KUFUMA 14 - Biblia Ilagho Jiboie Kwa Wandu Wose

Kuruwuka bahari ya Shamu

¹ Niko BWANA ukamzera Musa,

² “Zera Waisraeli wighaluke nanyuma wibonye kambi imbiri ya Pi-hahirothi, ghadi na ghadi ya Migdoli na bahari ya Shamu, naimbiri ya Baal-zefoni; mchabonya kambi kaavui na bahari.

³ Na Farao uchaghesha wei Waisraeli waatangalwa ni kireti, nawo waawuyamara-mara isangenyi.

⁴ Nani nichaikurisha ngolo ya Farao, nao uchamnugha. Na wusimi ghwapo aighu ya Farao na majeshi ghake ghuchaniredia wubaa; niko Wamisri wichamanya kukaia Ini ne BWANA.” Nao Waisraeli wikabonya sa iji koni wereghoreloghe.

⁵ Hata iji mzuri wa Misri waghorelwa angu awo wandu wameria kughenda, Farao na wadumiki wake wikaghalusa maghesho aighu ya Waisraeli na kughamba, “Dabonya wada huwu? Dawilekeria Waisraeli wighende wisedidumikie!”

⁶ Niko ukaboisa igare jake, ukadwa majeshi ghake andwamweri nao;

⁷ ukadwa magare ghiboie maghana arandadu, na magare mazima gha Misri, ghose ghajokwa ni wabaa.

⁸ BWANA ukaikurisha ngolo ya Farao mzuri wa Misri, nao ukawinugha Waisraeli ngelo werekoghe wikighenda kwa wuing'oni.

⁹ Wamisri wikawinugha kwa farasi rose ra Farao waghenji farasi na majeshi ghake, na kuwikua Waisraeli wabonya kambi kaavui na bahari ya Shamu aja Pi-hahirothi naimbiri ya Baal-zefoni.

¹⁰ Farao uendavika kaavui nawo, Waisraeli wikazighana na kuwona Wamisri wikiwinugha, wikaobua na ndighi; wikamkemia BWANA.

¹¹ Nawo wikamzera Musa, “Welee, makaburi ndegherekoghe Misri ekorediredagha dichefuya aha kireti? Kwadibonya wada huwu kudifunya isanga ja Misri?

¹² Welee, huwu siko koni derekughoriagha diko Misri, angu kudileke diwidumikie Wamisri kuchumba kufuya aha kireti? Kwa kukaia yakaiagha baa isi kuwidumikia Wamisri kuchumba kufuya aha kireti.”

¹³ Musa ukawizera awo wandu, “Msakeobua, mangenyi mmbone kukia kwa BWANA ucham'bonyera idime; kwa kukaia awa Wamisri muwiwonagha idime, ndemuchaawiwona sena anduangi.

¹⁴ BWANA uchamluya, na inyo mchakaia kima.”

¹⁵ BWANA ukamzera Musa, “Kwaki kunikemiagha, zera wandu wa Israeli wighende imbiri.

¹⁶ Wusira mzata ghwako, kughoruo mkonu ghwako aighu ya bahari, machi ghiwaghanyike, na wandu wa Israeli wipate kuida andu kuomie aghadi ya bahari.

¹⁷ Nicharikurisha ngolo ra Wamisri, wipate kuwinugha, nani nichapata kukaswa aghadi ya Farao na majeshi ghake ghose; magare ghake na wajoki farasi wake.

¹⁸ Na Wamisri wichamanya angu ini ne BWANA, ngelo nichaakaswa aighu ya Farao, magare ghake, na wajoki farasi wake.”

¹⁹ Niko malaika wa Mlungu, uo orekoghe ukilongoza majeshi gha Israeli ukaghaluka na kuwuya na nyuma. Ija nguro ya iwingu wokoni ikaghaluka na kukaia na nyuma,

²⁰ na aho ikakaia ghadi na ghadi ya majeshi gha Misri na majeshi gha Israeli. Korekoghe iwingu na kira, nakio chee mndungi wawo nderedimieghe kumvikia mmbao anduangi.

²¹ Niko Musa ukaghughorua mkonu ghwake aighu ya bahari; na BWANA ukaisindika bahari kwa mbeo mbaa ya mashariki kio chee, hata ukaghalusa andu kwa bahari kuwuye ndoe iomie, na machi ghikawaghanyika.

²² Wandu wa Israeli wikaida ghadi na ghadi ya bahari andu kuomie, na machi ghikakaia sa wurigha chia ya mkonu ghwawo ghwa kiwomi na chia ya mkonu ghwawo ghwa kiwaka.

²³ Wamisri wikawinugha na kungia ghadi na ghadi ya bahari, farasi rose ra Farao, magare ghake, na wajoki farasi wake.

²⁴ Nao sa ndoe kuelenyi, BWANA ukikaia andenyi ya nguro ya modo na ya iwingu ukaghizighana majeshi gha Wamisri, na kuwisumbua.

²⁵ Ukaghikwamisha magurudumu gha magare ghawo hata ghikakaia ghikighenda kwa wasi. Wamisri wikaghamba, “Nndokonyi diwikimbie Waisraeli, angu BWANA wawuyalwa nesi kwa wundu ghwawo.”

²⁶ Niko BWANA ukamzera Musa, “Ghorua mkonu ghwako aighu ya bahari, machi ghipate kuwuriana aighu ya Wamisri, na aighu ya magare ghawo na wajoki farasi wawo.”

²⁷ Nao Musa ukaghorua mkonu ghwake aighu ya bahari, nayo ikawuriana luma lwa nakesho kwa ndighi sa iji koni erekoghe. Wamisri wikatima kukimbia, ela BWANA ukawikumba baharinyi.

²⁸ Machi ghikawuriana na kufinikira magare, wajoki farasi, na majeshi ghose gha Farao agho gherewinughagha Waisraeli baharinyi; ndekoresigharikieghe mundu hata umweri.

²⁹ Ela Waisraeli wereidieghe andu kuomie ghadi na ghadi ya bahari; machi ghikikaia sa wurigha chia ya mkonu ghwa kiwomi na chia ya mkonu ghwa kiwaka.

³⁰ Huwo niko, BWANA orewikirieghe Waisraeli ituku jija kufuma kwa Wamisri, nawo wikawona gharia ra Wamisri pwani.

³¹ Waisraeli wikawona kazi mbaa iyo BWANA oreibonyereghe kwa kuwisima Wamisri, nawo wikamuobua BWANA; wikamrumiria BWANA na mdumiki wake Musa.