KUZOYA 40 - Biblia Ilagho Jiboie Kwa Wandu Wose

Josefu kutambua ndodo ra wafungwa

¹ Nyuma ya maza iro, m'baa wa wadumiki wenyosha divei na m'baa wa waochi mikate, wikamkosera bwana wawo mzuri wa Misri.

² Mzuri ukazamilwa ni awo wabaa wa kazi wake wawi, m'baa wa wadumiki wenyosha divei, na m'baa wa waochi mikate.

³ Nao ukawingira kifungonyi nyumbenyi kwa m'baa wa walindiri andu Josefu orekoghe.

⁴ Wikakaia kifungonyi kwa ngelo ndacha, na m'baa wa walindiri ukammbika Josefu uwidumikieghe.

⁵ Nao kio chimu aho kifungonyi, uja mdumiki onyosha divei na uja muochi mikate wikaloda ndodo kula mundu yake, na kutambua kwaro wuzima wuzima.

⁶ Hata iji Josefu orechieghe kwawo nakesho ukawiwona wiko na wasi.

⁷ Ukawikotia awo wabaa wa wadumiki wa mzuri, awo werekwanyeghe kifungonyi nyumbenyi kwa bwana wake, “Kwaki mwakaia na wasi huwu?”

⁸ Nawo wikamzera, “Deeloda ndodo, naro ndekuwadie mndungi odima kuritambua anduangi.” Josefu ukawizera, “Kutambua kose ndakwadafuma kwa Mlungu. Namlomba munighorie ndodo renyu.”

⁹ Nao uja m'baa wa wadumiki wenyosha divei ukamzera, “Nerewonieghe ndodonyi kwapo mzabibu;

¹⁰ nagho ghorekoghe na mbashu idadu, nao riendafunya malemba, shwa wori rikafunya mboi na vanga varo vikawuya zabibu riwurue.

¹¹ Nani nerekoghe niwadie kikombe cha mzuri, ngawaya iro zabibu na kurikama andenyi ya icho kikombe cha mzuri, ngamneka mkonunyi kwake.”

¹² Nao Josefu ukaghamba, “Kutambua kwaro niko uku: Iro mbashu idadu ni matuku adadu.

¹³ Nyuma ya matuku adadu mzuri uchakufungua na kukuwunja kazinyi kwako; na oho kuchamneka mzuri kikombe mkonunyi kwake, sa iji koni korekoghe imbiri iji korekoghe mnyoshi divei wake.

¹⁴ Ela nakulomba kunikumbuke iji maza rako rakaia nicha, kunighore kwa mzuri, eri unifunye ihi nyumba.

¹⁵ Angu kwa loli ini nedeiwa kufuma isanga ja Waebrania, na hata aha sibonyere ikosa jingi jenibonya ningiro kifungonyi anduangi.”

¹⁶ Nao iji m'baa wa waochi mikate orewonieghe seji kutambushira korekoghe kuboie, ukamghoria Josefu ndodo yake ukighamba, “Hata ini wori nerelodieghe huwu: Naduka vikapu vidadu va mikate chongonyi kwapo,

¹⁷ na chija kikapu cha ighu cherekoghe na vindo va kula mbari viochelo nicha va mzuri, ela nyonyi rerekoghe rikivija a kikapunyi chongonyi kwapo.”

¹⁸ Josefu ukatumbulia, “Uku niko kutambua kwaro: Ivo vikapu vidadu ni matuku adadu.

¹⁹ Nyuma ya matuku adadu mzuri uchakufungua, nao uchachidumbua chongo chako na kukuwanika mudinyi, na nyonyi richaja nyama ya mumbi ghwako.”

²⁰ Nao ituku ja kadadu mzuri orebonyereghe karamu ya kuvalwa kwake, ukawikaribisha wadumiki wake wose. Nao ukawifungua wadumiki wake, m'baa wa wanyoshi divei, na m'baa wa waochi mikate.

²¹ Ukammbunja m'baa wa wanyoshi divei kazinyi kwake, nao ukamneka mzuri kikombe mkonunyi kwake;

²² ela ukammbanika mudinyi uja m'baa wa waochi mikate sa iji koni Josefu orewitambushireghe.

²³ Ela uja m'baa wa wanyoshi divei nderemkumbukieghe Josefu anduangi; oochamliwa.