KUFUMA 31 - Biblia Ilagho Jiboie Kwa Wandu Wose

Mafundi webonya Hema Ekwania

¹ BWANA ukamzera Musa,

² “Ola namsaghua Bezaleli mwana wa Uri, wawae Huri, kufuma kwa mbari ya Juda;

³ nani namchura Roho wa Mlungu, wuya, na kumanya, na wufundi ghwa vilambo va mbari rose;

⁴ ukaie na akili ebonya michoro echana vilambo va dhahabu, feza, na shaba;

⁵ kudumbua vilambo va lulu, na kuwacha mbau, na kula kilambo chebonywa kwa wuya.

⁶ Sena namsaghua Oholiabu mwana wa Ahisamaki, kufuma kwa mbari ya Dani, upate kubonya kazi andwamweri nao. Wandu wose wiko na wuya na akili, nawineka kudima; wipate kubonya vilambo vose nerekulaghirieghe.

⁷ Hema Ekwania, Sanduku ya Ilaghano na kilemeko charo, na vilambo vose va Hema;

⁸ meza na vilambo varo, kilambo chewikiria taa cha dhahabu na vilambo varo, madhabahu efukiria marumba;

⁹ madhabahu ekoria vizongona na vilambo varo, beseni ekuoghoshera na kilambo charo cheimangisha;

¹⁰ nguwo rilukilo nicha, iro nguwo ra wueli ra mkohani Haruni, na nguwo ra wana wake, kwa wundu ghwa wudumiki ghwawo ghwa wukohani;

¹¹ mavuda ghedunga wandu, mranganyo ghwa marumba mecha kwa wundu ghwa Andu kwa Wueli. Awo wandu wikakabonya vilambo ivo vose, wibonye sa iji koni nerekulaghirieghe.”

Ituku ja kuhora ja Sabato

¹² Nao BWANA ukamzera Musa,

¹³ “Kuwizere wandu wa Israeli, ‘Muiwadie Sabato, ijo ituku japo jehora, angu ni alama ewonyera aghadi yapo na inyo, vivalwa venyu vose, mpate kumanya angu ni ini BWANA nimueleshagha inyo.

¹⁴ Suti muiwadie Sabato, angu ni ituku ja wueli. Uo ose uilushagha uchabwaghwa, na uo ose ubonyagha kazi ituku ijo, uchainjwa kwa wandu wake.

¹⁵ M'bonye kazi kwa matuku arandadu, ela ituku ja mfungade ni Sabato ehora ielie kwa BWANA. Uo ose uchaabonya kazi ituku ijo, uchabwaghwa.

¹⁶ Kwa huwo wandu wa Israeli wichajiwika ituku iji ja Sabato kukaia alama ya ilaghiro na kujitala kwa vivalwa vawo vose.

¹⁷ Ni alama ya kala na kala aghadi ya wandu wa Israeli na ini; angu Ini BWANA nereumbieghe mlungunyi na ndoenyi kwa matuku arandadu, na ituku ja mfungade ngarisigha kazi, ngahoresha.’”

¹⁸ Niko iji Mlungu wameria kudedanya na Musa aighu ya Mghondi ghwa Sinai, ukamneka vishawalata viwi va magho, viko na memu uiandikie moni kwa chala chake.