KUFUMA 21 - Biblia Ilagho Jiboie Kwa Wandu Wose

Malagho ghewibonyera wazumba

¹ “Idana kuwineke Waisraeli malaghiro agha:

² Kukamghua mzumba wa Kiebrania, uchakudumikia miaka irandadu. Mwaka ghwa mfungade, kuchamsigha ughende kuseko na malipo ghangi.

³ Ikakaia kodemghua uselowue, uchaghenda usena muka, na ikakaia kodemghua ulowue, uchaghendanya na muka wake.

⁴ Ikakaia BWANA wake odemlowora muka, nao ukamvaia wana wa womi angu wa waka, uja muka na wana wake wichawuya wa uja BWANA; uja mundu uchaghenda uekeri.

⁵ Ela iji uja mzumba waghamba worinyi, ‘Namkunde BWANA wapo, muka wapo, na wana wapo, sikunde kughenda;’

⁶ niko BWANA wake uchamghenja kwa Mlungu, mnyangonyi ghwa nyumba etasira, nao uchamturua kudu kwake na uma; nao uchamdumikia irangi jake jose.

⁷ “Mundu ukamuuza mwai wake ukaie mzumba, ndechaasighwa ughende karakara na wazumba wa kiwomi.

⁸ Ikakaia usem'boiagha bwana wake uo oremsaghueghe uumbuse, uchamsigha ukombolo ni ndee uja mwai; uja bwana ndechaakaia na hachi emuuza kwa wandu wa kighenyi anduangi, angu usem'bonyere agho ghiko gha hachi.

⁹ Ikakaia odemsaghua kwa wundu ghwa mwana wake wa womi, ucham'bonyera karakara na mwana wake wa waka.

¹⁰ Ikakaia walowua muka mzima, ndechaampunguzira uja muka wa imbiri vindo vake, na nguwo rake, hata hachi rake ra kulowolwa.

¹¹ Iji walemwa ni kumkatishira ivo vilambo vidadu, uchamsigha ughende duu kuseko na kulipwa pesa.

Sharia aighu ya mabonyo gha ndighi

¹² “Uo ose uchamkaba mundu na kum'bwagha, uchabwaghwa.

¹³ Ela ikakaia odem'bwagha kwa ndengwa, uchakimbiria andu nichaamsaghuya.

¹⁴ Na ikakaia mndungi wam'bwagha mundu kwa kidali, hata ngera wakimbiria madhabahunyi kwapo kwa wusalama, uchabwaghwa.

¹⁵ “Uo ose uchaamkaba ndee angu mae, uchabwaghwa.

¹⁶ “Uo ose uchaamuiwa mundu kwa kukunda kumuuza, angu kummbika ukawadwa, uchabwaghwa.

¹⁷ “Uo ose uchaamdukana ndee angu mae, uchabwaghwa.

¹⁸ “Iji wandu warashana, na umu umlase mmbao na igho, angu kumkaba na ngonde, nao ikaie ndem'bwaghie, ela wakaia olala wulinyi;

¹⁹ iji wawuka, na ukaie oghenda kwa kuteselwa ni mzata, uo mundu oremkabieghe uchalipa ngelo rake rose orekoghe wulinyi, na kumtesia hata waboa putu.

²⁰ “Mundu ukamkaba mzumba wake wa womi angu wa waka kwa zobo hata ufo, uchanekwa adhabu.

²¹ Ela ikakaia uja mzumba wakaia usefue ituku ja imbiri hata ja kawi, uja BWANA ndechanekwa adhabu ingi, angu uja mzumba ni mali yake.

²² “Wandu wawi wikawoka kulwa, nao wimtike muka uko na kifu hata icho kifu chake chikuke, ela ndevavirikie andu kungi kuzima, uo mundu wamtika uchatozwa faini iyo yose ichaalombwa ni mumi wa uja muka; nao uchalipa kunughana na ifungu jadumbulwa ni watanyi.

²³ Ela ikakaia uja muka washoghonoka, ikabo jichakaia irangi kwa irangi;

²⁴ iriso kwa iriso, ighegho kwa ighegho; mkonu kwa mkonu, kughu kwa kughu;

²⁵ kukora kwa kukora; kushoghonua kwa kushoghonua; na kuvonua kwa kuvonua.

²⁶ “Iji mndungi wamkaba mzumba wake wa womi angu wa waka iriso na kujibara, uchamlekeria ukaie huru kwa wundu ghwa iriso jake.

²⁷ Ukamkua mzumba wake ighegho wa womi angu wa waka, uchamlekeria ukaie huru kwa wundu ghwa ighegho jake.

Agho ghebonya gha mundu wa kilambo chake

²⁸ “Iji ng'ombe ya mndungi yamringa mundu nao ufo, ichalaswa na magho, na nyama yake ndeichaajighwa anduangi; ela mundu wa njau iyo ndechaabonywa ilagho jingi.

²⁹ Ela ikakaia iyo ng'ombe edeeka ikiringa wandu, na mundu waro ukamanyishwa, nao ukalegha kuifunga; iyo ng'ombe ikaringa mndungi wa womi angu wa waka hata ufo; iyo njau ichalaswa na magho, na mundu waro wori uchabwaghwa.

³⁰ Ukarumirilwa kulipia irangi jake, uchalipa icho chose chichaalombwa kwa kujikombua irangi jake.

³¹ Iji njau yabwagha mwana wa mundu wa womi wori angu wa waka, sharia ija cheni ichatumilwa.

³² Ng'ombe ikabwagha mzumba wa womi angu wa waka; mundu wa njau uchamlipa BWANA wa mzumba wa womi vibelele mirongo idadu va feza; na ng'ombe ichabwaghwa kwa kulaswa magho.

³³ “Mundu ukasigha kina chiari, angu kukota kina na kuchisigha chisefinikiro, ng'ombe angu punda ikachunukia andenyi;

³⁴ mundu wa kina icho uchaboisa ilagho ijo kwa kumlipa mundu wa nyamandu pesa; nao moni uchawusa iyo nyamandu yafwa.

³⁵ Njau ya mndungi ikashoghonua na kubwagha njau ya mmbao, awo wandu wichauza ija ng'ombe iko moyo, na kuwagha pesa karakara sena wichawagha nyama ra iyo ng'ombe yafwa karakara wokoni.

³⁶ Ela ikamanyika angu iyo ng'ombe edeeka na tabia eringa, na BWANA wake nderetalieghe kuifunga, uchaboisa ilagho ijo kwa kumlipa mmbao ija ng'ombe iko moyo, nao moni uchawusa ija ng'ombe yafwa.