KUFUMA 12 - Biblia Ilagho Jiboie Kwa Wandu Wose

Pasaka

¹ BWANA ukawizera Musa na Haruni wiko isanga ja Misri,

² “Ughu mori ghuchakaia ghwa imbiri ghwa meri enyu. Ghuchakaia konyu ni mori ghwa imbiri ghwa mwaka.

³ Mjighorie ikwanyiko jose ja Israeli angu ituku ja ikumi ja ughu mori, kula mundu uchawada mwana wa ng'ondi, kunughana na nyumba ra weke ndee; mwana wa ng'ondi kula nyumba.

⁴ Iji wandu wakaia watini nyumbenyi, wisedimagha kumeria mwana wa ng'ondi, wichakukwanya na nyumba iko kaavui nawo, eri widime kubonya mtalo ghoja na kumeria mwana wa ng'ondi.

⁵ Kwadima kusaghua mwana wa ng'ondi angu wa mburi uboie wa mwaka ghumweri usewadie ikosa jingi.

⁶ Kummbike hata ituku ja ikumi na inya ja ughu mori, ngelo ikwanyiko jose ja Waisraeli wichaabwagha wana wa ng'ondi wawo nakenyi.

⁷ Niko aho wichawada bagha imu na kushinga vizingiti viwi na kizingiti cha ighu cha ugho mnyango, andu wichaakaia wikijia awo wana wa ng'ondi.

⁸ Chija kio wichaja nyama iochelo, chiaimweri na mkate ghusewadie chachu, na malemba ghiwawie.

⁹ Msakeja nyama ingi mbishi angu idoghosero kwa machi, ela mchaija iochelo yose putu; chongo chake, chiaimweri na maghu ghake, na vindo vake va ndenyi.

¹⁰ Msesighe ingi ilale hata nakesho, ela iyo yose ichaasigharika hata nakesho, mchaikora.

¹¹ Nenyo mchaija huwu: Mchakaia mwakufunga viwonu venyu, mwameria kurwa vadu, muko na mizata mikonunyi konyu; nenyo mchakaia mkiija kwa shwa-shwa. Iyo ni Pasaka ya BWANA.

¹² Angu nichaida aghadi ya isanga ja Misri kio icho, na kuwibwagha wavalwa wa imbiri wose wa isanga ja Misri; mdamu na nyamandu wori; nichaitanya milungu yose ya Misri, Ini ne BWANA.

¹³ Bagha niyo ichaakaia alama enyu aighu ya nyumba mchaakaia, hata iji naiwona bagha, nichamuida; na ikabo jingi ndejichaampata jemtotesha ngelo nichaakaia ngijikaba isanga ja Misri.

¹⁴ Mchakaia mkibonya ndima ya BWANA kwa wundu ghwa kukumbuka ituku iji vivalwa venyu vose; nenyo mchaitala kukaia ni Sharia ya matuku ghose.

Ndima ya Mikate Isewadie Chachu

¹⁵ “Mchaja mikate isewadie chachu kwa matuku mfungade; ituku ja imbiri mchainja chachu putu nyumbenyi konyu; angu mndungi ukaja mkate ghuko na chachu kufuma ituku ja imbiri hata ituku ja mfungade, uchatengwa putu kufuma kwa wandu wa Israeli.

¹⁶ Ituku ja imbiri mchakaia na ikwanyiko ja kuela, na ituku ja mfungade wokoni mchakaia na ikwanyiko ja kuela; kazi ingi isebonyo agho matuku, ela mwadima kukuboisira vindo.

¹⁷ Nenyo mchaitala iyo Ndima ya Mikate Isewadie Chachu, angu ituku ijo jeni niko nerewifunyireghe wandu wenyu kufuma isanga ja Misri. Kwa huwo mchajitala ituku iji vivalwa venyu vose, kukaia ni sharia ya matuku ghose.

¹⁸ Kufuma luma lwa kenyi lwa ituku ja ikumi na inya ja mori ghwa imbiri, hata luma lwa kenyi lwa ituku ja mirongo iwi na imweri ja mori ghwa imbiri, mchaja mikate isewadie chachu.

¹⁹ Chachu ndeichawoneka nyumbenyi konyu kwa matuku mfungade; angu mndungi ukaja mkate ghwa chachu agho matuku, uchatengwa kufuma kwa ikwanyiko ja Israeli, ukaiagha ni mghenyi angu muisanga.

²⁰ Ndemchaaja kindo chingi chiko na chachu, andu kose mchaakaia mchaja mikate isewadie chachu.”

Pasaka ya imbiri

²¹ Niko Musa ukawiwanga waghosi wose wa Israeli ukawizera, “Kula umu onyu ukusaghuye wana wa ng'ondi, kunughana na mtalo ghwa nyumbenyi kwake, muibwaghe kwa wundu ghwa Pasaka.

²² Mmbwade isawi ja hisopu, mujingire andenyi ya beseni iko na bagha, nao mshinge bagha aighu ya kizingiti cha ighu na vizingiti viwi va mnyango. Mndungi onyu usefume shighadi nakio hata ndoe yaela.

²³ Angu BWANA uchaida ukiwibwagha Wamisri; na iji wawona bagha kizingitinyi cha ighu na vizingitinyi viwi va mnyango, uchaghuida ugho mnyango, nao ndechaamsigha uo mtoteshi ungie andenyi ya nyumba renyu kum'bwagha anduangi.

²⁴ Mughutale mzango ughu, kukaia ni Sharia konyu na kwa wana wenyu matuku ghose.

²⁵ Nenyo iji mwangia andenyi ya jija isanga BWANA oremlaghirieghe kukaia uchamneka, mchaghuwadia wudumiki ughu.

²⁶ Na wana wenyu wikamkotia, ‘Wudumiki ughu kutambua kwaro niki?’

²⁷ Mchaghamba, ‘Ni kizongona cha Pasaka ya BWANA, kwa kukaia oreriidieghe nyumba ra wandu wa Israeli aja Misri, iji orebwaghagha Wamisri, ela isi ukadikira.’” Niko awo wandu wikaghoghomesha mawushu ghawo, wikatasa.

²⁸ Wikaghenda na kubonya sa iji koni BWANA orewilaghirieghe Musa na Haruni.

Kifwa cha wavalwa wa imbiri

²⁹ Nao kio ghadi, BWANA ukawibwagha wavalwa wa imbiri wose wa isanga ja Misri, kufuma mvalwa wa imbiri wa Farao, uo oseria kifumbi chake cha nguma, hata mvalwa wa imbiri wa mfungwa uko kifungonyi, chiaimweri na wavalwa wa imbiri wa mfugho wokoni werefueghe.

³⁰ Farao ukawuka na kio na wadumiki wake wose, na Wamisri wose; chikakaia kililo kibaa na ndighi andenyi ya Misri, kwa kukaia ndekoresigharikieghe nyumba ingi mndumu usefue anduangi.

³¹ Kio chija cheni, Farao ukawiwanga Musa na Haruni ukawizera, “Wukenyi mghende mfume kwa wandu wapo, inyo na Waisraeli wose. Ghendenyi mumdumikie BWANA seji mghambie.

³² Donyi ng'ondi renyu na ng'ombe renyu mghende, nani moni wori munirasimie!”

³³ Nao Wamisri wikawishashira awo wandu wifume wighende, angu wereghambieghe, “Difwa diwose.”

³⁴ Niko awo wandu wikadungiria mufu ghusewadie chachu vombonyi kwawo, na vilambo vekaba mikate, wikavifunga na nguwo na kuviduka maweghenyi kwawo.

³⁵ Wokoni, wandu wa Israeli werekoghe wabonya sa iji koni Musa orewizerieghe; wikalomba kwa Wamisri vilambo va lulu, feza, dhahabu, na nguwo.

³⁶ BWANA ukawibonya awo wandu kurumirikia mesonyi kwa Wamisri, wikawineka icho chose werekundieghe. Kwa chia ihi Waisraeli wikadwa wunyika mali ra Wamisri.

Waisraeli kufuma Misri

³⁷ Waisraeli wikazoya charo kufuma Ramesesi hata Sukothi, mtalo ghwawo sa wandu wa womi elfu maghana arandadu, kuseko na kutala waka na wana.

³⁸ Na wandu wazima walazi wori wikaghendanya nawo, andwamweri na mfugho nyingi, ng'ondi na mburi wori.

³⁹ Wikaocha mikate isewadie chachu kwa ghuja mufu wereghudwaeghe Misri, angu werefunyiroghe kwa shwa-shwa, hata ndewerepatireghe wulalo ghobonya mufu ghwa chachu, angu kukuboisira vindo vingi anduangi.

⁴⁰ Waisraeli werekaieghe Misri miaka maghana ana na mirongo idadu.

⁴¹ Na kutua kwa iyo miaka maghana ana na mirongo idadu, jija ituku jeni, majeshi gha BWANA ghikafuma isanga ja Misri.

⁴² Kio icho, BWANA orekoghe ukicheresha; upate kuwifunya kufuma isanga ja Misri. Kwa wundu ugho kio icho cheni chikawikwa kwa BWANA chipate kukaia kio checheresha kwa Waisraeli vivalwa vose.

Sharia ya Pasaka

⁴³ Nao BWANA ukawizera Musa na Haruni, “Sharia ya Pasaka ni ihi: Mghenyi ungi useje Pasaka;

⁴⁴ ela mzumba ughulo kwa pesa, wadima kuja nyuma ya kumshamisha.

⁴⁵ Mghenyi oida, angu mdumiki olipwa, usakeja.

⁴⁶ Pasaka iyo ichajilwa nyumbenyi; msedo nyama ingi cha shighadi, hata kuchikanya indi jaro.

⁴⁷ Waisraeli wose wichaiwadia sharia ihi.

⁴⁸ Mndungi useshamishiro usakeja Pasaka; ela ngera mghenyi ungi mkwanye wakunda kubonya Pasaka kwa BWANA, wandu wake wa womi wose suti wishamisho, niko uchaadima kusoghoda na kubonya Pasaka; nao uchatalwa karakara na muisanga.

⁴⁹ Sharia ichakaia imweri kwa muisanga na kwa mghenyi uko aghadi konyu.”

⁵⁰ Waisraeli wose wikabonya sa iji koni BWANA orewilaghirieghe Musa na Haruni.

⁵¹ Ituku jija jeni, BWANA ukaghiwifunya majeshi gha wandu wa Israeli wifume isanga ja Misri.