KUZOYA 33 - Biblia Ilagho Jiboie Kwa Wandu Wose

Jakobo kukwana na Esau

¹ Nao Jakobo ukazighana, ukammbona Esau ukicha andwamweri na wandu wake maghana ana. Aho ukawiwaghia Lea, Raheli, na waja wai wawi wa kazi, waja wana.

² Waja wai wa kazi na wana wawo ukawiwika kiimbiri, na Lea na wana wake wikanugha, na Raheli na Josefu wikatua nyuma.

³ Ela uo moni ukakiria imbiri kwawo, ukikughoghomesha hata andoenyi mando mfungade, hata ukavika kaavui na mruna.

⁴ Ela Esau ukakimbia na iseghe kummara, ukammbwada na kumshishidia ukimsusugha; nawo wikalila na ndighi.

⁵ Hata iji Esau wawusira meso ghake na kuzighana, ukawiwona waja waka na wana ukaghamba, “Ni weke ani awa mkwanye?” Jakobo ukaghamba, “Ni wana awa Mlungu uninekie ini mdumiki wako kwa wucha ghwake.”

⁶ Nao awo wai wa kazi wikacha na wana wawo wikaghoghoma;

⁷ na wokoni Lea ukacha na wana wake, wikaghoghoma; na kutua Josefu na Raheli wikacha wikaghoghoma.

⁸ Esau ukakotia, “Na iji izungu jose nakwana najo kutambua kwaro ni wada?” Jakobo ukatumbulia, “Nirumirikie mesonyi kwa bwana wapo.”

⁹ Ela Esau ukamzera, “Ivo niko navo vanikata mwanidu. Oho wadia ivo kuko navo.”

¹⁰ Nao Jakobo ukaghamba, “Hata mwanidu, iji loli narumirikia mesonyi kwako, nakulomba kuwade manosi kufuma mkonunyi kwapo, angu kwa loli mwanidu kughuwona wushu ghwako, ni sa kughuwona wushu ghwa Mlungu; seji kwaniwada kwa kunirumiria nandighi.

¹¹ Ghiwuse nakuvoya agha manosi ghapo nakuredia, angu Mlungu moni waninekie kwa wungi, nani neko na va kukata.” Nao ukamshingira hata ukaghiwada agho manosi.

¹² Niko Esau ukaghamba, “Nndoko dighende, na ini nichakiria.”

¹³ Ela Jakobo ukaghamba, “BWANA wapo wamanya angu wana ni watini, na mfugho rimu naro riaongosha. Ni suti nirilindie, kwa kukaia rikadwalwa na iseghe kwa ituku jimweri, mfugho rose radima kufwa.

¹⁴ Kwa huwu bwana wapo ndekirie, na mdumiki wako ucheghee mboa-mboa kunughana na mwendo ghwa mfugho riko imbiri kwapo na wanake, hata nivike mzinyi kwa bwana wapo aho Seiri.”

¹⁵ Nao Esau ukaghamba, “Leka nikusighanye na wandu wamu nikwanye nawo.” Ela ukaghamba, “Agho ni ghaki? Bora tu nirumirilo ni bwana wapo.”

¹⁶ Nao Esau ukawuya cha Seiri jija ituku jeni.

¹⁷ Ela Jakobo ukaghenda Sukothi ukaagha nyumba aho, ukaagha na viwanda kwa wundu ghwa ng'ombe. Kwa huwu andu aja kukawangwa Sukothi.

¹⁸ Jakobo ukavika banana kufuma Padan-aramu, ukakaia muzi ghwa Shekemu, isanga ja Kanaani; nao ukabonya kambi yake aho kaavui na muzi.

¹⁹ Ukaghua mbuwa kwa vibelele va feza ighana jimweri kufuma kwa Hamori ndee Shekemu; nao ukadunga hema yake aho.

²⁰ Ukaagha madhabahu ukaghiwanga irina jake El-Elohe-Israeli.