KUZOYA 36 - Biblia Ilagho Jiboie Kwa Wandu Wose

Kivalwa cha Esau

¹ Ichi nicho kivalwa cha Esau (nuo Edomu).

² Esau orelowueghe waka wa Kikanaani, nawo ni Ada, mwai wa Eloni Mhiti, na Oholibama, mwai wa Ana mwana wa Sibeoni Mhivi,

³ na Basemathi, mwai wa Ishmaeli, mruna Nebaiothi.

⁴ Ada ukamva Elifazi; Basemathi ukamva Reueli,

⁵ na Oholibama ukawiva Jeushi, Jalamu, na Kora. Wana awa wose wa Esau werevaloghe isanga ja Kanaani.

⁶ Niko Esau ukawidwa waka wake, wana wake wa womi na wa waka, wandu wose wa nyumbenyi kwake, ng'ombe rake na nyamandu rake rose, na mali rose oreshamieghe ijo isanga ja Kanaani, ukafuma na kughenda noko kula na mruna Jakobo.

⁷ Angu mali rawo rerekoghe nyingi na ndighi andenyi ya ijo isanga werekoghe wikijikaia, hata ndejerewikateghe kukaia chiaimweri, angu werekoghe na ng'ombe nyingi na ndighi.

⁸ Kwa huwu Esau, (nuo Edomu), ukakaia mighondinyi isanga ja Seiri.

⁹ Ichi nicho kivalwa cha Esau ndee Waedomu wikaiagha isanga ja mghondinyi Seiri.

¹⁰ Mka Esau Ada, oremvaieghe Esau mwana umweri wa womi uwangwaghwa Elifazi, na Elifazi orekoghe na wana wa momi wasanu:

¹¹ Temani, Omari, Sefo, Gatamu na Kenazi.

¹² Na kwa muka wake mzima Timna, ukapata mwana umu wa womi, Amaleki.

¹³ Mka Esau Basemathi, oremvaieghe Esau mwana umweri wa womi uwangwagha Reueli, na Reueli orekoghe na wana wa womi bana: Nahathi, Zera, Shama, na Miza.

¹⁴ Mka Esau Oholibama, mwai wa Ana wawae Sibeoni, oremvaieghe Esau wana wa womi wadadu: Jeushi, Jalamu na Kora.

¹⁵ Iri niro mbari rifumie kwa Esau. Mwana wa Esau wa imbiri Elifazi orekoghe m'baa wa mbari iri rinughagha: Temani, Omari, Sefo, Kenazi,

¹⁶ Kora, Gatamu, na Amaleki. Awa wose werekoghe kivalwa cha Ada mka Esau.

¹⁷ Mwana wa Esau Reueli orekoghe m'baa wa mbari iri rinughagha: Nahathi, Zera, Shamu, na Miza. Awa wose werekoghe kivalwa cha Basemathi mka Esau.

¹⁸ Mbari iri rinughaani kivalwa cha Esau kwa muka Oholibama mwai wa Ana: Jeushi, Jalamu, na Kora.

¹⁹ Iri mbari rose redefuma kwa Esau.

Kivalwa cha Seiri

²⁰ Wandu wa imbiri werezoeghe kukaia Edomu, werewaghikieghe na kuwuya mbari riwonyeragha kukaia ni kichuku cha Seiri Mhori, seji inughagha: Lotani, Shobali, Sibeoni, Ana,

²¹ Dishoni, Eseri, na Dishani.

²² Lotani orekoghe m'baa wa kichuku cha Hori na Hemani, (Lotani orekoghe na mruna wa waka uwangwagha Timna.)

²³ Shobali orekoghe m'baa wa kichuku cha Alvani Manahathi, Ebali Shefo na Onamu.

²⁴ Sibeoni orekoghe na wana wawi wa womi, Aya na Ana. (Uhu nuo orewonieghe ndoria ra machi gha modo kireti, ukilisha weke punda wa ndee.)

²⁵ Ana orekoghe ndee Dishoni,

²⁶ nao orekoghe m'baa wa vichuku va Hemda, Eshbani, Ithrani, na Kerani. Wokoni Ana orekoghe na mwai uwangwagha Oholibama.

²⁷ Eseri orekoghe m'baa wa vichuku va Bilhani, Saawani, na Akawi.

²⁸ Dishani orekoghe m'baa wa vichuku va Uzi na Arani.

²⁹ Iri niro mbari ra Wahori wiko isanga ja Edomu: Lotani, Shobali, Sibeoni, Ana,

³⁰ Dishoni, Eseri, na Dishani.

Wazuri wa Edomu

³¹ Awa niwo wazuri werebonyereghe nguma isanga ja Edomu, imbiri mzuri ungi usebonyere nguma aighu ya Israeli.

³² Bela mwana wa Beeri, oreibonyereghe nguma Edomu, na muzi ghwake ghorewangwaghwa Dinhaba.

³³ Bela ukafwa, na Jobabu mwana wa Zera kufuma muzi ghwa Bosra, ukabonya nguma wulalo ghwake.

³⁴ Jobabu ukafwa, na Hushamu wa isanga ja Watemani, ukabonya nguma wulalo ghwake.

³⁵ Hushamu ukafwa, na Hedadi mwana wa Bedadi uhu orewisimieghe Wamidiani isanga ja Moabu, ukabonya nguma wulalo ghwake, na irina ja muzi ghwake ni Awithi.

³⁶ Hadadi ukafwa, na Samla kufuma Masreka, ukabonya nguma wulalo ghwake.

³⁷ Samla ukafwa, na Shauli kufuma muzi ghwa Rehobothi ghuko kaavui na Moda ghwa Eufrate, ukabonya nguma wulalo ghwake.

³⁸ Shauli ukafwa, na Baal-hanani mwana wa Akbori, ukabonya nguma wulalo ghwake.

³⁹ Baal-hanani mwana wa Akbori ukafwa, na Hadari ukabonya nguma wulalo ghwake. Irina ja muzi ghwake jerewangiloghe Pau, na muka wake orewangwaghwa Mehetabeli mwai wa Matredi, wawae Mezahabu.

⁴⁰ Awa niwo wabaa wifumie kwa Esau, kunughana na marina gha vichuku vawo na mizi yawo, nawo ni: Timna, Alva, Jethethi,

⁴¹ Oholibama, Ela, Pinoni,

⁴² Kenazi, Temani, Mibsari,

⁴³ Magdieli, na Iramu. Awa niwo weni wabaa wa Edomu, nuo Esau ndee Waedomu, kunughana na andu werekoghe, andenyi ya masanga ghawo.