirike andu weke aba wirikilo.” Nao ukaghamba, “Nichabonya sa iji koni kwaghamba.”

³¹ Nao ukamzera, “Nibonyere ighemi.” Nao ukam'bonyera ighemi. Israeli ukaghoghoma wulinyi kwake chongonyi kwa chawucha.