KUZOYA 44 - Biblia Ilagho Jiboie Kwa Wandu Wose

Kusoweka kwa kikombe

¹ Nao Josefu ukamlaghira mdumiki wake wa nyumbenyi ukighamba, “Chura magunia gha awa wandu viro sa iji wichaadima kuduka, sena kuwunje pesa ra kula mundu momunyi ghwa igunia jake.

² Nao kukumbirie chija kikombe chapo cha feza momunyi ghwa igunia ja uja mtini wawo, chiaimweri na pesa ra viro vake.”

³ Nao ukabonya sa iji koni orelaghiriloghe ni Josefu. Hata iji ndoe yaela, awo wandu wikasighwa wighende na punda wawo.

⁴ Hata iji wameria kughenda mwendo mvui tu kufuma mzinyi, Josefu ukamzera mdumiki wake, “Nugha waja wandu shwa-shwa; kukameria kuwiwada kuwizere, ‘Kwaki mwalipa kiwiwi kwa nicha? Kwaki mwaniiwia kikombe chapo cha feza?

⁵ Ichi nicho cheni bwana wapo unywagha nacho, na sena nicho cheni ulaghuagha nacho; mwabonya ikosa ibaa na ndighi.’”

⁶ Nao iji wawiwada, ukaghora nawo ghaja madedo gheni orezereloghe.

⁷ Nawo wikamzera, “Kwaki bwana kudedagha malagho ghifwane huwu? Agho ndeghikaie kula na wadumiki wako, angu ndedidimagha kubonya ilagho sa ijo anduangi.

⁸ Oho wona pesa dererikueghe memunyi kwa magunia ghedu, dereriwunjireghe kufuma isanga ja Kanaani, idimika wada isi kuiwa feza angu dhahabu kufuma nyumbenyi kwa bwana wako?

⁹ Uo ose kuchaamkua na kikombe icho ndebwagho, na isi wori dichawuya wazumba wako.”

¹⁰ Nao ukaghamba, “Ndeikaie woruwo; ela uo ose nichaachikua kwake, nuo moni uchaakaia mzumba wapo, na wazima wose wichakaia wisene ikosa.”

¹¹ Kula mundu ukasera igunia jake andonyi shwa-shwa na kujifungua.

¹² Mdumiki wa Josefu ukalola kufuma igunia ja m'baa, na kumeria na igunia ja mtini; na kikombe chikawoneka igunienyi kwa Benjamini.

¹³ Wikarashua nguwo rawo wose kwa wasi, na kula mundu ukadukishira punda wake igunia jake wikawuya cha mzinyi.

¹⁴ Iji Juda andwamweri na waruna werevikieghe nyumbenyi, Josefu orekoghe aeni; wikamghoghomia hata andonyi.

¹⁵ Nao Josefu ukawizera, “Mwabonya wada huwu? Ndemwichi angu mundu wa daraja sa yapo wadima kulaghua na kummanya seji mwabonya?”

¹⁶ Juda ukaghamba, “Isi dighora wada kwako bwana? Dadima kudeda wada, angu dichakuelesha wada? Mlungu waghuwona wuwiwi ghwa wazumba wako, ola idana isi dawuya wazumba wako bwana, isi diwose chiaimweri na uhu kikombe chawonekia kwake wori.”

¹⁷ Ela Josefu ukawizera, “Agho ndeghikaie kula na ini niseghibonye putu. Uo mundu kikombe chawoneka kwake, nuo moni uchaawuya mzumba wapo, ela inyo wazima mmbose mwadima kuwuya kwa ndeyo kwa sere.”

Juda kumdederia Benjamini

¹⁸ Nao Juda ukamsughudia Josefu ukamzera, “Ee bwana wapo, nakulomba kunirumirie nighore ilagho kwako bwana wapo; hata kusakenibonyera machu ini mdumiki wako, angu oho ni karakara na mzuri moni.

¹⁹ BWANA wapo, koredikotereghe isi wadumiki wako kukighamba, ‘Moko na ndeyo angu mwanyinyu?’

²⁰ Nesi dikakutumbulia bwana wapo, ‘Deko na aba nao ni mghosi, na mwanidu mtini mwana wa wughosi ghwake, na mruna wafue oosigharika uekeri kwa mae, kwa huwu ndee wamkunde na ndighi.’

²¹ Sena kukadizera isi wadumiki wako, dimrede uo mwanidu kwako kupate kummbona.

²² Nesi dikakughoria oho bwana wapo kukaia mwana ndedimagha kumsigha ndee, angu ukamsigha, ndee wadima kufwa.

²³ Na oho kukadizera isi wadumiki wako, ‘Mwanyinyu mtini usechee aha, ndemchaaniwona wushu ghwapo anduangi.’

²⁴ Hata iji derewurieghe kwa mdumiki wako, aba, deremghorieghe malagho ghako bwana wapo.

²⁵ Aba uendadizera diwueghua viro vimu sena,

²⁶ deremzerieghe, ‘Ndedidimagha kughenda, kwa kukaia disaaghendanya na uo mtini odu ndedichaadima kughuwona wushu ghwa uo mundu anduangi.’

²⁷ Niko mdumiki wako aba ukaghamba, ‘Mwamanya angu muka wapo orenivaieghe wana wa womi wawieri,

²⁸ umweri wanisighie nani ngaghamba loli warashulwa vipande vipande, hata sicheemmbona sena anduangi.

²⁹ Idana mkammbusa uhu nao kufuma kwapo, nao upato ni ndengwa ingi, ini nakaia mghosi, wasi mchaaniredia ghuchanibwagha.’

³⁰ “Kwa huwu ngawuya kwa mdumiki wako aba disekwanye na uhu mwana ngolo yake iwadane nao na ndighi huwu,

³¹ nao loli uwone ndedichanye nao, uchafwa. Nesi wadumiki wako, wasi dichaamredia mdumiki wako aba, ghucham'bwagha angu waghosia na ndighi.

³² Ini mdumiki wako nerekubonyereghe madhamini kwa aba, kwa wundu ghwa mwana uhu, ngaghamba, iji nalemwa ni kummbunja kwake, nikaie na lawama mesonyi kwa aba irangi japo jose.

³³ Idana nakulomba ini mdumiki wako nikaie wulalo ghwake, niwuye mzumba wa bwana wapo, na mwana ughalanye na waruna.

³⁴ Nichadima wada kuwuya kwa aba niseko na uhu mwana? Naobua iro maza mbiwi richaampata aba.”