KUZOYA 25 - Biblia Ilagho Jiboie Kwa Wandu Wose

Kivalwa chimu cha Abrahamu

¹ Abrahamu ukalowua muka mzima uwangwaghwa Ketura.

² Nao ukamvaia Zimrani, Jokshani, Medani, Midiani, Ishbaki, na Shua.

³ Jokshani orewivaeghe Sheba na Dedani. Wana wa Dedani niwo Waashuru, Waletushi, na Waleumi.

⁴ Wana wa Midiani werekoghe Efa, Eferi, Hanoku, Abida, na Elidaa. Awa wose werekoghe wana wa Ketura.

⁵ Ela Abrahamu ukamneka Isaaka ivo vose orekoghe navo;

⁶ na wana orewivaeghe kwa waka wazima ukawineka manosi, na sena imbiri ya kufwa kwake ukawitanya na mwana wake Isaaka, ukawighenja noko chia ra isanga ja mashariki.

Kifwa na kurikwa kwa Abrahamu

⁷ Matuku Abrahamu orekaieghe ni miaka ighana na mirongo mfungade na misanu.

⁸ Abrahamu ukafwa kwa wughosi ghuboie, mghosi na ndighi uchue matuku, nao ukarangana andwamweri na wakwawo wiidie.

⁹ Na wana wake Isaaka na Ishmaeli wikamrika andenyi ya ija mbanga ya Makpela, iko mbuwenyi kwa Efroni mwana wa Sohari Mhiti,

¹⁰ Mashariki ya Mamre, iyo mbuwa Abrahamu oreighueghe kufuma kwa Wahiti. Aho niko Abrahamu orerikiloghe andwamweri na mkake Sara.

¹¹ Nyuma ya kifwa cha Abrahamu, Mlungu ukamrasimia mwana wake Isaaka orekoghe ukikaia Beer-lahai-roi.

Kivalwa cha Ishmaeli

¹² Ichi nicho kivalwa cha Ishmaeli mwana wa Abrahamu uo orevaloghe ni Hagari Mmisri, mwai wa kazi wa Sara.

¹³ Na marina ghawo nigho agha ghipangilo kunughana na kuvalwa kwawo: Nebaiothi mwana wa imbiri wa Ishmaeli, Kedari, Adbeeli, Mibsamu,

¹⁴ Mishma, Duma, Masa, Hadadi, Tema,

¹⁵ Jeturi, Nafishi, na Kedema.

¹⁶ Awo niwo wana wa Ishmaeli na agho nigho marina ghawo, kwa mizi yawo na kambi rawo, wabaa ikumi na wawi, kunughana na mbari rawo.

¹⁷ Matuku ghose Ishmaeli orekaieghe ndoenyi ni miaka ighana na mirongo idadu na mfungade, nao ukafwa, ukarangana andwamweri na wakwawo wiidie.

¹⁸ Na kivalwa chake chikakaia masanga gha kufuma Hawila hata Shuri, kulangaya cha Misri chia eghenda Ashuru. Ela wikakaia kula na kivalwa kizima cha Abrahamu.

Kuvalwa kwa Esau na Jakobo

¹⁹ Kivalwa cha Isaaka mwana wa Abrahamu cherekoghe huwu: Abrahamu oremvaeghe Isaaka.

²⁰ Isaaka orekoghe mundu wa miaka mirongo ina iji oremlowuagha Rebeka, mwai wa Bethueli (Muarami wa Padan-aramu,) mruna Labani Muarami.

²¹ Isaaka ukamlombia muka wake kwa BWANA angu orekoghe kolowi, nao BWANA ukaghisikira malombi ghake, na mkake Rebeka ukapata kifu.

²² Ela wana wikasimana andenyi kifunyi kwake, hata ukaghamba, “Ikakaia ni huwu, baa nifo.” Ukaghenda kumkotia BWANA.

²³ BWANA ukamtumbulia ukaghamba, “Mbari iwi reko kifunyi kwako, na vichuku viwi kuvivagha vichawaghika; chimu chichakaia na ndighi kuchumba mmbao, na uo m'baa uchamdumikia uhu mtini.”

²⁴ Matuku ghake gheva ghiendakatia, ukava masa.

²⁵ Wa imbiri ukafuma, utinikie sena uko na mafuri mengi sa nguwo ndacha ya mafuri, nao wikammbanga Esau.

²⁶ Konyuma mruna ukafuma, na mkonu ghwake ghorekoghe ghwawadia ghimbe ya Esau, nao wikammbanga irina jake Jakobo. Isaaka orekoghe mundu wa miaka mirongo irandadu iji werevaloghe.

Esau kuuza hachi yake

²⁷ Nao iji awo wana wazoghua, Esau ukakaia ing'oni jediwa nyamandu, mundu ukunde maisha gha kireti, ela Jakobo orekoghe mundu wa kima okaia hemenyi.

²⁸ Isaaka ukamkunda Esau, angu orekoghe ukija nyama ra madiwo ghake, ela Rebeka ukamkunda Jakobo.

²⁹ Ituku jimu, iji Jakobo orekoghe ukideka dengu, Esau ukangia kufuma kudiwenyi kwake, wazughwa na ndighi.

³⁰ Ukamzera Jakobo, “Nineke dengu rako rimu angu nazughwa na ndighi!” Kwa huwo wikammbanga irina jake Edomu.

³¹ Jakobo ukaghamba, “Niuzire hachi yako ya kuvalwa kwa imbiri kande.”

³² Esau ukatumbulia, “Niamba nifo, iyo hachi yapo ya kuvalwa kwa imbiri initesia kii?”

³³ Jakobo ukamzera, “Nibonyere ighemi kande.” Nao Esau ukam'bonyera Jakobo ighemi ukamuuzira hachi yake ya kuvalwa kwa imbiri.

³⁴ Jakobo ukamneka Esau mkate na mbogha ra dengu, ukaja, ukanywa ukawuka na kughenda chia yake. Huwo Esau ukaimenya ija hachi yake ya kuvalwa kwa imbiri.