KUFUMA 7 - Biblia Ilagho Jiboie Kwa Wandu Wose

¹ Nao BWANA ukamzera Musa, “Zighana nakubonya oho kukaie sa Mlungu kwa Farao, na mwanyinyu Haruni ukaie mlodi wako.

² Kuchaghora ghose nikulaghiragha, na mwanyinyu Haruni uchamghoria Farao, upate kuwisigha wandu wa Israeli wifume isangenyi kwake.

³ Ela nichaikurisha ngolo ya Farao, hata ngera nichachuria weke mwakilimbiti na mashiniko andenyi ya isanga ja Misri,

⁴ Farao ndechaamsikira anduangi; niko nichawikaba Wamisri kwa mkonu ghwapo ghwa ndighi; nani nichaghifunya majeshi ghapo, wandu wapo wana wa Israeli, wifume isanga ja Misri, kwa mabonyo mabaa gha kutanya.

⁵ Niko Wamisri wichamanya angu ini ne BWANA, ngelo nichaaghorua mkonu ghwapo aighu ya Misri, na kuwifunya wandu wa Israeli kufuma kwawo.”

⁶ Musa na Haruni wikabonya wokoni sa iji BWANA orewilaghirieghe.

⁷ Uo Musa orekoghe mundu wa miaka mirongo wunyanya na Haruni mirongo wunyanya na idadu iji wereghoragha na Farao.

Mzata ghwa Haruni

⁸ Nao BWANA ukawizera Musa na Haruni,

⁹ “Farao ukamzera, mmbonyere wuloli ghonyu kwa kubonya mwakilimbiti, kumzere Haruni, uwade zobo yake, na kuikumba andonyi imbiri ya Farao, nayo ichawuya choka.”

¹⁰ Niko Musa na Haruni wikaghenda kwa Farao na kubonya sa iji koni BWANA orewilaghirieghe. Haruni ukaikumba zobo yake andonyi imbiri ya Farao na wadumiki wake, nayo ikawuya choka.

¹¹ Niko Farao ukawiwanga wandu wake wa akili na wasawi, na awo waghanga wa Misri wikabonya wokoni kwa wuya ghwa akili rawo.

¹² Wikakumba zobo rawo andonyi, naro rikawuya choka. Ela zobo ya Haruni ikamila iro zobo rawo.

¹³ Hata huwo saki, Farao ukakurisha ngolo yake, ukalegha kuwisikira Musa na Haruni, sa iji koni BWANA oreghorieghe.

Misri kuchelwa ni wasi m'baa

¹⁴ Niko BWANA ukamzera Musa, “Farao waikurisha ngolo yake, nao waawuyalegha kuwisigha awo wandu wighende.

¹⁵ Idana kumghendie nakesho ukighenda modenyi, kummbeserie ahoeni mbai na mbai ya moda, kukiwadia ija zobo erewurieghe choka.

¹⁶ Nao kumzere Farao, ‘BWANA, uo Mlungu wa Waebrania orenidumieghe kwako nikuzere kuwisighe wandu wake wighende; wipate kumdumikia kireti; ela oho kwaduagha kusesikiragha.’”

¹⁷ BWANA waghora huwu, “Mchanimanya kukaia ne BWANA kwa chia ihi, nichaghikaba machi gha moda ghwa Naili kwa zobo ihi iko mkonunyi kwapo, nagho ghichawuya bagha.

¹⁸ Samaki rose riko andenyi ya moda ghwa Naili richafwa, na machi ghichanuka hata Wamisri wichalemwa ni kughinywa.”

¹⁹ BWANA ukamzera Musa, “Mzere Haruni uiwade zobo yake, uighoruo aighu ya machi ghose gha Misri; meda yawo, mikua yawo, viriwa vawo, na ndiwa rawo rose ra machi; ghipate kuwuya bagha. Machi ghichawuya bagha isanga jose ja Misri, hata andenyi ya vombo va midi na va magho.”

²⁰ Niko Musa na Haruni wikabonya sa iji koni BWANA orewilaghirieghe; Haruni ukawusira zobo yake imbiri ya Farao na wadumiki wake, ukaghikaba machi gha moda ghwa Naili, na machi ghose gha ugho moda ghikawuya bagha.

²¹ Samaki rerekoghe andenyi ya moda ghwa Naili rikafwa, moda ghukanuka hata Wamisri wikalemwa ni kunywa machi gha moda ghwa Naili; korekoghe na bagha andu kose isanga ja Misri.

²² Niko waghanga wa Misri wikabonya wokoni kwa wuya ghwa akili rawo. Kwa wundu ugho Farao ukakurisha ngolo yake, hata nderewisikireghe Musa na Haruni, sa iji koni BWANA oreghorieghe.

²³ Farao ukaghaluka na kughenda nyumbenyi kwake, na agho malagho ndegherengirieghe ngolonyi kwake anduangi.

²⁴ Wamisri wose wikakota machi ghenywa mbai na mbai ya moda ghwa Naili, angu ndeweredimieghe kughinywa machi gha moda ghwa Naili anduangi.

²⁵ Matuku mfungade ghikaida nyuma ya BWANA kughukaba ugho moda ghwa Naili.