KUZOYA 35 - Biblia Ilagho Jiboie Kwa Wandu Wose

Mlungu kumrasimia Jakobo aja Betheli

¹ Nao Mlungu ukamzera Jakobo, “Wuka kughende Betheli, kukaia aho. Kuniaghie madhabahu aho nerekufutukieghe iji korekoghe kukimkimbia mwanyinyu Esau.”

² Niko Jakobo ukawizera wandu wose wa nyumbenyi kwake na wose orekwanyeghe nawo, “Ifunyenyi noko milungu ya kighenyi iko aghadi konyu, mukueleshe inyo mmbeni na kughalusa marwao ghenyu;

³ nesi diwuke na kughenda cha Betheli, nipate kumuaghia Mlungu madhabahu aho; uo oreniteserieghe ngelo ya wasi ghwapo, sena ukakaia andwamweri nani andu kose nereghendieghe.”

⁴ Nao wikamneka Jakobo iyo milungu yose ya kighenyi werekoghe nayo, na vipini verekoghe madunyi kwawo. Jakobo ukavirika vose kirimbenyi cha mudi ghwa mvure ghorekoghe kaavui na Shekemu.

⁵ Hata iji wazoya charo, kiture kibaa chifumie kwa Mlungu chikawingia wandu wa mizi erekoghe mbai-mbai, nawo ndeweredimieghe kuwinugha wana wa Jakobo anduangi.

⁶ Nao Jakobo andwamweri na wandu wake wose orekwanyeghe nawo, wikavika Luzu, nigho Betheli, muzi ghuko andenyi ya isanga ja Kanaani.

⁷ Niko aho ukaagha madhabahu, ukakuwanga andu aho El-betheli, kwa kukaia Mlungu orekufunukueghe moni kwake iji orekoghe ukimkimbia mruna.

⁸ Nao Debora, mleli wake Rebeka ukafwa, nao ukarikwa aisi ya mvure kusinyi ya Betheli; niko andu aho kukawangwa, “Alon-bakuthi.”

⁹ Iji Jakobo orewurieghe kufuma Padan-aramu Mlungu oremfutukieghe sena, ukamrasimia. Mlungu ukamzera,

¹⁰ “Irina jako oho ni Jakobo; ndekuchaawangwa Jakobo sena, ela kuchawangwa Israeli.”

¹¹ Nao Mlungu ukamzera, “Ini ne Mlungu-Uwadie-Ndighi-Rose; kuve kuchurikie. Mbari na vichuku va mbari vichavalwa kwako, na wazuri wichafuma kwako oho.

¹² Isanga neremnekieghe Abrahamu na Isaaka, nichakuneka oho na kivalwa chako wori.”

¹³ Nao Mlungu ukajoka kufuma andu aho werekoghe wikidedanya.

¹⁴ Nao Jakobo ukadunga nguro ya igho andu aho orededanyeghe na Mlungu, ukajiwika wakfu kwa kujidunga kizongona cha kunywa, na mavuda.

¹⁵ Nao ukakuwanga andu aho Betheli.

Kifwa cha Raheli

¹⁶ Niko wikadamba kufuma Betheli; hata iji werekoghe kakula na Efrata, Raheli ukazoya kulumwa na kukumba lufu.

¹⁷ Hata iji orekoghe ukikumba lufu, uja mvarishi ukamzera, “Kusakeobua angu idana kwapata mwana umu wa womi.”

¹⁸ Nao iji roho yake erekoghe ikifuma (angu orefueghe) ukammbanga uo mwana Benoni, ela ndee ukammbanga Benjamini.

¹⁹ Kwa huwo Raheli ukafwa, ukarikwa mbai na mbai ya chia eghenda Efrata (nigho Bethlehemu.)

²⁰ Jakobo ukadunga igho ja wukumbuso aho, najo jawonyera kaburi ya Raheli hata linu.

²¹ Israeli ukachuria kudamba, ukadunga hema yake mnara ghwa Ederi na kimonu.

Wana wa Jakobo

²² Nao iji Israeli orekoghe ukikaia jija isanga, Reubeni ukaghenda na kulala na Bilha, muka mzumba wa ndee, na Israeli ukajisikira ilagho ijo.

²³ Idana wana wa Jakobo werekoghe ikumi na wawi. Wana wa Lea ni: Reubeni, mwana wa imbiri wa Jakobo, Simeoni, Lawi, Juda, Isakari na Zebluni.

²⁴ Wana wa Raheli ni: Josefu na Benjamini.

²⁵ Wana wa Bilha, mwai wa kazi wa Raheli ni: Dani na Naftali.

²⁶ Wana wa Zilpa, mwai wa kazi wa Lea ni: Gadi na Asheri. Awa werekoghe wana wa Jakobo werevailoghe Padan-aramu.

Kifwa cha Isaaka

²⁷ Nao Jakobo ukacha kwa ndee Isaaka aja Mamre, (nigho Kiriath-araba, angu Hebroni) andu Abrahamu na Isaaka werekaieghe.

²⁸ Matuku gha Isaaka gherekoghe miaka ighana na mirongo wunyanya.

²⁹ Isaaka ukafwa mghosi uchue matuku, ukarangana andwamweri na wakwawo wiidie, na wana wake, Esau na Jakobo, wikamrika.