KUFUMA 16 - Biblia Ilagho Jiboie Kwa Wandu Wose

Mana na ngwale

¹ Nao ikwanyiko jose ja wandu wa Israeli wikafuma Elimu; na ituku ja ikumi na isanu ja mori ghwa kawi, nyuma ya kufuma Misri, wikavika kireti cha Sini; chiko ghadi na ghadi ya Elimu na Sinai.

² Na ikwanyiko jose ja wandu wa Israeli wikamzughunukia Musa na Haruni aho kireti,

³ wikawizera, “Erekaiagha nicha ngera BWANA odedibwaghia isanga ja Misri, aho dereserieghe kidombo aghadi ya sufuria ra nyama, dikija mikate na kughuda. Ela inyo mwadireda ichi kireti kubwagha iji ikwanyiko jose kwa njala.”

⁴ Niko BWANA ukamzera Musa, “Ola nichanyesha mikate kufuma mlungunyi kwa wundu ghonyu; na wandu wichafuma kushoa ifungu jekata kula ituku, nipate kuwitima ngera wichanugha malaghiro ghapo angu ngera ndewichaaghinugha.

⁵ Ituku ja karandadu, wikakashoa wishoo mando awi kuchumba seji wishoagha kula ituku.”

⁶ Nao Musa na Haruni wikawizera wandu wa Israeli wose, “Luma lwa kenyi mchamanya angu ni BWANA umfunyire isanga ja Misri,

⁷ Na luma lwa nakesho mchaghuwona wubaa ghwa BWANA, angu wasikira mazughunuko ghenyu mwam'bonyera. Isi deko kii hata mudizughunukie?”

⁸ Musa ukawizera, “Ni BWANA uchaamneka nyama reja nakenyi, na mikate emghudisha nakesho, angu wasikira mazughunuko ghenyu mwam'bonyera. Isi deko kii? Ndemuwuedizughunukia isi, ela mwaawuyamzughunukia BWANA.”

⁹ Musa ukamzera Haruni, “Zera ikwanyiko jose ja wandu wa Israeli wiche wikaie kimusi imbiri ya BWANA, angu wamerie kusikira mazughunuko ghawo.”

¹⁰ Hata iji Haruni orekoghe ukighora na ikwanyiko jose ja wandu wa Israeli, wikazighana cha kireti, wikawona wubaa ghwa BWANA ghuko andenyi ya iwingu.

¹¹ BWANA ukamzera Musa,

¹² “Nasikira mazughunuko gha Waisraeli. Wizere angu wichaja nyama ngelo ya lumisimisi, na mikate ngelo ya luma lwa nakesho; niko aho mchamanya angu Ini ne BWANA Mlungu onyu.”

¹³ Luma lwa nakenyi, ngwale nyingi rikacha na kuifinikira kambi, na luma lwa kesho, ikungughu jikalala kambi yose.

¹⁴ Hata iji ijo ikungughu jereinjikieghe, kireti chikawoneka na vilambo vimu andoenyi va chokwa viko sa skozi.

¹⁵ Iji Waisraeli wereviwonieghe, wikakotiana weni na weni, “Niki chija?” angu ndewerevimanyireghe anduangi. Musa ukawizera, “Ni mkate ugho BWANA wamneka muje.

¹⁶ Huwu niko BWANA walaghira, ‘Shoonyi kula mundu seji udimagha kuja. Kula mundu uchashoa pishi imweri kunughana na mtalo ghwa wandu wiko hemenyi kwake.’”

¹⁷ Wandu wa Israeli wikabonya woruwo, wamu wikashoa vingi na wamu vitini.

¹⁸ Ela iji werevipimieghe kwa pishi, uo orewusireghe vingi nderesigharikiloghe na kindo chingi, hata uo oreshoieghe vitini nderesowieghe anduangi; kula mundu oreshoieghe seji udimagha kuja.

¹⁹ Musa ukawizera, “Mndungi usevisighare hata nakesho.”

²⁰ Ela wamu wawo ndeweremsikireghe Musa, wikawika vimu hata nakesho, navo vikafunya vizi na kunuka laghe-laghe. Musa ukajokwa ni machu kwa wundu ghwawo.

²¹ Wikashoa ivo vindo kula nakesho kunughana na kuja kwa kula mundu; ela iji iruwa jajoka vikasagha.

²² Ituku ja karandadu wereshoieghe ivo vindo mando awi kuchumba, wikashoa pishi iwi kula mundu; hata iji vilongozi vose va wandu werekoghe wikicha na kumghoria Musa malagho agho,

²³ uo ukawizera, “BWANA walaghirie angu kesho ni ituku ja wueli jehora, ni Sabato kwa wundu ghwa BWANA. Idime muoche icho chose chiko cheocha, na kudoghosa icho chose chiko chedoghosa na icho chichaasigharika, mchiwikie mbai kwa wundu ghwa kesho.”

²⁴ Kwa wundu ugho, vindo vose veresigharikieghe wereviwikieghe hata nakesho sa iji koni werezereloghe ni Musa, navo ndeverenukieghe hata kufunya vizi anduangi.

²⁵ Musa ukawizera, “Vijenyi idime, angu linu ni Sabato ya BWANA, na iyo mikate ndemchaaiwona shighadinyi anduangi.

²⁶ Mchashoa mikate kwa matuku arandadu, ela ituku ja mfungade ni Sabato; ndeichaawoneka anduangi.”

²⁷ Ituku ja mfungade, wandu wamu wikafuma kwendashoa mikate, ela ndewerepatireghe ghungi anduangi.

²⁸ Niko BWANA ukamzera Musa, “Mchalegha kuwadia malaghiro na Sharia rapo hata lii?

²⁹ Ndemmbonagha angu BWANA wamnekie iyo Sabato ikaie ituku ja kuhora, niyo sababu umnekie mkate mandu awi ituku ja karandadu, eri kula mundu ukaie andu koni uko ituku ja mfungade. Kula mundu ndekaie mzinyi kwake.”

³⁰ Niko huwo wandu wikahora ituku ja mfungade.

³¹ Wandu wa Israeli wereviwangieghe ivo vindo mana navo verekoghe vifwanane na ndembe ra mwemba ghwa chokwa, visingie sa maandazi ghiboisiro kwa wuki.

³² Musa ukaghamba, “Bwana walaghirie angu diwike pishi imweri ya mana kwa wundu ghwa vivalwa vichagha, wipate kuwona ivo vindo oremnekieghe kireti, iji oremfunyireghe isanga ja Misri.”

³³ Musa ukamzera Haruni, “Wada mkebe, kukumbirie pishi imweri ya mana, iwiko imbiri ya BWANA kwa wundu ghwa vivalwa venyu vose.”

³⁴ Haruni ukaviwika ivo vindo imbiri ya Isanduku ja Ilaghano vilindilo sa iji koni BWANA oremlaghirieghe Musa.

³⁵ Wandu wa Israeli wikaja ija mana kwa miaka mirongo ina hata wikavika wandunyi, wikaija hata wikavika mpakenyi ghwa isanga ja Kanaani.

³⁶ Icho kipimo cha pishi ni karakara na lita mirongo iwi.