KUZOYA 2 - Biblia Ilagho Jiboie Kwa Wandu Wose

¹ Niko huwu mlungunyi na ndoenyi kukamerelwa kuumbwa, na vose viko andenyi kwaro.

² Nao ituku ja mfungade Mlungu ukahora nyuma ya kumeria kazi rake rose oreribonyereghe.

³ Niko Mlungu ukajirasimia ituku ja mfungade, ukajielesha; angu kwa ijo, Mlungu orehorieghe kufuma kwa kazi rake rose reumba.

⁴ Huwu niko mlungunyi na ndoenyi koreumbiloghe. Iji BWANA Mlungu orebonyereghe mlungunyi na ndoenyi,

Mbuwa ya Edeni

⁵ ndekorekoghe na mudi ghungi ndoenyi, hata mbeu ringi ndererebukieghe, kwa kukaia BWANA Mlungu nderekoghe wanyesha vua ingi ndoenyi, hata ndekorekoghe na mndungi oilima ndoe anduangi;

⁶ ela machi ghikabuka ndoenyi na kuinyoshera ndoe.

⁷ Niko BWANA Mlungu ukam'bonya mdamu wa teri kufuma kwa ndoe, ukamfuria miruke ya irangi mbuonyi kwake, na mdamu ukakaia mundu uko moyo.

⁸ Nao BWANA Mlungu ukawa mbuwa chia ra mashariki ya Edeni; ukammbika aho uo mundu orem'bonyereghe.

⁹ BWANA Mlungu ukabonya ndoe ibuse midi ighokie mesonyi, na sena iboie kwa vindo, ukawika na mudi ghwa irangi ghadi na ghadi ya mbuwa; na mudi ghomanya mecha na mawiwi wokoni.

¹⁰ Moda ghukafuma aho Edeni ghonyoshera iyo mbuwa, na kufuma aho ghukawaghanyika na kuwuya meda ina.

¹¹ Moda ghwa imbiri ni Pishoni, nigho ghuidiriagha isanga ja Havila, angu kuko na dhahabu;

¹² nayo dhahabu ya isanga ijo yaboie; sena koko na marumba, ghiwangwagha bedola, na magho ghiboie gha zoghori ghiwangwagha Shohamu.

¹³ Moda ghwa kawi ni Gihoni, nigho ghuidiriagha isanga ja Kushi.

¹⁴ Moda ghwa kadadu ni Tigrisi, ugho ghuidiriagha mashariki ya Ashuru. Na moda ghwa kana ni Eufrate.

¹⁵ BWANA Mlungu ukamdwa na kummbika uo mundu andenyi ya iyo mbuwa ya Edeni uilime na kuilindia.

¹⁶ Nao BWANA Mlungu ukamlaghira uo mundu ukimzera, “Kwadima kuja matunda gha midi yose ya mbuwenyi,

¹⁷ ela matunda gha ghuja mudi ghomanya mecha na mawiwi kuseje, angu ituku kujagha matunda gharo, kuchafwa.”

¹⁸ Nao BWANA Mlungu ukaghamba, “Si nicha uo mundu uduo uekeri, nicham'bonyera mtesia umfwanagha putu.”

¹⁹ BWANA Mlungu ukabonya nyamandu rose na nyonyi ra mbeonyi, ukamredia uo mundu uzighane na kuwona ngera uriwanga wada, na irina uo mundu orejiwangieghe kula nyamandu iko moyo, nijo jeni jerewurieghe irina jake.

²⁰ Uo mundu ukarineka marina mfugho rose, na nyonyi rose, na nyamandu ra isakenyi rose; ela kwa iro rose, ndekorewonekieghe ingi ifwane emtesia uo mundu anduangi.

²¹ BWANA Mlungu ukamredia uo mundu dilo nyingi, nao uko dilonyi, Mlungu ukamfunya luwaru lumu, ukachura nyama wulalo ghwaro;

²² na luwaru ulo BWANA Mlungu orelufunyireghe kwa uo mundu ukalubonya muka na kumredia uo mundu.

²³ Nao uo mundu ukaghamba, “E, ola da niko. Uhu ni iindi ja maindi ghapo, na nyama ya nyama rapo; uchawangwa ‘Muka’ kwa kukaia odefunywa kwa mndwawomi.”

²⁴ Kwa huwu mundu wadamsigha ndee na mae, na kumazirana na mkake, nawo wadawuya mumbi ghumweri.

²⁵ Na uo mundu na mkake werekoghe duu, sena ndewerekoghe na waya ghungi anduangi.