KUFUMA 18 - Biblia Ilagho Jiboie Kwa Wandu Wose

Jethro kuchamroghua Musa

¹ Jethro, uja mkohani wa Midiani, nao ni mghosi wake Musa, ukasikira agho ghose Mlungu orebonyereghe kwa Musa na kwa wandu wake Waisraeli; kwa kuwifunya Misri.

² Ukacha ukimreda Zipora mkake Musa, uo oremsighieghe

³ andwamweri na wana wake wa womi wawi; umu wa wana wake oremmbangieghe Gershomu (angu oreghambieghe, “Nerekoghe mghenyi andenyi ya isanga ja kighenyi”),

⁴ na irina ja mzima orewangiloghe Eliezeri, (angu oreghambieghe, “Mlungu wa aba waniteserie, na ukanikira na lufu lwa Farao.”)

⁵ Jethro, uo mghosi wa Musa, ukamredia Musa muka wake na wana wake wa womi wawi aho kireti, angu orebonyereghe kambi mghondinyi ghwa Mlungu.

⁶ Hata iji mndumu oremghorieghe Musa kukaia mghosi wake Jethro wamredia mkake na wana wake wawi,

⁷ Musa ukafuma kummara mghosi wake, ukaghoghoma imbiri kwake na kumsusugha. Wikakotiana malagho gha hali rawo, wikaghenda na kungia hemenyi kwa Musa.

⁸ Musa ukamghoria mghosi wake kula ilagho BWANA orem'bonyereghe Farao na Wamisri kwa wundu ghwa Waisraeli; sena ukamghoria wasi ghose wereghupatireghe chienyi, na seji BWANA orewikirieghe.

⁹ Hata iji Jethro wasikira seji BWANA orebonyereghe nicha kwa Waisraeli kwa kuwikira na mkonu ghwa Wamisri, ukaboilwa,

¹⁰ na kughamba, “Bwana ndekaso, uo oremkirieghe na mkonu ghwa Wamisri na ghwa Farao.

¹¹ Idana namanya angu BWANA ni m'baa kuchumba milungu yose, angu orekirieghe wandu kufuma mikonunyi kwa Wamisri, iji werekoghe wikiwikoronga.”

¹² Niko Jethro, mghosi wake Musa ukafunya kizongona chekora na vizongona vizima kwa Mlungu; na Haruni ukacha chiaimweri na waghosi wa Israeli wikajanya vindo na mghosi wa Musa kwa kumtasa Mlungu.

Kuwikwa kwa watanyi

¹³ Nakesho yaro, Musa ukasea kidombo kutanya malagho gha wandu. Wandu wikasinda dii kwa Musa, kufuma luma lwa nakesho hata luma lwa kenyi wikitanyirwa malagho ghawo.

¹⁴ Nao iji Jethro orewonieghe maza rose rerekoghe rikibonywa ni Musa ukaghamba, “Ni ilaghoki iji kwawuyabonyera wandu? Kwaki kuseagha kidombo kuekeri kukiwitanyira wandu malagho kufuma luma lwa nakesho hata luma lwa nakenyi?”

¹⁵ Musa ukatumbulia, “Suti nibonyere wandu huwo, kwa kukaia wadaacha kwapo kukufundisha lukundo lwa Mlungu.

¹⁶ Wandu wikakaia na ilagho wisepatanagha wadaacha kwapo, nani nadatanya agho malagho aghadi ya mundu na mmbao, chiaimweri na kuwifundisha sharia ra Mlungu na matanyo ghake.”

¹⁷ Nao mghosi wake Musa ukaghamba, “Seji kwawuyabonya si nicha.

¹⁸ Oho kwawuyakuvavira na kazi chiaimweri na awa wandu mkwanye wori; angu iri maza ralemere na ndighi, ndekudimagha kuriduka kuekeri.

¹⁹ Idana sikira nikuneke njama, na Mlungu ndekaie andwamweri na oho. Kaia imbiri ya Mlungu kwa wundu ghwa wandu, na kureda malagho ghawo imbiri ya Mlungu.

²⁰ Na oho kuchawifundisha memu ya Mlungu, na kuwimanyisha seji iwifwane wighende, na seji iwifwane wibonye.

²¹ Sena aighu ya agho, kusaghuo wandu wiko na kudima, wimuobuagha Mlungu, wandu wirumirikie wisekunde kuhongwa; nao kuwiwike wikaie vilongozi va wandu. Wamu wikaie wezighana wandu wa maelfu, wamu wezighana wa maghana na wamu mirongo misanu, na wazima wa makumi.

²² Wikaie watanyi wa wandu wa toe; kula ilagho ibaa wichajireda kwako, ela agho matini matini wichakaia wikighitanya weni. Kwa chia ihi maza richaangua, nenyo mchakaia na wungara ghoduka mzigo ughu.

²³ Kukabonya huwu, na Mlungu ukakulaghira wokoni, kuchadima hata na wandu wose wichawuya mzinyi wakatishirwa malagho ghawo.”

²⁴ Niko Musa ukawada njama ya mghosi wake Jethro, ukabonya agho ghose oremzerieghe.

²⁵ Musa ukasaghua wandu wiko na kudima aghadi ya Waisraeli wose. Ukawika vilongozi va maelfu, maghana, mirongo misanu, na wa makumi.

²⁶ Wikakaia watanyi wa toe; malagho ghikurie werekoghe wikighireda kwa Musa, ela awo wikakaia wikitanya agho matini matini.

²⁷ Niko Musa ukalaghana na mghosi wake Jethro, ukaghala cha mzawo.