KUFUMA 2 - Biblia Ilagho Jiboie Kwa Wandu Wose

Kuvalwa kwa Musa

¹ Ngelo iyo, mndumu wa kichuku cha Lawi, ukalowua muka wa mbari yake cheni.

² Uo muka ukapata kifu, ukava mwana wa womi; hata iji oremmbonieghe mwana uo kukaia ughokie, ukamvisa meri idadu.

³ Nao iji wawona angu ndedimagha kumvisa sena, ukam'bonyera kikapu cha milala; ukaikanda lami, ukamngira uo mwana andenyi, na kumvisa marienyi mbai na mbai ya moda.

⁴ Mruna wa waka ukakaia kimusi ka kula uwone agho ghichaampata uo mwana.

⁵ Nao mwai wa Mzuri ukasea modenyi kukuoghosha, na wai wake wa kazi wikakaia wikisela-sela mbai na mbai ya moda. Ukawona kikapu andenyi marienyi, ukamduma mwai wake wa kazi uchishoo.

⁶ Mwai wa Mzuri uendachifunukua, ukawona mwana! Nao orekoghe ukilila. Ukawadwa ni wughoma ukaghamba, “Uhu ni umu wa waja wana wa Waebrania.”

⁷ Mruna wa waka ukamzera mwai wa Mzuri, “Nighende nikuwangie mleli umu kufuma kwa waka wa Waebrania ukulelie uhu mwana?”

⁸ Mwai wa Mzuri ukatumbulia, “Ghenda.” Niko uja mwai ukaghenda na kummbanga uja mwana mae.

⁹ Mwai wa Mzuri ukamzera, “Wada uhu mwana kunilelie nani nichakulipa.” Na uja muka ukammbwada uo mwana ukamlela.

¹⁰ Uo mwana ukazoghua, na uja muka ukamreda kwa mwai wa Mzuri, nao ukawuya mwana wake moni ukammbanga irina jake Musa, angu oreghambieghe, “Kwa kukaia nedemfunya machinyi.”

Musa kukimbia cha Midiani

¹¹ Hata iji Musa wazoghua, ituku jimu ukafuma kwendawizighana wamzawo Waebrania, ukawona seji werebonyesheroghe kazi rikurie; ukammbona Mmisri umu ukimkaba Muebrania.

¹² Musa ukazighana ii chia na ii chia, hata uendawona mndungi ndeuko, ukam'bwagha Mmisri na kumvisa msangaghenyi.

¹³ Ituku ja kawi ukafuma ukawona Waebrania wawi wikilwa, ukamzera uja orekoghe na makosa, “Kwaki kumkabagha Muebrania wa mzenyu?”

¹⁴ Ukatumbulia, “Nani ukubonyere kukaie m'baa na mtanyi aighu edu? Kokunda kunibwagha seji kum'bwaghie Mmisri?” Niko Musa ukaobua na kughesha, “Kwa loli iji jamanyikie.”

¹⁵ Nao iji Mzuri wasikira agho, ukalola kum'bwagha Musa. Ela Musa ukamkimbia Mzuri, ukaghenda na kukaia isanga ja Midiani, ukasea kidombo kaavui na kiriwa.

¹⁶ Idana mkohani wa Midiani orekoghe na wai mfungade, nawo wikacha wikadaya machi na kughidungiria kiriwenyi chenyoshera, wipate kurinyosha mfugho ra ndee.

¹⁷ Walisha wamu wikacha na kuwiwinga noko, ela Musa ukawuka na kuwitesia kurinyosha mfugho machi.

¹⁸ Hata iji wameria kuwuya kwa ndee Rueli ukawizera, “Yakaia wada idime mwawuya shwa-shwa huwu?”

¹⁹ Nawo wikaghamba, “Ni Mmisri umu wadikira kufuma kwa waja walisha, hata ukaditesia kudaia mfugho redu machi na kurinyosha.”

²⁰ Nao ukawizera wai wake, “Uo mundu oko hao? Kwaki mwamsigha? Mmbangenyi uche uje vindo.”

²¹ Niko Musa ukacha ukakaia kwa uo mundu, nao ukamneka mwai wake Zipora ukaie mkake;

²² nao ukamvaia Musa mwana wa womi, ukammbanga irina jake Gershomu; angu oreghambieghe, “Ini nakaia mghenyi, andenyi ya isanga ja kighenyi.”

²³ Nyuma ya miaka imu, uja mzuri wa Misri ukafwa, ela Waisraeli werekoghe wikisirimwa aisi ya wuzumba; wikalila wikilola wutesia. Kililo chawo chikamvikia Mlungu.

²⁴ Na Mlungu ukakumbuka ilaghano jake orejibonyereghe na Abrahamu, Isaaka, na Jakobo.

²⁵ Mlungu ukawiwona wandu wa Israeli, ukaghumanya wasi ghwawo.