KUZOYA 20 - Biblia Ilagho Jiboie Kwa Wandu Wose

Abrahamu na Abimeleki

¹ Kufuma aho, Abrahamu ukaghenda cha Negebu, ukakaia ghadi na ghadi ya Kadeshi na Shuri, ukakaia Gerari kwa ngelo ndini.

² Na aho Abrahamu ukamghora mkake Sara kukaia ni mruna. Abimeleki mzuri wa Gerari ukaduma uredelo Sara upate kummbusa.

³ Nao Mlungu ukamchea Abimeleki ndodonyi nakio ukamzera, “Ola kuchafwa, kwa kukaia kwawusa muka wa wandu.”

⁴ Aho Abimeleki nderekoghe wamsoghodera anduangi. Niko ukaghamba, “Wele BWANA, kuchawibwagha wandu wisewadie ikosa?

⁵ Nechi odeghora moni wei ni mruna, na uo muka wori ukaghamba wokoni wei ni mruna; niko nani ngaghibonya agha kwa ngolo ielie putu, ini sine ikosa jingi.”

⁶ Nao Mlungu ukamzera uko ndodonyi, “Ee loli kwaghamba kwabonya huwo kwa ngolo ielie, ela ni ini moni nikutangalie kusenibonyere kaung'a; niko ngakughira kusemuadade.

⁷ Idana kummbunje kwa mumi wake, angu uo moni ni mlodi, nao uchakulombia oho kusechefwa, niko kuchakaia moyo. Ela kukalegha kummbunja, manya loli kuchafwa na wandu wako wose.”

⁸ Nao Abimeleki ukawuka nakesho kio, ukawiwanga wadumiki wake wose, ukawighoria malagho agho, nawo wikangilwa ni wowa loli-loli.

⁹ Niko Abimeleki ukammbanga Abrahamu ukamzera, “Welee, kwadibonyere wada huwu? Ni kaung'aki dikubonyere, hata kukanishekeria ini na wuzuri ghwapo kungia andenyi ya kaung'a ihi mbaa? Kwanibonyere maza risefwane.”

¹⁰ Abimeleki ukachuria kumzera Abrahamu, “Koregheshereghe wada kukibonya huwu?”

¹¹ Abrahamu ukamzera, “Nedeghesha wei wandu ndewimuobuagha Mlungu aha, nawo wichanibwagha kwa wundu ghwa muka wapo.

¹² Ela kwa loli ni mwanidu, aba ni umweri ela mae ni mzima; niko nimlowue.

¹³ Iji Mlungu orenifunyireghe kwa aba nikaie omara-mara nedemzera muka wapo huwu, ‘Wucha kuchaanibonyera ni ughu: andu uko kose dichaavika, kunighore kukaia ini ne mwanyinyu!’”

¹⁴ Nao Abimeleki ukawusa ng'ondi na ng'ombe, na wazumba wa womi na wa waka, ukamneka Abrahamu na kummbunjira mkake Sara ukighamba,

¹⁵ “Ola isanga japo heji, kaia andu uko kose kuchaakunda oho kumoni.”

¹⁶ Ukamzera Sara, “Ola namneka mwanyinyu vibelele va feza elfu imweri, kukaia wushuhuda ghwa loli mesonyi kwa wose mkwanye angu ndekubonyere wuwiwi ghungi, na angu koko na hachi imbiri ya wose.”

¹⁷ Niko aho Abrahamu ukawilombia kwa Mlungu, na Mlungu ukawiboisa Abimeleki na mkake, na wazumba wake wa waka wipate kuva wana;

¹⁸ angu Mlungu orekoghe wawifunga kuva waka wose wa nyumba ya Abimeleki, kwa wundu ghwa Sara mkake Abrahamu.