KUFUMA 34 - Biblia Ilagho Jiboie Kwa Wandu Wose

Vishawalata vizima va magho

¹ BWANA ukamzera Musa, “Dumbua vishawalata viwi va magho, sa vija va imbiri; nani nichaandika malagho agho gherekoghe aighu ya vija vishawalata va imbiri korevibarieghe.

² Kukuwike nicha luma lwa nakesho; kujoke Mghondi ghwa Sinai, kupate kukwana na ini aighu mghondinyi.

³ Kusechanye na mndungi mghondinyi, hata mndungi usewoneke andu kungi kwa ugho mghondi; hata ng'ondi na ng'ombe riselisho aisi ya ugho mghondi.”

⁴ Niko Musa ukadumbua vishawalata viwi va magho sa vija va imbiri, ukawuka kokesho kio, na kujoka Mghondi ghwa Sinai, sa iji koni BWANA oremlaghirieghe; ukidwa ivo vishawalata va magho mkonunyi kwake.

⁵ BWANA ukasea andenyi ya iwingu, ukakaia kimusi andwamweri nao aja, ukajighora irina jake, BWANA.

⁶ Niko BWANA ukaida imbiri kwake ukaghamba, “Ini BWANA, ne Mlungu uchuagha wughoma, mmboa obonya machu, uchuagha lukundo na wuloli.

⁷ Nadakatisha lukundo lwapo kwa maelfu na maelfu gha wandu; nadaleka mawiwi na kaung'a, ela simtalagha mkosi kukaia ndekosere anduangi, hata wana wa wana wawo kuvikia kivalwa cha kadadu na cha kana kwa wundu ghwa kaung'a ra wavi wawo.”

⁸ Musa ukabonya shwa-shwa kughoghoma hata chongo chake chikadunga andonyi, ukatasa.

⁹ Nao ukaghamba, “Ikakaia loli kuboilwagha ni ini ee BWANA, nakulomba kughendanye andwamweri nesi; awa ni wandu wighilikie loli, ela kudileke mawiwi ghedu na kaung'a edu; kurumirie kudiwusa dikaie wandu wako weni.”

Ilaghano kubonywa sena

¹⁰ BWANA ukamzera Musa, “Idana nichabonya ilaghano na wandu wa Israeli. Nichabonya malagho mabaa aghadi kwawo, jingi ghisebonywa ni mndungi ndoenyi kose, hata kwa mbari ingi. Wandu wose wichawona maza mbaa ini BWANA nichaaribonya; nichabonya maza reobosha kwa wundu ghonyu.

¹¹ Kuiwadie memu yapo nichaakuneka idime. Ola, nichawiwinga imbiri kwako Waamori, Wakanaani, Wahiti, Waperizi, Wahivi, na Wajebusi.

¹² Kukulindie kumoni, kusebonye mapatano ghangi na wandu wa isanga kujighendiagha; wisechewuya mdegho konyu.

¹³ Ela mfuchuo madhabahu rawo, na kuchikanya nguro rawo retasa, na kuchikanya fwana ra milungu yawo ya waka Ashera.

¹⁴ Kusaketasa mlungu ghungi mzima, angu ini BWANA ne Mlungu wa iriso.

¹⁵ Kusebonye mapatano ghangi na wandu wa ijo isanga, kwa kukaia ngelo yawo etasa na kuibwaghia milungu yawo vizongona wichamkaribisha mnughane nawo; na aho mchangia matimonyi gheja ivo vindo vawo wivifunyiragha milungu yawo.

¹⁶ Wana wenyu wadima kulowua awo waka wa kighenyi, nawo wicham'bonya msekaie waloli kwapo, hata mdime mwatasa milungu yawo.

¹⁷ “Kusakekubonyera milungu echana na kuitasa.

¹⁸ “Kuiwike Ndima ya Mikate Isewadie Chachu. Na seji nerekulaghirieghe, Kuseje mkate ghuko na chachu kwa matuku mfungade gha mori ghwa Abibu, angu ugho nigho mori korefumieghe Misri.

¹⁹ “Mwana wa womi wa imbiri, na nyamandu efughwa ya womi ya imbiri, richakaia rapo;

²⁰ ela mvalwa wa imbiri wa punda, kuchamkombua na mwana wa ng'ondi. Iji kusemkombue, kumchikanye singo yake na kum'bwagha. Wana wako wa womi wa imbiri kuchawikombua. “Mndungi useche kwapo usedwae ifunyo.

²¹ “Koko na matuku arandadu ghebonya kazi, ela kusebonye kazi ituku ja mfungade, hata ngera ni ngelo relima angu rekuwida.

²² “Kuiwike Ndima ya Makuwido iji kwakakuwida mavalo ghako gha imbiri gha ngano; sena kuiwike Ndima ya Viwanda ngelo ya kutua kwa mwaka, iji kwakakwanya mavalo ghako.

²³ “Wandu wako wa womi wichacha kunitasa mando adadu kwa mwaka, Ini BWANA Mlungu, wa Israeli.

²⁴ Ngameria kuriwinga mbari rose imbiri konyu, na kushabua mano enyu, ndekuchaakaia na mndungi omngiria na kumsima iji muko mkinitasa na kuwika iro Ndima idadu kula mwaka.

²⁵ “Kusefunye mkate ghuko na chachu, iji kwakanibwaghia kizongona; na kilambo chingi cherebwaghiloghe kwa Ndima ya Pasaka chisakesigharika hata nakesho.

²⁶ Kurede mavalo gha imbiri gha mbuwenyi kwako nyumbenyi kwa BWANA Mlungu wako. Kusedoghosanye ndaghina na mariwa gha mae.”

²⁷ BWANA ukamzera Musa, “Andika agha malagho, kwa kukaia nigho gheni naghitumia kwa kubonya ilaghano na oho, na Israeli wori.”

²⁸ Musa ukakaianya na BWANA aho matuku mirongo ina kio na dime, usejie hata kunywa kindo chingi. Ukaandika ijo ilaghano aighu ya vija vishawalata va magho, iyo memu ikumi.

Musa kusea kufuma Mghondi ghwa Sinai

²⁹ Nao Musa ukasea kufuma Mghondi ghwa Sinai, ukidwa mkonunyi kwake iyo Memu Ikumi. Wushu ghwake ghorekoghe ghuking'ala-ng'ala angu orekoghe ukidedanya na BWANA; ela uo moni nderemanyireghe anduangi.

³⁰ Haruni na wandu wose wikamzighana Musa, wikawona wushu ghwake ghuking'ala-ng'ala, nawo wikaobua kumsoghodera.

³¹ Ela Musa ukawiwanga, na Haruni chiaimweri na vilongozi va wandu wikawuya; niko Musa ukadedanya nawo.

³² Konyuma, wandu wose wa Israeli wikamsoghodera Musa, nao moni ukawineka iyo memu yose BWANA oremnekieghe aighu ya Mghondi ghwa Sinai.

³³ Hata iji Musa wameria kudedanya nawo, ukaghufinikira wushu ghwake na kitambaa.

³⁴ Ela iji Musa orekoghe ukingia andenyi ya Hema Ekwania kudedanya na BWANA, orekoghe ukiinja icho kitambaa, hata umerie kudedanya na BWANA. Ela iji wakafuma kuwighoria wandu wa Israeli agho malagho wazerwa,

³⁵ ukakaia ukifinikira wushu ghwake, angu wandu werekoghe wikiwona wushu ghwake ghuking'ala-ng'ala. Ukaghufinikira hata ituku wakawuya kudedanya na BWANA.