KUFUMA 28 - Biblia Ilagho Jiboie Kwa Wandu Wose

Marwao gha Wakohani

¹ “Kumrede mwanyinyu Haruni na wana wake kaavui na oho. Haruni na wana wake; Nadabu, Abihu, Eleazari, na Ithamari; kuwitenge aghadi ya Waisraeli wipate kunidumikia kwa kazi ya Wukohani.

² Kubonye marwao gha Wueli gha wukohani kwa wundu ghwa mwanyinyu Haruni; marwao ghighokie gha wubaa.

³ Kuwange wandu wose wiko na hikima awo niwinekie wuya; kuwizere wibonye nguwo ra Haruni, upate kuwikwa wakfu kwa wudumiki ghwa wukohani.

⁴ Nguwo wichaaribonya ni iri: Kisibau cha laghenyi, naivera, ijoho, ikoti jitolelo, kiremba, na mshipi. Wicham'bonyera Haruni na wana wake nguwo iri ra wueli, wipate kunidumikia kwa wukohani.

⁵ Awo waluki wichatumia uzi wa buluu, na wa zambarau, na wa ngundu, na uzi wa dhahabu, na kitani iboie ilukilo nicha.

⁶ “Iyo naivera wichaibonya ya uzi wa buluu, na wa zambarau, na wa ngundu, na kitani iboie ilukilo nicha.

⁷ Wichabonya vibandiko viwi va maongenyi, na kuvidunga kwa kula luwaru lwa maongenyi gha naivera.

⁸ Wichabonya mshipi, ghulukilo nicha kwa vija vilambo veni va dhahabu, buluu, zambarau, sufu ya ngundu na kitani iboie ilukilo nicha na kughukwanya na iyo naivera.

⁹ Kuwuse magho awi gha zoghori mbaa gha oniksi; kukote aighu yaro marina ikumi na awi gha wana wa Israeli.

¹⁰ Marina arandadu kwa igho jimu, na marina arandadu kwa igho ja kawi; kunughana na kuvalwa kwawo.

¹¹ Kuandike marina ikumi na awi gha wana wa Israeli aighu ya agho magho kwa kughikota, seji fundi wa lulu ubonyagha mihuri, na kushinga iro mbari dhahabu.

¹² Kuwikirie agho magho aighu ya vija vibandiko vishonelo na kukwanywa maongenyi gha ija naivera, ghipate kukaia lukumbuso lwa mbari ikumi na iwi ra Israeli. Haruni uchaghiduka agho marina maongenyi kwake, eri Ini BWANA, niwikumbukeghe wandu wapo ngelo rose.

¹³ Na oho kuchabonya magho awi gha dhahabu;

¹⁴ kughiwadanishe na tiwina iwi rilukilo ra dhahabu.

Kisibau cha laghenyi

¹⁵ “Kubonye kisibau cha laghenyi cha Mkohani M'baa, chetumilwa ngelo edumbua malagho gha lukundo lwa Mlungu. Vilambo kwavitumia kwa kubonya naivera nivo veni kuchaavitumia ngelo ya kuchibonya; va dhahabu, va buluu, va zambarau va uzi wa ngundu, na kitani iboie ilukilo.

¹⁶ Chichakaia chikuchiro chikatane, mbembe rose, sentimeta mirongo iwi na iwi kwa mirongo iwi na iwi.

¹⁷ Kuikande mapambo gha magho gha zoghori zaria inya, luzaria lwa imbiri, magho gha rubi, magho gha topazi, na gha garineti;

¹⁸ luzaria lwa kawi, magho gha zumaridi, gha samawi, na gha almasi;

¹⁹ luzaria lwa kadadu, gha hiakintho, gha ngundu, na gha amethisto;

²⁰ na luzaria lwa kana, gha zaberaji, gha Shohamu, na gha jasipi. Magho agho gha zoghori ghichakandwa aighu ya kilambo cha dhahabu.

²¹ Aighu ya agho magho gha zoghori ikumi na awi, kuchakota marina ikumi na awi gha wana wa Israeli; ghipate kuwonyera mbari ikumi na iwi ra Israeli.

²² Kubonye tiwina ra dhahabu ielie, rilukilo sa kamba kwa wundu ghwa icho kisibau cha laghenyi.

²³ Kubonye pete iwi ra dhahabu, kurifunge kwa iro kona ra ighu ra icho kisibau;

²⁴ nao kufunge iro tiwina iwi ra dhahabu kwa iro pete iwi.

²⁵ Kutuonyi kumu kwa iro tiwina iwi, kukufunge na ghaja magho awi; kwa chia iyo, kuchaghikwanya na vija vibandiko vidungilo maongenyi gha naivera.

²⁶ Sena kubonye pete iwi ra dhahabu, kurifunge mbembenyi ra naisi ra icho kisibau cha laghenyi, riko nandenyi aja kukwane na naivera.

²⁷ Kubonye pete rimu iwi ra dhahabu, kurikwanye na imbiri ya vija vipande va maongenyi nandonyi kutuonyi kwa vija vipande vikwanyiro na naivera, naighu ya ghuja mkowa ghulukilo nicha ghwa naivera.

²⁸ Iro tiwina richafungana na kisibau cha laghenyi na tiwina ra naivera kwa kamba ya buluu; eri kisibau cha laghenyi chipate kumanga naighu ya mkowa, chisesosoloke na kusigha naivera.

²⁹ “Iji Haruni wakangia andenyi ya Andu kwa Wueli, ucharwa icho kisibau cha laghenyi, chiko na marina ikumi na awi gha wana wa Israeli, na Ini BWANA nichakaia ngiwikumbuka wandu wapo.

³⁰ Kungire Urimu na Thumimu andenyi ya kisibau cha laghenyi, Haruni upate kuridwa laghenyi kwake, iji wakangia andenyi ya Andu Kwapo kwa Wueli. Ngelo rose uchakaia ukirwa icho kisibau cha laghenyi, upate kutanya malagho gha lukundo lwapo kwa wandu wa Israeli.

Marwao mazima gha Wakohani

³¹ “Jija ijoho jerwalwa naighu ya naivera, suti jose jikaie ja uzi wa buluu.

³² Singonyi kwaro kuchabonya mishono kwa uzi ulukilo, eri isecherashuka.

³³ Kungire ndembe ra mkomamanga hemunyi kwaro, ra buluu, zambarau, na ra uzi wa ngundu; njugha ra dhahabu rikikaia ghadi na ghadi ya iro ndembe;

³⁴ njugha ya dhahabu na ndembe ya mkomamanga, njugha ya dhahabu na ndembe mkomamanga andenyi ya hemu ya ijo ijoho kujimara chia rose.

³⁵ Haruni uchakaia ukirwa ijo ijoho ngelo engia kwa wudumiki. Hata iji wakangia aja Andu kwa Wueli imbiri kwapo, na ngelo wakafuma, iro njugha richakaia rikisikirika, eri usechefwa.

³⁶ “Kubonye kibau cha dhahabu ielie, nao kuchikote mbari ra dhahabu sa muhuri riandikilo ‘MWELI KWA BWANA.’

³⁷ Nao kuchifunge na imbiri ya kiremba kwa kamba ya buluu.

³⁸ Haruni uchakaia ukichirwa icho kibau chamunyi kwake, upate kudwa wuwiwi ghwa wandu; eri Ini BWANA nipate kughirumiria mafunyo ghose gha wueli nichaafunyirwa ni Waisraeli, hata ngera wabonyere kaung'a ngelo efunya agho mafunyo.

³⁹ “Kuluke ijoho ja Haruni jitolelo kwa kitani ndicha, sena kubonye kiremba cha kitani ndicha, na kamba yaro itolelo nicha.

⁴⁰ “Kuwibonyere wana wa Haruni majoho, mishipi, na kofia, wipate kukaia na wubaa, na kughoka.

⁴¹ Kumrushe mwanyinyu Haruni na wana wake agho marwao, nao kuwidunge mavuda na kuwiwika wakfu kwa wundu ghwa wudumiki ghwa wukohani.

⁴² Sena kuwibonyere weke mwadeghu wa kitani ndicha, kufuma kiwonunyi hata barenyi; wipate kufinikira wuduu ghwawo.

⁴³ Suti Haruni na wana wake wiro awo weke mwadeghu iji wakangia Hema Ekwania, angu madhabahunyi, wikinidumikia andenyi ya aho Andu kwa Wueli; eri wisechebwaghwa kwa kughuwonyera wuduu ghwawo. Iji ni ilaghiro ja toe kwa Haruni na wana wake.