KUZOYA 22 - Biblia Ilagho Jiboie Kwa Wandu Wose

Mlungu kumlaghira Abrahamu umfunye Isaaka kizongona

¹ Nao nyuma ya maza iro, Mlungu ukamtima Abrahamu ukaghamba, “Abrahamu!” Nao ukadika, “Neko aha.”

² Mlungu ukamzera, “Mmbwade mwana wako, uo mwana wako wa ititi Isaaka kumkunde na ndighi, kughende nao isanga ja Moria, kumfunye kizongona chekora aho aighu ya mghondi ghumu nichaakughoria.”

³ Abrahamu ukawuka nakesho kio, ukaala punda wake, nao ukadwa wadawana wawi andwamweri na mwana wake Isaaka, ukadumbua mbande kwa wundu ghwa icho kizongona chekora, ukawuka na kukughendia andu aho oreghoreloghe ni Mlungu.

⁴ Hata ituku ja kadadu, Abrahamu ukazighana ukakuwona andu kwaro kwa kula.

⁵ Abrahamu ukawizera waja wadawana, “Niweserenyi aha na uhu punda, nani nighendanye na mwana aja kimonu ditase, ima dimburie sena.”

⁶ Nao Abrahamu ukariwada rija mbande rekora kizongona, ukamdukishira mwana wake Isaaka; na uo moni ukadwa modo na ndagha. Nawo wikaghenda chienyi,

⁷ Isaaka ukamzera ndee, “Aba.” Ukamtumbulia, “Neko aha mwanwapo.” Isaaka ukaghamba, “Nawona kwadwae modo, na mbande heri, ela mwana wa ng'ondi wa icho kizongona uo uao?”

⁸ Nao Abrahamu ukamtumbulia, “Mlungu moni uchafunya mwana wa ng'ondi wa icho kizongona mwanwapo.” Nawo wikachuria kughenda chiaimweri.

⁹ Hata iji wameria kuvika andu aho oreghoreloghe ni Mlungu, Abrahamu ukaagha madhabahu, ukaala mbande nicha, nao ukamfunga mwana wake Isaaka, ukammbikiria aighu ya rija mbande madhabahunyi.

¹⁰ Nao Abrahamu ukaghughorua mkonu ghwake, ukaiwada ndagha um'bwaghe mwana wake.

¹¹ Ela malaika wa BWANA ukammbanga kufuma mlungunyi ukighamba, “Abrahamu! Abrahamu!” Ukadika, “Neko aha.”

¹² Nao ukamzera, “Manya kusem'bonye mwana ilagho jingi, angu idana namanya loli kwamuobuagha Mlungu, angu kuseniimie mwana wako, uo mwana wako wa ititi Isaaka.”

¹³ Abrahamu ukazighana, ukawona nyuma yake bauru yawadikia kisachinyi kwa mbembe rake; nao ukaghenda na kuiwada iyo bauru, ukaifunya kizongona chekora wulalo ghwa mwana wake.

¹⁴ Abrahamu ukakuwanga angu aja, “BWANA wanekagha.” Seji ighorekagha hata linu, “Mghondinyi kwa BWANA wanekagha.”

¹⁵ Nao Malaika wa BWANA ukammbanga Abrahamu indo ja kawi kufuma mlungunyi,

¹⁶ ukaghamba, “Naghema kwa irina japo jeni, ini BWANA naghamba, kwa kukaia kwabonya ilagho iji, hata ndekuniimie mwana wako, uo mwana wako wa ititi;

¹⁷ nichakurasimia nandighi, nani nichachichuria kivalwa chako sa wungi ghwa nyerinyeri ra mlungunyi, na sa msangagha ghuko mbai-mbai ya bahari, na kivalwa chako chichawisima wamaiza wawo.

¹⁸ Na kwa kivalwa chako, mbari rose ra ndoenyi richanilomba irasimio, angu oho kwalusikira lwaka lwapo.”

¹⁹ Nao Abrahamu ukawiwuria waja wadawana, na wose wikawuya Beer-sheba. Abrahamu ukakaia aho.

Kivalwa cha Nahori

²⁰ Nyuma ya maza iri, Abrahamu ukaghorelwa kukaia Milka wamvaie mruna Nahori wana wunyanya.

²¹ Usi mwana wake wa imbiri, na Buzi mruna, Kemueli ndee Aramu,

²² Kesedi, Hazo, Pildashi, Jidlafu na Bethueli.

²³ Bethueli nuo ndee Rebeka. Awa wana wunyanya Milka oremvaieghe Nahori, mruna Abrahamu.

²⁴ Na Reuma, muka mzumba wa Nahori, ukamvaia Teba, Gahamu, Tahashi, na Maaka.