KUFUMA 23 - Biblia Ilagho Jiboie Kwa Wandu Wose

Wuloli na hachi

¹ “Kuseereshe malagho gha tee, hata kusemtesie mundu mmbiwi kwa kufunya wushuhuda ghwa tee.

² Kusenughe wungi ghwa wandu kwa kubonya wuwiwi, hata kusakefunya wushuhuda mwandunyi kukinugha wungi ghwa wandu kwa kuilaghasha loli;

³ hata kusakemdawiria mkiwa kwa malagho ghwa mwandu ghwake.

⁴ “Kukakwana na ng'ombe angu punda wa m'maiza wako walaghaya, kummbunjire.

⁵ Kukamkua punda wa mundu uzamilwagha ni oho waghushwa ni msigo ghwake, kummbusire kusakemuida.

⁶ “Kuselaghashe hachi ya mkiwa iji wacha kotinyi.

⁷ Kusakereda mashitakio gha tee, hata kusemmbwaghe mundu usewadie ikosa angu mhachi; kwa kukaia nichamtanya kula umu ubonyagha wuwiwi ugho.

⁸ Kuserumirie kuhongwa; angu kuhongwa kwadabwagha meso, mundu usewone agho ghiko gha hachi, upate kulaghasha hachi ya mundu uko mloli.

⁹ “Kusemkite mghenyi; oho kwaichi seji wughenyi ghuko, angu korekoghe mghenyi isanga ja Misri.

Mwaka ghwa mfungade na ituku ja mfungade

¹⁰ “Kulime mbuwa yako kwa miaka irandadu na kukuwida mavalo gharo;

¹¹ ela mwaka ghwa mfungade kuisighe ilale. Kusekuwide kindo chingi chabuka aho; eri wakiwa wa wandu widime kuja icho chizoghuagha, na nyamandu ra isakenyi rije masighariko gharo. Kubonye woruwo kwa mbuwa yako ya mzabibu na mbuwa yako ya mzeituni.

¹² “Kubonye kazi kwa matuku arandadu, ela ituku ja mfungade kusebonye kazi ingi, eri mzumba na mghenyi ukudumikiagha, hata na nyamandu rako wori ripate kuhora.

¹³ Kughilindie agho ghose nakuzera, hata kusaketasa milungu mizima, hata marina ghawo ghisesikirike momunyi kwako.

Ndima mbaa idadu

¹⁴ “Kula mwaka kubonye ndima idadu kwa ishima japo.

¹⁵ Mori ghwa Abibu, ugho korefumieghe Misri, kunibonyere Ndima ya Mikate Isewadie Chachu, seji nerekulaghirieghe. Kuseje mkate ghungi ghuko na chachu ngelo ya ndima iyo kwa matuku mfungade. Mndungi useche kunitasa usedwae mafunyo.

¹⁶ “Iji kwakuwida viro va mavalo ghako gha imbiri, kubonye Ndima ya Makuwido. Mori ghotumbanya viro kutua kwa mwaka, kubonye Ndima ya Viwanda; iji kwakuwida matunda gha zabibu, na matunda mazima.

¹⁷ Kula mwaka, kwa iri ndima idadu, wandu wako wa womi wichacha kunitasa Ini BWANA Mlungu.

¹⁸ “Kusefunye mkate ghungirilo chachu ngelo ebwagha kizongona; hata kusesighe mavuda gha nyamandu rifunyiro kizongona kwapo ngelo ya ndima iri, ghikaie hata nakesho.

¹⁹ “Kula mwaka, kurede nyumbenyi kwa BWANA Mlungu wako, mavalo gha imbiri gha makuwido ghako. “Kusedoghose ndaghina ya mburi andenyi ya mariwa gha mae.

Malaghiro na Mawonyero

²⁰ “Ola namduma malaika imbiri kwako, ukulindie iji kuko charonyi, na kukureda isangenyi nerekuboisireghe.

²¹ Mkulindie, mumsikire. Msakemlegha; kwa kukaia ni ini namduma; angu ndechaamfuya wughoma agho makosa ghenyu.

²² Ela kukamsikira na kubonya agho nikulaghiragha, nichalwa na wamaiza wako wose.

²³ Malaika wapo uchamkiria, na kumghenja isanga ja Muamori, Mhiti, Mperizi, Mkanaani, Mhivi na Mjebusi; nani nichawitotesha.

²⁴ Msakeghoghoma kuitasa milungu yawo, hata msakenugha mizango yawo ya dini; ela mchanona na kuchikanya putu andu kwawo kotasira.

²⁵ Mkanitasa Ini BWANA Mlungu onyu, nichamrasimia kwa vindo na machi, na kuinja makongo ghenyu ghose.

²⁶ Muka ungi ndechaafumwa ni kifu isangenyi kwako, hata ungi ndechaasowa wana anduangi; na mtalo ghwa matuku ghako nichaghukatisha.

²⁷ “Nichawingira kiture wandu wikutangalagha oho, na kuwikambira chongo wandu wilwagha na oho; nani nichawibonya wamaiza wako wose wikimbie imbiri kwake.

²⁸ Nichaduma ngalamvu rikirie imbiri konyu, ripate kuwiwinga Wahivi, Wakanaani, na Wahiti wifume imbiri konyu.

²⁹ Sichaawiinja kwa mwaka ghumweri; angu ngabonya huwo, isanga jichasighwa; iduu, na nyamandu ra isakenyi richachurikia na kukaia na ndighi aighu konyu.

³⁰ Ela nichawiinja watini-watini, hata mwachurikia wekata kujikaia ijo isanga.

³¹ Nichawika mano ya isanga jenyu, kufuma Bahari ya Shamu hata Moda ghwa Eufrate; sena kufuma Bahari ya Mediterania hata kireti. Nichamneka ndighi aighu ya waja waisanga, nenyo mchawifunya seji mchaadima.

³² Msebonye mapatano ghangi nawo, hata na milungu yawo.

³³ Msewisighe awo wandu wikaie isangenyi konyu; kwa kukaia mkawisigha wichamshekeria munibonyere kaung'a. Mkatasa milungu yawo, kwa loli ichawuya mdegho konyu.”