KUZOYA 42 - Biblia Ilagho Jiboie Kwa Wandu Wose

Josefu kuchelwa ni waruna

¹ Jakobo uendamanya angu viro veko Misri, ukawizera wana wake, “Kwaki mzighananagha mmbeni na mmbeni?”

² Nao ukaghamba, “Olenyi nasikire wei viro veko Misri, ghendenyi mghuo vimu disechebwaghwa ni njala.”

³ Niko aho waruna ikumi wa Josefu wikaghenda Misri kughua viro.

⁴ Ela Jakobo nderemrumirieghe Benjamini, Josefu mruna tiki, ughendanye nawo anduangi, angu oreobueghe usechepatwa ni ilagho jingi.

⁵ Niko huwu wana wa Israeli wikaghenda kughua viro chiaimweri na wandu wazima, angu njala erekoghe isanga ja Kanaani wori.

⁶ Josefu nuo orekoghe m'baa wa isanga ja Misri, nao nuo orekoghe ukiwiuzira wandu wose viro. Nao waruna Josefu wikacha na kughoghoma imbiri ya Josefu, hata mawushu ghawo ghikadunga andonyi.

⁷ Josefu ukawiwona waruna ukawimanya, ela ukakubonya seji ndewimanyire, na kudedanya nawo kwa kubia; ukawikotia, “Mwafuma hao inyo?” Nawo wikamtumbulia, “Daafuma isanga ja Kanaani kuchaghua vindo.”

⁸ Huwo Josefu ukawimanya waruna, ela awo ndeweremmanyireghe anduangi.

⁹ Nao Josefu ukarikumbuka rija ndodo orelodieghe aighu yawo ukawizera, “Inyo mo washeki, mwaacha kughuzighana wunyonge ghwa isanga.”

¹⁰ Ela awo wikaghamba, “Siko kungi bwana, ela isi wadumiki wako, daacha kughua vindo.

¹¹ Isi diwose deko wana wa mundu umweri, nesi deko wa hachi, ndediko washeki anduangi.”

¹² Josefu ukawizera, “Siko kungi, ela inyo mwaacha kughuzighana wunyonge ghwa isanga.”

¹³ Nawo wikaghamba, “Isi wadumiki wako deko ikumi na wawi, wana wa mundu umweri ukaiagha isanga ja Kanaani, na mwanidu mtini damsighanya na aba, na umu ndeuko, wafue.”

¹⁴ Josefu ukawiziziria ukighamba, “Ni seji koni naghamba, inyo mo washeki.

¹⁵ Ela mchatimwa kwa ilagho iji: Ini naghema kwa irina ja mzuri, angu ndemchaafuma, msemredie uja mwanyinyu mtini aha.

¹⁶ Mdumenyi umu onyu umrede uo mtini onyu, na inyo wazima wose mchasigharika kifungonyi, malagho ghenyu ghipate kuzighanwa na kumanyika ngera moko wandu wa hachi, angu ngera si huwo, kwa irina ja mzuri, inyo mo washeki.”

¹⁷ Nao ukawingira wose kifungonyi kwa matuku adadu.

¹⁸ Nao ituku ja kadadu Josefu ukawizera, “Ini namuobuagha Mlungu, bonyenyi huwu mpate kukaia moyo:

¹⁹ Sighenyi umu onyu ukaie kifungonyi ikakaia loli muko wa hachi, na wazima wose wipate viro wighende kwa wundu ghwa njala iko nyumbenyi mzenyu.

²⁰ Nao mumrede uja mwanyinyu mtini kwapo, niko aho malagho ghenyu ghichaawoneka ngera ni gha loli, nenyo ndemchafwa anduangi.” Nawo wikabonya wokoni.

²¹ Nao wikazerana weni na weni, “Kwa loli dakosere kwa agha dim'bonyere mwanidu; derewonieghe ngolo yake yakaia na wasi, ukidivoya na ndighi, ela dikalegha kusikira. Kwa huwu niko dawuyapatwa ni ughu wasi.”

²² Reubeni ukawitumbulia, “Seremzerieghe msakem'bonya mwana kiwiwi chingi, ela mkalegha kusikira? Wonenyi idana bagha yake yawuyalawia.”

²³ Awo ndeweremanyireghe wei Josefu wawuyawielelwa; angu korekoghe na mkalimani aghadi kwawo.

²⁴ Josefu ukaghaluka na mbai ukalila. Nao ukawuya na kudedanya nawo; ukammbwada Simeoni na kumfunga imbiri ya meso ghawo.

Waruna Josefu kuwuya Kanaani

²⁵ Nao Josefu ukafunya momu magunia ghawo ghichuro viro, sena wiwunjiro pesa ra kula mundu igunienyi kwake na kuwineka vindo va charonyi wori. Nao wikabonyerwa agho ghose.

²⁶ Niko wikajosa mizigo yawo kwa weke punda, wikazoya charo chawo.

²⁷ Hata iji wavika andu kohoreshera, umu wawo ukafungua igunia jake umneke punda wake vindo, nao ukawona pesa rake momunyi ghwa igunia;

²⁸ ukawizera waruna, “Pesa rapo rawunjwa, heri aha momunyi ghwa igunia japo!” Wiendasikira huwo, wikafwa ngolo, wikaghalukiana wikisughusika, na kukotiana weni na weni, “Ni ilaghoki iji Mlungu wadibonyera?”

²⁹ Nao iji wavika kwa ndee Jakobo isanga ja Kanaani, wikamghoria maza rose rerewipatireghe wikighamba,

³⁰ “Uja m'baa wa isanga orededanyeghe nesi kwa kubia, ukadiwona wei deeka washeki wa ijo isanga;

³¹ ela isi dikamzera, ‘Deko wandu wa hachi ndediko washeki anduangi.

³² Sena dikamzera angu deko wana ikumi na wawi wa aba umweri, umu ndeuko wafue, ela uja mtini wekwanye na aba aja isangenyi Kanaani.’

³³ Niko uo m'baa wa isanga ukadizera, ‘Nichamanya angu moko wandu wa hachi, iji mwarumiria kumsigha mwanyinyu umu aha, mduke viro mghende, kwa wundu ghwa njala iko nyumbenyi mzenyu.

³⁴ Sena mumrede kwapo uja mwanyinyu mtini; aho niko nichaamanya angu ndemko washeki ela moko wandu wa hachi, sena nichamfunguya mwanyinyu na kumrumiria m'bonye biashara isangenyi.’”

³⁵ Nao iji wawada kuungua viro, wikashinika kuwona kula mundu wawunjirwa pesa rake igunienyi kwake, nawo chiaimweri na ndee iji wawona agho, wikaobua.

³⁶ Ndee ukawizera, “Mwaniredia wasi kwa wundu ghwa wana wapo; Josefu ndeuko, Simeoni wokoni ndeuko, na idana mwakunda na Benjamini wori; ni malaghoki agha ghawuyanipata?”

³⁷ Nao Reubeni ukaghamba, “Bwagha wana wapo wawi iji nakaia nisemmbunjire Benjamini kwako. Msighe mikonunyi kwapo, na ini nichammbunja kwako.”

³⁸ Ela Jakobo ukaghamba, “Mwanwapo ndedimagha kughendanya na inyo; mruna wamerie kufwa, oosighwa uekeri. Wadima kupatwa ni ndengwa ingi charonyi. Ini nakaia mghosi, wasi mchaniredia ghuchanibwagha.”