KUFUMA 29 - Biblia Ilagho Jiboie Kwa Wandu Wose

Mawiko ghewibonya Haruni na wana wake wakfu

¹ “Huwu niko kuchaabonya kwa kuwiwika wakfu Haruni na wana wake, wipate kunidumikia kwa wukohani: Kuchawada mwana wa njau, na bauru iwi risewadie itiko;

² kuboise mikate isewadie chachu kwa mufu ghuboie, na maamuri ghisewadie chachu ghiboisiro kwa mavuda gha zeituni; na skozi rishingilo mavuda.

³ Kuikumbirie kikapunyi, nao kuvirede kwapo ngelo efunya iyo njau na iro bauru iwi.

⁴ “Kumrede Haruni na wana wake mnyangonyi ghwa Hema Ekwania, na kuwioghosha kwa machi.

⁵ Nao kumrushe Haruni nguwo ra wukohani: Ijoho, naivera, iamba jerwalwa naighu ya naivera, kisibau cha laghenyi, na mshipi ghulukilo nicha ghofunga naivera.

⁶ Kumngire kiremba, nao kumfunge chija kibau chikotero mbari, ‘MWELI KWA BWANA.’

⁷ Kuwade mavuda ghewika wakfu, kumdirie chongonyi kwake, na kumshinga mavuda.

⁸ “Kurede wana wake, kuwirushe majoho.

⁹ Kuwifunge mishipi viwonunyi kwawo, na kofia kuwingire vongonyi kwawo. Huwo niko kuchaawibonya na kuwiwika wakfu Haruni na wana wake; nawo wichanidumikia andwamweri na kivalwa chawo kwa kala na kala.

¹⁰ Kurede njau imbiri ya Hema Ekwania, nao kumzere Haruni na wana wake wiwikirie mikonu yawo aighu ya chongo chake.

¹¹ Na oho kuchaibwagha iyo njau imbiri ya BWANA, mnyangonyi ghwa Hema Ekwania;

¹² kuwade bagha imu ya njau na chala chako, kuishinge mbembe ra madhabahu; iyo bagha yasigharika, kuidunge kondonyi madhabahunyi.

¹³ Konyuma, kuchawada mavuda gha vindo va ndenyi; andu kuboie kwa idima, na mavuda gharo nao kurikore aighu ya madhabahu rikaie ifunyo kwapo.

¹⁴ Ela iyo nyama ya njau yose, mrongo ghwake, vifu na mawula ghake, kuchavikora shighadi ya mbenge. Mafunyo agha ni gheinja kaung'a ra wakohani.

¹⁵ “Sena kuwade imu ya iro bauru, kumzere Haruni na wana wake wiwikirie mikonu yawo chongonyi kwa iyo bauru.

¹⁶ Nao kuibwaghe, kudo bagha yake na kuimichira chuwaru rose inya ra madhabahu.

¹⁷ Kuibare iyo bauru vipande vipande, kuoghoshe vindo vake va ndenyi, na maghu gharo, nao kuviwikanye chiaimweri na chongo chake.

¹⁸ Niko kuikore yose aighu ya madhabahu, ikaie kizongona chekora. Irumba ja kizongona icho, janiboiagha na ndighi.

¹⁹ Niko kuiwade iyo bauru ya kawi nao kumzere Haruni na wana wake wiwikirie mikonu yawo aighu ya chongo chake.

²⁰ Kuibwaghe iyo bauru, nao kuwuse bagha yaro na kuishinga midonyi ya madu gha kiwomi gha Haruni na wana wake, vala vawo va kighosi va kiwomi, na mano ghawo gha kighosi gha kiwomi; nao kuimichire iyo bagha yasigharika chuwaru rose inya ra madhabahu.

²¹ Niko kuchawada bagha imu iko madhabahunyi, na mavuda ghewika wakfu, kurimichire nguwo ra Haruni na ra wana wake, nawo chiaimweri na nguwo rawo wichawikwa wakfu kwapo.

²² “Kudumbuo mavuda gha munda ghwa bauru, na ilala ja mavuda gha vifu, na kipande cha idima, figho iwi na mavuda gharo, na bara ya mkonu ghwa kiwomi (angu ni bauru yawikwa kwa kazi ewika wakfu.)

²³ Nao kufunye mkate ghumweri kufuma kikapunyi cha iyo mikate erefunyiroghe kwapo, iyo isewadie chachu, na skozi iko na mavuda, na iamuri.

²⁴ Kuviwikirie vindo ivo vose mikonunyi kwa Haruni na wana wake, wipate kuvifunya kwapo sa manosi mecha.

²⁵ Nao sena kuviwuse kwawo, kuvikore aighu ya madhabahu kuchuria icho kizongona chekora, vipate kukaia kwapo, kizongona cha vindo. Irumba ja kizongona ichi janiboiagha na ndighi.

²⁶ “Kuwade nyama ya lagha ya iyo bauru emmbika Haruni wakfu, kuisughuse ikaie kizongona chesughuswa chifunyo kwa BWANA nayo ichakaia iwaghio jako.

²⁷ “Iji mkohani wawikwa wakfu, kidari na bara ya bauru vatumilwa kwa kum'bonya wakfu, vichafunywa kwapo vikaie manosi mecha; ima sena viwikilo mbai kwa wundu ghwa Haruni na wana wake.

²⁸ Vichawuya va Haruni na wana wake, ni manosi gha toe kufuma kwa wandu wa Israeli. Ivo vizongona vichawuya ifungu ja wakohani, vifunywagha ni wandu wa Israeli; ni vizongona vawo vifunywagha kwa BWANA.

²⁹ “Marwao gha wueli gha Haruni, ghichanekwa wana wake nyuma ya kufwa kwake; wipate kughirwa iji wakashingwa mavuda ngelo ewikwa wakfu.

³⁰ Mwana wa Haruni, uo uchaawada wudumiki ghwake ghwa wukohani, na kungia andenyi ya Hema Ekwania, upate kudumika andenyi ya Andu kwa Wueli, ucharwa agho marwao kwa matuku mfungade.

³¹ “Kuwade iyo nyama ya bauru eretumiloghe kwa kum'bonya Haruni na wana wake wakfu, nao kuidoghose andenyi ya andu kuelie.

³² Nawo wichaija mnyangonyi ghwa Hema Ekwania, chiaimweri na mkate ghusigharikie kikapunyi.

³³ Wichaja ivo vindo verefunyiroghe kwa wundu ghwa wukomboli, ngelo werewikwagha wakfu kwa iyo kazi ya Wueli. Mndungi mzima usakeja ivo vindo, ela wakohani weni, angu ni vindo va Wueli.

³⁴ Nyama ingi angu mkate ghungi ghwa ivo vindo, vikasigharika hata ituku ja kawi, vichakorwa; ndevichaajighwa anduangi, kwa kukaia ni vindo va Wueli.

³⁵ “Huwo niko kuchaawibonya Haruni na wana wake, sa iji koni nakulaghira. Kuwiwike kwa iyo kazi ya Wueli, na kuwibonya wakfu kwa matuku mfungade.

³⁶ Kufunye njau kula ituku ikaie kizongona cha wukomboli, kaung'a ripate kulekwa. Aho kuchafunya kizongona kwa kuelesha madhahabu, na kuishinga mavuda gha zeituni ikaie ielie.

³⁷ Kubonye huwo kwa matuku mfungade, niko iyo madhabahu ichaaeleshwa putu; hata ichakaia angu icho chose chichaadada madhabahu, chichaeleshwa.

Mafunyo gha ituku ituku

³⁸ “Kula ituku kuchakaia kukifunya kizongona cha wana wa ng'ondi wawi wa mwaka ghumweri ghumweri aighu ya madhabahu.

³⁹ Kuchafunya kizongona mwana wa ng'ondi umweri nakesho, na mwana wa ng'ondi umweri nakenyi.

⁴⁰ Mwana wa ng'ondi wa imbiri, kumfunyanye na kilo imweri ya mufu ghwa ngano ghuboie, ghuranganyiro na lita imweri ya mavuda; na lita imweri ya divei ikaie ni kizongona chenywa.

⁴¹ Mwana wa ng'ondi wa kawi kumfunye kizongona nakenyi, na vipimo vija veni va mufu, mavuda, na divei; seji kubonyereghe nakesho. Agho ghichakaia kizongona cha vindo kwapo. Irumba jaro janiboiagha na ndighi.

⁴² Kizongona chekora chichafunywa tulituli imbiri kwapo mnyangonyi ghwa Hema Ekwania. Aho niko nichaakwana na kughora na oho.

⁴³ Nichakwana na wandu wa Israeli aho; na wubaa ghwapo ghuchakubonya andu aho kukaie Kuelie.

⁴⁴ Nichaielesha Hema na madhabahu, nani nichawiwika Haruni na wana wake wikaie wadumiki wapo kwa wukohani.

⁴⁵ Nani nichakaia aghadi ya wandu wa Israeli, na kukaia Mlungu wawo.

⁴⁶ Wichamanya angu Ini ne BWANA Mlungu wawo, Uo orewifunyireghe Misri, nipate kukaia aghadi kwawo. Ini ne BWANA Mlungu wawo.