KUFUMA 6 - Biblia Ilagho Jiboie Kwa Wandu Wose

¹ Ela BWANA ukamzera Musa, “Idana kuchawona seji nichaam'bonya Farao; angu nichamlazimisha uwifunye wandu wapo, ee nichamlazimisha uwiwinge wifume isangenyi jake.”

Mlungu kummbanga Musa

² Nao Mlungu ukamzera Musa, “Ini ne BWANA.

³ Neremfutukieghe Abrahamu, Isaaka, na Jakobo sa Mlungu Uwadie-Ndighi-Rose; ela kwa irina japo ‘BWANA’ serekumanyishireghe kwawo anduangi.

⁴ Wokoni nerebonyereghe ilaghano japo nawo, ja kuwineka isanga ja Kanaani, isanga werejikaieghe kiwughenyi.

⁵ Sena aighu ya agho, namerie kusikira kusirimika kwa wandu wa Israeli; awo wawuyawikwa wuzumbenyi ni Wamisri, nani najikumbuka ilaghano japo.

⁶ Kwa huwu kuwizere wandu wa Israeli, ‘Ini ne BWANA, nani nichamfunya mfume kwa iyo mizigo ya Wamisri, mfume wuzumbenyi ghwawo. Nichamkombua kwa mkonu ghughorokie ghwa ndighi, nani nichawitanya;

⁷ nani nichammbusa mkaie wandu wapo, nani nikaie Mlungu onyu; niko mchamanya angu ini ne BWANA, Mlungu onyu; Uo umfunyire mfume kwa wuzumba ghwa Wamisri.

⁸ Nani nichamreda kwa ijo isanga nereghemieghe kumneka Abrahamu, Isaaka na Jakobo jikaie ifwa jenyu. Ini ne BWANA.’”

⁹ Musa ukawighoria wandu wa Israeli agho malagho, ela ndeweremsikireghe Musa, angu werefueghe ngolo kwa wundu ghwa ugho wuzumba ghwa lung'eto werebonyeroghe.

¹⁰ BWANA ukamzera Musa,

¹¹ “Ngia kumzere Farao, mzuri wa Misri, uwisighe wandu wa Israeli wifume isangenyi kwake.”

¹² Ela Musa ukamzera BWANA, “Zighana wandu wa Israeli weni ndewinisikire ini, da Farao udima kunisikira wada nani ne mundu useichi kudeda?”

¹³ Ela BWANA ukawilaghira Musa na Haruni: “Wizerenyi Waisraeli na mzuri wa Misri kukaia namlaghira kuwilongoza Waisraeli wifume Misri.”

Kinyumba cha Musa na Haruni

¹⁴ Mwana wa imbiri wa Israeli, Reubeni, orekoghe na wadawana bana: Hanoku, Palu, Hezroni, na Kami, niwo wabaa wa kivalwa cha Reubeni.

¹⁵ Simeoni orekoghe na wadawana warandadu; Jemueli, Jamini, Ohadi, Jakini, Zohari, na Shauli; wana wa muka Mkanaani, niwo wabaa wa kivalwa cha Simeoni.

¹⁶ Lawi orekoghe na wadawana wadadu: Gershoni, Kohathi na Merari; niwo wabaa wa kivalwa cha Lawi. Lawi orekoghe na miaka ighana na mirongo idadu na mfungade.

¹⁷ Gershoni orekoghe na wadawana wawi: Libni na Shimei; nawo werekoghe na kivalwa kibaa.

¹⁸ Kohathi orekoghe na wadawana bana: Amramu, Izhari, Hebroni, na Uzieli. Kohathi orekoghe na miaka ighana na mirongo idadu na idadu.

¹⁹ Merari orekoghe na wadawana wawi: Mahli na Mushi. Ivi nivo vichuku va Lawi na kivalwa chawo.

²⁰ Amramu ukalowua mruna-ndee Jakobedi, nao ukamvaia Haruni na Musa. Amramu orekoghe na miaka ighana na mirongo idadu na mfungade.

²¹ Izhari orekoghe na wadawana wadadu: Kora, Nefegi, na Zikri.

²² Uzieli wokoni orekoghe na wadawana wadadu; Mishaeli, Elizafani, na Sithri.

²³ Haruni ukalowua Elisheba mwai wa Aminadabu, nao ni mruna Nashoni; ukamvaia Nadabu, Abihu, Eleazari, na Ithamari.

²⁴ Kora orekoghe na wadawana wadadu Asiri, Elkana, na Abisafu; niwo wabaa wa kichuku chiwaghikie cha Kora.

²⁵ Mwana wa Haruni, Eleazari ukamlowua mwai wa Putieli, nao ukamvaia Finehasi. Awa niwo wabaa wa kinyumba na kichuku cha mbari ya Lawi.

²⁶ Awa niwo weni weke Haruni na Musa werezereloghe ni BWANA, “Muwilongoze wandu wa Israeli wifume Misri.”

²⁷ Awo niwo wandu wereghorieghe na mzuri wa Misri uwilekerie wandu wa Israeli wifume Misri.

Momu ghwa BWANA kwa Musa na Haruni

²⁸ Ijo ituku BWANA oreghorieghe na Musa andenyi ya Isanga ja Misri,

²⁹ oreghambieghe, “Ini ne BWANA; kumghorie mzuri wa Misri malagho ghose nichaakuzera.”

³⁰ Ela Musa ukamzera, “Ola ini ne mundu niseichi kudeda, mzuri uchanisikira wada?”