KUZOYA 26 - Biblia Ilagho Jiboie Kwa Wandu Wose

Isaaka kukaia Gerari

¹ Nao njala zima ikabuka sena iseko ija erekoghe ngelo ra Abrahamu. Isaaka ukaghenda Gerari kwa Abimeleki mzuri wa Wafilisti.

² BWANA ukamfutukia ukamzera, “Kusakeghenda cha Misri, kaia isangenyi iji nichaakughoria.

³ Kaia aeni aha sa mghenyi nani nichakaia andwamweri na oho na kukurasimia; kwa kukaia masanga agha ghose nichakuneka oho na kivalwa chako, nani nichakatisha ighemi japo nijibonyere na ndeyo Abrahamu.

⁴ Nichachichuria kivalwa chako sa nyerinyeri ra mlungunyi, nani nichachineka kivalwa chako masanga agha ghose. Na kwa kivalwa chako, mbari rose ra ndoenyi richanilomba irasimio;

⁵ angu Abrahamu orelusikireghe lwaka lwapo, na kughiwadia malaghiro ghapo na sharia rapo.”

⁶ Nao Isaaka ukakaia Gerari. Hata iji waisanga weremkotereghe malagho gha muka wake,

⁷ ukawizera wei ni mruna kwa kukaia oreobueghe kuwighoria wei ni muka wake, ukighesha waisanga wicham'bwagha kwa wundu ghwa Rebeka, angu orekoghe ughokie na ndighi.

⁸ Hata iji wakaia aho matuku malazi, Abimeleki, mzuri wa Wafilisti, ukazighana idirishenyi, ukammbona Isaaka ukimmbwada-wada Rebeka mkake kwa lukundo.

⁹ Nao Abimeleki ukammbanga Isaaka ukamzera, “Nachawona uhu ni mkako; kwaki kughorie wei ni mwanyinyu?” Isaaka ukatumbulia, “Ni angu neregheshereghe nadima kubwaghwa kwa wundu ghwake.”

¹⁰ Abimeleki ukamzera, “Ni ilaghoki iji kwadibonyera? Eredimikagha mndumu ulale na muka wako, nao kudishekerie dingie ikosenyi.”

¹¹ Nao Abimeleki ukawilaghira wandu wose ukighamba, “Uo ose ucham'bonya kiwiwi mundu uhu angu muka wake uchabwaghwa.”

¹² Isaaka ukawa vindo andenyi ya isanga jija, na ugho mwaka ghoni ukakuwida mando ighana kuchumba seji orewaeghe. BWANA ukamrasimia,

¹³ na mundu uo ukawuya mzuri. Nao ukachuria kufugha na kuwuya mundu m'baa wa mali nyingi.

¹⁴ Orekoghe na ng'ondi, na mfugho na wadumiki wengi, hata Wafilisti wikammbonia iriso.

¹⁵ Kwa huwo Wafilisti wikavisiria viriwa vose verekoteroghe ni wadumiki wa ndee Abrahamu iji orekoghe moyo.

¹⁶ Nao Abimeleki ukamzera Isaaka, “Fuma kughende, angu oho kwakaia na ndighi kudichumba isi.”

¹⁷ Isaaka ukafuma aho ukadunga kambi yake vololonyi ya Gerari, ukakaia aho.

¹⁸ Isaaka ukavirua viriwa vose va machi verekoteroghe matuku gha ndee Abrahamu, angu Wafilisti werekoghe wavisiria nyuma ya kifwa cha Abrahamu. Niko aho ukavineka marina ghaja gheni ndee oreviwangieghe.

¹⁹ Ela iji wadumiki wa Isaaka werekotereghe aja vololonyi na kupata kiriwa chiko na ndoria ya machi,

²⁰ walisha wa aho Gerari wikazoya kurashana na walisha wa Isaaka wikighamba, “Agha ni machi ghedu.” Isaaka ukachiwanga icho kiriwa, Eseki angu wererashaneghe nao.

²¹ Wikakota kiriwa kizima na icho wikarashania wokoni; kwa huwu ukachiwanga Sitana.

²² Nao ukasoghoda imbiri kufuma aja, ukakota kiriwa kizima, ela icho ndecherewikwanyireghe anduangi; niko icho ukachiwanga Rehobothi ukighamba “Angu idana BWANA wadipatira wulalo, nesi dichapata mvono isangenyi.”

²³ Isaaka ukafuma aho, ukaghenda hata Beer-sheba.

²⁴ Nao BWANA ukamfutukia icho kio cheni ukamzera, “Ini ne Mlungu wa ndeyo Abrahamu, kusakeobua angu ini neko andwamweri na oho, nani nichakurasimia na kuchichuria kivalwa chako kwa wundu ghwa mdumiki wapo Abrahamu.”

²⁵ Kwa huwo Isaaka ukaagha madhabahu aho, ukamtasa BWANA sena ukadunga hema yake aho, wadumiki wake wikakota kiriwa.

Mapatano aghadi ya Isaaka na Abimeleki

²⁶ Niko Abimeleki na Ahuzathi mnjama wake, andwamweri na Fikoli, mbaa wa majeshi ghake, wikafuma Gerari kumghendia Isaaka.

²⁷ Isaaka ukawikotia ukighamba, “Kwaki mchagha kwapo sena mkimanya angu morezamiloghe ni ini hata mkaniwinga?”

²⁸ Nao wikatumbulia, “Ni angu dawona worinyi kukaia BWANA oko andwamweri na oho, niko dawona ni nicha dibonye ighemi aghadi ya oho na isi, sena dibonye mapatano na oho,

²⁹ kukaia ndekuchaadibonyera kiwiwi chingi sa iji koni disekubonyere kiwiwi. Ela dakubonyere nicha, dikakusigha kughende kwa sere. Ola idana kwakaia mrasimilwa wa BWANA.”

³⁰ Nao ukawibonyera karamu nawo wikaja na kunywa.

³¹ Ituku ja kawi wikawuka nakesho kio na kubonyerana ighemi, na Isaaka ukawifumira, nawo wikaghenda chia yawo kwa sere.

³² Ituku jija jeni, wadumiki wa Isaaka wikacha na kumghoria malagho gha kiriwa werechikotereghe wikamzera, “Dapata machi.”

³³ Nao Isaaka ukachiwanga icho kiriwa Shiba; kwa huwo muzi ugho ghwawangwa Beer-Sheba hata linu.

Waka wa kighenyi wa Esau

³⁴ Nao iji Esau wavika miaka mirongo ina, ukalowua wai wawi wa Wahiti: Judithi, mwai wa Beeri na Basemathi, mwai wa Eloni.

³⁵ Waka awo wikawiredia Isaaka na Rebeka irangi ja wasi.