KUZOYA 16 - Biblia Ilagho Jiboie Kwa Wandu Wose

Hagari na Ishmaeli

¹ Sarai, mka Abramu, nderemvaieghe Abramu wana. Ela orekoghe na mwai m'bonyi kazi Mmisri orewangwagha Hagari.

² Sarai ukamzera Abramu, “E hoku BWANA unifungie nisakeva wana lee, ndakwakaiagha na mwai wa kazi, kewada nadima kupata wana kwake.” Nao Abramu ukarumiria malagho gha Sarai.

³ Niko aho nyuma ya Abramu kukaia miaka ikumi andenyi ya isanga ja Kanaani, Sarai oremmbwadieghe mwai wake wa kazi Hagari, ukamneka mumi wake Abramu ukaie muka mzumba wake.

⁴ Abramu ukangia kwa Hagari, nao ukapata kifu; na Hagari iji wawona angu wapata kifu, ukamzighana bibi wake Sarai kwa lumenyo.

⁵ Nao Sarai ukamzera Abramu, “Ni oho kumoni kwashekeria ngamenywa. Nerekunekieghe mwai wapo wa kazi laghenyi kwako, nao wendawona wapata kifu, wakanimenya. BWANA moni ndetanye aghadi ya ini na oho.”

⁶ Abramu ukamzera Sarai, “Mwai wako wa kazi oko aisi yako; m'bonye seji kukunde kumoni.” Niko Sarai ukamkoronga Hagari hata ukakimbia na kughenda chia rake.

⁷ Nao malaika wa BWANA ukamkua kireti mbai na mbai ya ndoria ya machi, chia eghenda Shuri.

⁸ Ukamzera, “Welee Hagari mwai wa kazi wa Sarai, kwafuma hao na ni hao kughendagha?” Hagari ukamzera, “Naawuyamkimbia bibi wapo Sarai.”

⁹ Malaika wa BWANA ukamzera, “Wuya kwa bibi wako, kukusere kumoni imbiri kwake.”

¹⁰ Malaika wa BWANA ukachuria kughora, “Nichachichuria kivalwa chako nandighi hata chileme kutalika.

¹¹ Ola koko na kifu, na oho kuchava mwana wa womi, na irina jake kuchammbanga Ishmaeli, angu BWANA wasikira kililo chako.

¹² Nao uchakaia sa punda wa isakenyi aghadi ya wandu, ndechaasikirana na wandu, na wandu nawo ndewichaasikirana nao; nao uchakutanya na waruna wose.”

¹³ Nao Hagari ukakukotia moni, “Ni loli nammbona Mlungu sena ngakaiagha moyo odima kujighora iji ilagho?” Nao ukammbanga BWANA uo oreghorieghe nao, “Mlungu Uhu Uwonagha.”

¹⁴ Kwa huwu iyo ndoria iko ghadi na ghadi ya Kadeshi na Baredi yadawangwa Beer-lahai-roi.

¹⁵ Hagari ukamvaia Abramu mwana wa womi, na Abramu ukammbanga irina jake Ishmaeli.

¹⁶ Abramu orekoghe mundu wa miaka mirongo wunyanya na irandadu iji Hagari oremvaeghe Ishmaeli.