KUFUMA 33 - Biblia Ilagho Jiboie Kwa Wandu Wose

BWANA kuwilaghira Waisraeli wifume Mghondi ghwa Sinai

¹ BWANA ukamzera Musa, “Fuma andu aha, andwamweri na wandu korewiredieghe kufuma Misri, kuwighenje jija isanga neremlaghirieghe Abrahamu, Isaaka, na Jakobo ngighamba angu nichajineka kivalwa chake.

² Nichamduma malaika wapo, upate kumghenja; nani nichawiwinga Wakanaani, Waamori, Wahiti, Waperizi, Wahivi, na Wajebusi.

³ Muaghenda isanga jinorie nandighi; ela ini sichaaghendanya nenyo, nichemmeria chienyi; kwa kukaia inyo mo wandu mghilikie.”

⁴ Wandu wiendasikira agho malagho ghizamie, wikalila kwa wasi, hata ndewererwaeghe mapambo gha zoghori anduangi.

⁵ Kwa kukaia BWANA orekoghe wamlaghira Musa uwizere huwu, “Inyo mo wandu mghilikie, ngaghendanya nenyo kwa ngelo vui tu, nichammeria. Idana injenyi putu mapambo ghenyu gha zoghori, ima nimanye seji nichaam'bonya.”

⁶ Kwa huwo, wandu wa Israeli weresighieghe putu kurwa mapambo gha zoghori, nyuma ya kufuma Mghondi ghwa Sinai.

Hema Ekwania

⁷ Ngelo rose wandu wa Israeli werebonyereghe kambi, Musa orekoghe ukidwa Hema ya Wueli na kuidunga shighadi kakula na kambi ukaiwanga, Hema Ekwania. Mndungi ukakaia na ilagho jemkotia BWANA, orekoghe ukighenda shighadi ya Hema Ekwania.

⁸ Ngelo rose Musa orekoghe ukighenda cha hemenyi, wandu wose werekoghe wikiwuka kimusi, kula umu mnyangonyi ghwa hema yake; ukimzighanira Musa hata wameria kungia hemenyi.

⁹ Nyuma ya Musa kungia Hemenyi, nguro ya iwingu erekoghe ikisea na kumanga mnyangonyi ghwa Hema; na BWANA orekoghe ukighora na Musa.

¹⁰ Wandu wose wikameria kuwona ija nguro ya iwingu yamanga mnyangonyi ghwa Hema, werekoghe wikiwuka kimusi na kutasa, kula mundu hemenyi kwake.

¹¹ Huwo BWANA ukaghora na Musa wushu kwa wushu sa iji koni mundu udedanyagha na mghenyi wake. Na iji Musa wakawuya cha kambinyi, Joshua mwana wa Nuni, mdumiki wake, orekoghe ukisigharika andenyi ya Hema.

BWANA kufunya ilaghiro jekaianya na wandu wake

¹² Musa ukamzera BWANA, “Loli kwanizera niwilongoze wandu awa hata jija isanga, ela ndekunighorie uo mundu dichaakaianya ngiwilongoza; sena kwanizera wei kwaniichi na sena kwaboilwagha ni ini.

¹³ Idana nakulomba, ikakaia loli kuboilwagha ni ini, kuniwonyere chia rako idana, nipate kukumanya oho, na oho kuboilo ni ini. Sena kuitale mbari ihi kukaia, ni wandu wako.”

¹⁴ BWANA ukaghamba, “Ini nichaghedanya na oho, nani nichakuhoresha.”

¹⁵ Musa ukatumbulia, “Ikakaia kuseghendanyagha nesi, kusakedifunya andu aha.

¹⁶ Angu ichamanyika wada ngera loli kwaboilwagha ni ini na wandu wako? Welee, si iji oho kwaghendanya nesi, siko aho dichaamanyika nicha ini chiaimweri na wandu wako, kwa wandu wose wiko ndoenyi anguwada?”

¹⁷ BWANA ukamzera Musa, “Nichabonya ijo ilagho jeni kwanilomba angu kuniboiagha; sena nakuichi loli kwa irina jako.”

¹⁸ Musa ukaghamba, “Nakulomba kuniwonyere wubaa ghwako.”

¹⁹ BWANA ukamtumbulia, “Nichaghubonya wucha ghwapo ghose ghukirie imbiri kwako, nani nichajighora irina japo ja wueli ‘BWANA’ imbiri kwako. Nadawifuya wughoma na kuwiwonyera mvono awa niwikundagha.

²⁰ Ela ndekuchaaniwona wushu ghwapo, kwa kukaia ndekuwadie mndungi udimagha kughuwona wushu ghwapo nao ukaie moyo.”

²¹ BWANA ukaghamba, “Ghoko wulalo aha kaavui nani, kudimagha kukaia kimusi aighu ya igho.

²² Na iji wubaa ghwa mwengere ghwapo ghwakaida, nichakungira a lukororonyi lwa igho; nani nichakufinikira kwa mkonu ghwapo, hata nameria kuida;

²³ niko aho nichainja mkonu ghwapo, na oho kuchawona mghongo ghwapo, ela wushu ghwapo ndekuchaaghuwona anduangi.”