KUFUMA 13 - Biblia Ilagho Jiboie Kwa Wandu Wose

Wavalwa wa imbiri kuwikwa kwa BWANA

¹ BWANA ukamzera Musa

² “Kuniwikie kula mvalwa wa imbiri. Mvalwa wa imbiri uo ose andenyi ja Israeli; ukaiagha ni mdamu angu nyamandu, uchawuya wapo.”

Ndima ya Mikate Isewadie Chachu

³ Musa ukawizera wandu, “Mjikumbuke ituku iji, ijo morefumieghe Misri, andu morekoghe wuzumbenyi. Kwa kukaia BWANA oremfunyireghe aho kwa ndighi rake mbaa. Msakeja mikate iko na chachu.

⁴ Idime iji muafuma Misri, ituku ja imbiri ja mori ghwa Abibu.

⁵ BWANA ukameria kumreda isanga ja Wakanaani, Wahiti, Waamori, Wahivi, na Wajebusi, ijo orewighemieghe weke ndeyo kukaia uchawineka, isanga jinorie nandighi; mchakaia mkibonya wudumiki ughu andenyi ya ughu mori.

⁶ Mchaja mikate isewadie chachu kwa matuku mfungade. Ituku ja mfungade mchakaia na ndima ya BWANA.

⁷ Mseje mkate ghuko na chachu kwa matuku mfungade; mkate ghwa chachu ghusewoneke kwako, hata chachu isewoneke andenyi ya isanga jako jose.

⁸ Ituku jija kuchamzera mwana wako wa womi, ‘Ni kwa wundu ghwa ijo BWANA orenibonyereghe iji nerefumagha Misri.’

⁹ Mawiko agha ghichakaia lukumbuso, sa kilambo chifungilo kikoto na wushunyi kwako; kupate kuiwadia Sharia ya BWANA, angu orekufunyireghe Misri kwa ndighi mbaa.

¹⁰ Kwa huwu kula mwaka mchaghuwadia momu ughu na kughukatisha kwa ngelo yaro iwikilo.

Mvalwa wa imbiri

¹¹ “Iji BWANA wakureda isanga ja Wakanaani, seji orekughemieghe oho na weke ndeyo; nao ukuneke,

¹² kuchammbikia mbai kula mvalwa wa imbiri. Wavalwa wa imbiri wa mfugho rako ra womi wichakaia wa BWANA.

¹³ Kula mvalwa wa imbiri wa punda kuchamkombua na mwana wa ng'ondi, nako iji kusemkombuagha, kuchamchikanya singo yake. Kula mvalwa wa imbiri wa wana wako wa womi, kuchamkombua.

¹⁴ Matuku ghichagha, mwana wako wa womi ukakukotia kutambua kwaro agho mawiko, kuchamzera, ‘Derefunyiroghe wuzumbenyi Misri ni BWANA, kwa ndighi mbaa.

¹⁵ Iji Farao orekurishireghe ngolo, na kulegha kudisigha dighende, BWANA orewibwaghieghe wavalwa wa imbiri wose wa isanga ja Misri; mvalwa wa imbiri wa mdamu na mvalwa wa imbiri wa nyamandu wori. Kwa huwu dadamfunyira BWANA kizongona cha wavalwa wa imbiri wa womi wose; ela wavalwa wa imbiri wa wana wedu wa womi dadawikombua.’

¹⁶ Mawiko agha ghichakaia lukumbuso sa kilambo chifungilo kikoto na wushunyi kwako; kwa kukaia BWANA orekufunyireghe Misri kwa ndighi mbaa.”

Nguro ya iwungu na nguro ya modo

¹⁷ Hata iji Farao wameria kuwisigha awo wandu wighende, Mlungu nderewimarishireghe chia ya isanga ja Wafilisti, hata ngera niyo erekoghe ya kaavui; angu Mlungu oreghambieghe, “Wandu awa wisecheghaluka na kuwuya Misri ngelo wakwana na wuda ghungi.”

¹⁸ Kwa huwo Mlungu ukawimarisha chia ya kireti kulangaya cha Bahari ya Shamu. Wandu wa Israeli wikafuma Misri wiko tayari kwa wuda.

¹⁹ Musa ukadwa maindi gha Josefu, kwa kukaia Josefu orewibonyereghe wandu wa Israeli ighemi ukighamba, “Mlungu uchamchea kumkira, nenyo suti mughido maindi ghapo kufuma aha.”

²⁰ Waisraeli wikafuma Sukothi na kubonya kambi Ethamu, mwanonyi ghwa kireti.

²¹ BWANA ukakiria kuwiwonyera chia; na dime, andenyi ya nguro ya iwungu, na nakio andenyi ya nguro ya modo ghowineka mwengere, wipate kudamba nadime hata na nakio wori.

²² Iyo nguro ya iwingu ndeereinjikieghe nadime hata iyo nguro ya modo ndeereinjikieghe nakio imbiri ya awo wandu anduangi.