KUZOYA 13 - Biblia Ilagho Jiboie Kwa Wandu Wose

Kusighana kwa Abramu na Loti

¹ Nao Abramu ukajoka kufuma Misri, uo moni, mkake, na vose orekoghe navo, andwamweri na Loti, wikangia Negebu.

² Abramu orekoghe mzuri nandighi wa mfugho, feza na dhahabu.

³ Ukaghenda kufuma Negebu hata ukavika Betheli, aja oredungieghe hema yake imbiri, ghadi na ghadi ya Betheli na Ai,

⁴ andu orekoghe waagha madhabahu, niko aho ukamtasa BWANA.

⁵ Na Loti, uo orenughaneghe na Abramu, orekoghe na mfugho wokoni, na hema wori.

⁶ Kwa huwu isanga ndejeredimieghe kuwikata wose anduangi, angu werekoghe na mfugho nyingi nandighi.

⁷ Marashano ghikawuka aghadi ya walisha wa Abramu na walisha wa Loti. Ngelo iyo, Wakanaani na Waperizi werekoghe wikikaia andenyi ya ijo isanga.

⁸ Abramu ukamzera Loti, “Isi de wandu wamweri; ndeifane kodu walisha wako na wapo wirashaneghe.

⁹ Nechi isanga heji ni iduu; ndedisighane. Kukasaghua kughenda mkonu ghwa kiwaka, nichaghenda mkonu ghwa kiwoni, kukaghenda mkonu ghwa kiwoni nichaghenda mkonu ghwa kiwaka.”

¹⁰ Loti ukazighana kose, ukawona vololo yose ya Jordani hata kuvikia Soari yanyoshere machi kula andu sa mbuwa ya BWANA, karakara na isanga ja Misri; aho ni imbiri BWANA useinonie Sodoma na Gomora.

¹¹ Loti ukakusaghuya moni vololo yose ya Jordani, ukaghenda cha mashariki; huwo niko weresighaneghe.

¹² Ela Abramu ukakaia andenyi ya isanga ja Kanaani, na Loti ukakaia aghadi ya mizi iko vololonyi, ukasoghoda ukidunga hema yake hata ukavika Sodoma.

¹³ Na wandu wa Sodoma werekoghe wawiwi na wakaung'a na ndighi imbiri ya BWANA.

Abramu kusoghoda cha Hebroni

¹⁴ Nyuma ya Loti kughenda, Mlungu ukamzera Abramu, “Kufuma andu aho kuko, wusira meso ghako kuzighane kose; kaskazinyi, kusinyi, mashariki, na magharibi;

¹⁵ angu isanga iji jose kujiwonagha, nichakuneka oho na kivalwa chako kwa kala na kala.

¹⁶ Nichakuneka kivalwa kingi sa teri ya ndoenyi, na ichakaia iji mndungi uchaadima kutala teri iko ndoenyi, niko uchaadima kutala kivalwa chako.

¹⁷ Wuka kujisele isanga wulacha na wushapa ghwaro, kwa kukaia nichakuneka oho.”

¹⁸ Abramu ukainja hema yake, ukaghenda na kukaia kaavui na midi ya kuela ya Mamre aja Hebroni, ukamuaghia BWANA madhabahu.