KUZOYA 28 - Biblia Ilagho Jiboie Kwa Wandu Wose

¹ Niko Isaaka ukammbanga Jakobo, ukamrasimia na kumlaghira ukighamba, “Kusakelowua mwai ungi wa Kikanaani.

² Wuka kughende Padan-aramu, nyumbenyi kwa wawayo Bethueli, kupate muka kufuma kwa umu wa wai wa awuyo Labani.

³ Mlungu Uwadie-Ndighi-Rose ndekurasimie, kuve kuchurikie na kukaia mbari nyingi.

⁴ Mlungu ndekurasimie oho na kivalwa chako seji oremrasimieghe Abrahamu, kupate kujiwusa isanga kwawuyajikaia kiwughenyi sa iji koni oremnekieghe Abrahamu.”

⁵ Huwo Isaaka ukamduma Jakobo, nao ukaghenda Padan-aramu kwa Labani mwana wa Bethueli Muarami, mruna Rebeka, mae Jakobo na Esau.

Esau kulowua muka umu

⁶ Esau orewonieghe seji Isaaka wamrasimia Jakobo, na kumduma cha Padan-aramu, upate muka kufuma aho na seji oremlaghirieghe usakelowua waka wa Kikanaani.

⁷ Wokoni ukawona seji Jakobo wawisikira ndee na mae na kughenda cha Padan-aramu.

⁸ Esau ukamanya angu waka wa Kikanaani ndewim'boie ndee Isaaka.

⁹ Aho Esau ukaghenda kwa Ishmaeli mwana wa Abrahamu, ukammbusa muka umu kufuma aja, mwai wa Ishmaeli uwangwaghwa Mahalathi, nao ni mruna Nebaiothi, kuchuria waja waka orewilowueghe.

Ndodo ya Jakobo aja Betheli

¹⁰ Nao Jakobo ukafuma Beer-sheba ukaghenda cha Harani.

¹¹ Uendavika andu kumu, iruwa janeng'ena, ukalala aho. Ukashoa igho jimu upate kurarisha chongo chake, ukalala aja kio chija.

¹² Nao ukaloda ndodo, ukawona ngazi yadungwa andoenyi, na mudo ghwaro ghwavika mlungunyi; na weke malaika wa Mlungu werekoghe wikijoka na kusea kwa iyo ngazi.

¹³ Na BWANA ukakaia kimusi naighu yaro ukaghamba, “Ini ne BWANA, Mlungu wa ndeyo Abrahamu, na Mlungu wa Isaaka. Nichakuneka oho na kivalwa chako isanga iji kwawuyalala idana;

¹⁴ na kivalwa chako chichakaia kingi sa teri ya ndoenyi, na oho kuchaera cha magharibi, mashariki, kaskazinyi na kusinyi. Na kwako oho na kivalwa chako, mbari rose ra ndoenyi richanilomba irasimio.

¹⁵ Ola neko andwamweri na oho kukuwika na kukulindia andu kose kuchaaghenda, nani nichakuwunja isanga iji; angu sichaakusigha hata nameria kujikatisha ijo nakulaghira.”

¹⁶ Nao Jakobo ukawuka kufuma dilonyi kwake ukaghamba, “Loli BWANA oko aha na ini seremanyireghe anduangi!”

¹⁷ Ukaobua ukaghamba, “Aha ni andu koobosha loli-loli! Kwa loli aha niko nyumba ya Mlungu iko, sena aha ni mbenge ya mlungunyi.”

¹⁸ Nao Jakobo ukawuka kokesho kio, ukawada jija igho orejirarishireghe chongo chake, ukajidunga kimusi sa nguro, ukajiwika wakfu kwa kujidunga mavuda aighu yaro.

¹⁹ Ukakuwanga andu aja, Betheli, ela koimbiri muzi ugho ghorewangwaghwa Luzu.

²⁰ Jakobo ukabonya ighemi ukighamba, “Mlungu ukakaia andwamweri nani na kunilindia chienyi, unineke mkate ghoja na nguwo rerwa,

²¹ hata niwuye kwa sere nyumbenyi kwa aba, niko BWANA uchakaia Mlungu wapo.

²² Na igho iji najidunga sa nguro, jichakaia nyumba emtasira Mlungu, nani nichafunya ifungu ja ikumi ja ivo vose uchaanineka.”