KUZOYA 17 - Biblia Ilagho Jiboie Kwa Wandu Wose

Kushamishwa kukaia alama ya ilaghano

¹ Nao iji Abramu wavika miaka mirongo ikenda na ikenda, BWANA ukamfutukia ukamzera, “Ini ne Mlungu-Uwadie-Ndighi-Rose; ninughe kukaia kukatie.

² Ini nichabonya ilaghano japo na oho, na sena nichachichuria kivalwa chako kwa wungi.”

³ Abramu ukaghwa kiwushu-wushu na Mlungu ukamzera,

⁴ “Ola ilaghano japo ni andwamweri na oho, kuchakaia ndee wa mbari nyingi.

⁵ Ndekuchaawangwa sena Abramu, ela irina jako kuchawangwa Abrahamu, kwa kukaia nakubonya oho kukaie ndee wa mbari nyingi.

⁶ Nichakuneka kivalwa kingi na ndighi; mbari richafuma kwako chiaimweri na wazuri.

⁷ Nani nichajimangisha ilaghano japo aghadi yapo na oho, jikaie ilaghano ja kala na kala kwa kivalwa chako chose chichagha, kivalwa hata kivalwa, angu nichakaia Mlungu kwako na kwawo wose wori.

⁸ Nani nichakuneka oho na kivalwa chako chose isanga iji kwawuyajikaia sa mghenyi, isanga jose ja Kanaani, jipate kuwuya jawo kwa kala na kala, na ini nichakaia Mlungu wawo.”

⁹ Nao Mlungu ukamzera Abrahamu, “Na oho kujiwadie ilaghano japo; oho na wana wako, na kivalwa chako chose chichanugha.

¹⁰ Iji nijo ilaghano japo kuchaajiwadia aghadi yapo na oho, na kivalwa chako chose chichagha: Kula mundu wa womi aghadi konyu uchashamishwa.

¹¹ Wandu wose wa womi konyu wichashamishwa, nayo ichakaia alama ya ilaghano japo aghadi yapo na inyo.

¹² Kula mwana wa womi wa matuku wunyanya uchashamishwa, ngera oovailwa mzinyi kwako, angu ngera ooghulwa kwa pesa kufuma kwa mghenyi useko wa kivalwa chako, wichashamishwa ituku ja wunyanya nyuma ya kuvalwa kwawo.

¹³ Uo uvalo nyumbenyi kwako na uo ughulo kwa pesa, wose wichashamishwa; ilaghano japo jipate kukaia mimbinyi konyu, ilaghano ja kala na kala.

¹⁴ Mundu wa womi uo ose uchaalegha kushamishwa uchatanywa na wandu wake, angu wajichikanya ilaghano japo.”

¹⁵ Nao Mlungu ukamzera Abrahamu, “Na muka wako ndekuchaammbanga sena Sarai, ela uchawangwa Sara.

¹⁶ Nichamrasimia, na kuchumba nichakuneka oho mwana wa womi kufuma kwake, nani nichamrasimia na kum'bonya ukaie mae wa mbari nyingi, na wazuri wa wandu wichafuma kwake.”

¹⁷ Niko Abrahamu ukaghwa kiwushu-wushu, ukaseka ukaghamba ngolonyi kwake, “Mundu wa miaka ighana wadima kuva mwana? Sara wa miaka mirongo ikenda uchava mwana?”

¹⁸ Nao Abrahamu ukamtumbulia Mlungu ukaghamba, “Welee, kwaki kusamrumiriagha Ishmaeli?”

¹⁹ Ela Mlungu ukaghamba, “Hata, ni muka wako moni Sara uchaakuvaia mwana wa womi, na irina jake kuchammbanga Isaaka. Nani nichajimangisha ilaghano japo kwake, na kwa kivalwa chake jikaie ilaghano ja kala na kala.

²⁰ Na kwa wundu ghwa Ishmaeli wori nakusikira, nao moni wori nichamrasimia uve kwa wungi na kuchurikia, nao uchakaia ndee wa wazuri ikumi na wawi, na kivalwa chake nichachibonya chikaie mbari mbaa.

²¹ Ela ilaghano japo ijo, nichajibonya na kujimangisha kwa Isaaka, uo Sara uchaakuvaia kimu sa ichi, mwaka ghuchagha.”

²² Nao nyuma ya Mlungu kudedanya na Abrahamu, ukamsigha, ukaghenda.

²³ Niko Abrahamu ukamsikira Mlungu, ukammbwada mwana wake Ishmaeli, ijo ituku jeni na wazumba wose werevaloghe nyumbenyi kwake, angu wighulo kwa pesa rake, ukawishamisha. Kula mundu wa womi orekoghe wa nyumba ya Abrahamu oreshamishiroghe sa iji koni Mlungu oremlaghirieghe.

²⁴ Abrahamu moni orekoghe mundu wa miaka mirongo ikenda iji oreshamishiroghe.

²⁵ Na mwana wake Ishmaeli orekoghe na miaka ikumi na idadu iji oreshamishiroghe.

²⁶ Ituku jija jeni Abrahamu na mwana wake Ishmaeli wereshamishiroghe.

²⁷ Wandu wose wa nyumbenyi kwake, ikaiagha wedevailwa aeni angu ngera wadeghulwa kwa pesa kufuma kwa mghenyi, wose wereshamishiroghe andwamweri nao.