KUZOYA 10 - Biblia Ilagho Jiboie Kwa Wandu Wose

Kivalwa cha wana wa Nuhu

¹ Ichi nicho kivalwa cha wana wa Nuhu. Shemu, Hamu na Jafethi, nawo werevaeghe wana wa womi nyuma ya gharika.

² Wana wa Jafethi ni: Gomeri, Magogu, Madai, Javani, Tubali, Mesheki, na Tirasi.

³ Wana wa Gomeri ni: Ashkenazi, Rifathi, na Togarma.

⁴ Wana wa Javani ni Elisha, Tarshishi, Kitimu, na Dodanimu.

⁵ Awa niwo werevaeghe wandu wikaera pwani yose; nawo ni kivalwa cha Jafethi, kunughana na masanga ghawo, viteto vawo, nyumba rawo, na mbari rawo.

⁶ Wana wa Hamu ni: Kushi, Misri, Puti, na Kanaani.

⁷ Wana wa Kushi ni: Seba, Hawila, Sabta, Raama, na Sabteka. Wana wa Raama ni Sheba na Dedani.

⁸ Kushi ni ndee Nimrodi, nao orekoghe ing'oni ja imbiri ndoenyi.

⁹ Orewurieghe mdiwi m'baa kwa ndighi ra BWANA. Niko wandu wizeranagha, “BWANA ndekubonye kukaie mdiwi m'baa sa Nimrodi.”

¹⁰ Kuzoya kwa kubonya nguma kwake ni aho Babeli, Ereki, na Akadi andenyi ya isanga ja Shinari.

¹¹ Kufuma isanga jija ukaghenda Ashuru, na aho ukaagha Nineve, Rehoboth-Iri, Kala,

¹² na Reseni, ghuja muzi m'baa ghuko ghadi na ghadi ya Nineve na Kala.

¹³ Wana wa Misri ni Waludi, Wanami, Walehabi,

¹⁴ Wanaftuhi, Wapathrusi, Wakusluhi, (aho niko Wafilisti wifumie) na Wakaftori.

¹⁵ Kanaani orevaeghe mwana wake wa imbiri Sidoni, na Hethi;

¹⁶ niwo werewurieghe kivalwa cha Wajebusi, Waamori, Wagirgashi,

¹⁷ Wahivi, Waariki, Wasimi,

¹⁸ Waarivadi, Wasemari, na Wahamathi. Konyuma icho kivalwa cha Wakanaani chikaera,

¹⁹ na mwano ghwawo ghukachurikia kufuma Sidoni kulangaya cha Gerari hata Gaza cha kusinyi, na kulangaya cha Sodoma na Gomora, Adma na Zeboiimu, hata kuvika Lasha cha mashariki.

²⁰ Awo niwo wana wa Hamu kunughana na kichuku chawo, viteto vawo, masanga ghawo na mbari raro.

²¹ Shemu, mruna m'baa Jafethi, ni ndee Waebrania.

²² Wana wake ni: Elamu, Ashuru, Arpakishadi, Ludi na Aramu.

²³ Wana wa Aramu ni: Uzi, Huli, Getheri, na Mashi.

²⁴ Arpakishadi ni ndee Shela, na Shela, ni ndee Eberi.

²⁵ Eberi ukava wana wawi umu orewangwaghwa Pelegi, angu kwa matuku ghake wurumwengu ghorewaghikieghe, na mruna orewangwagha Joktani.

²⁶ Joktani ukawiva Almodadi, Shelefu, Hazarimawethi, Jera,

²⁷ Hadoramu, Uzali, Dikila,

²⁸ Obali, Abimaeli, Sheba,

²⁹ Ofiri, Hawila, na Jobabu; awa wose werekoghe wana wa Joktani.

³⁰ Isanga jawo werejikaieghe jerekoghe kufuma Mesha, kulangaya cha Sefari hata isanga ja mighondinyi ichia cha mashariki.

³¹ Awo niwo wana wa Shemu kunughana na vichuku vawo, viteto vawo, masanga ghawo, na mbari rawo.

³² Ichi nicho kichuku cha wana wa Nuhu kunughana na kivalwa chawo, na mbari rawo, na kufumanya nawo, wadamu wikaera kose wurumwengunyi nyuma ya iyo gharika.