KUFUMA 11 - Biblia Ilagho Jiboie Kwa Wandu Wose

Musa kutangaza kifwa cha wavalwa wa imbiri

¹ Nao BWANA ukamzera Musa, “Jaasighwa ikabo jimweri tu nichaajireda kwa Farao na wandu wa Misri, niko aho uchaamlekeria mghende; ukakamlekeria mghende, uchammbinga mfume putu.

² Idana ghoria wandu wa Israeli, angu kula mndwawomi na kula muka wilombe kufuma kwa wambao vilambo va lulu, feza, na dhahabu.”

³ BWANA ukawibonya Waisraeli wirumirikie mesonyi kwa Wamisri. Na wokoni uo mundu Musa orekoghe m'baa na ndighi andenyi ya isanga ja Misri, kwa wadumiki wa Farao, hata kwa wandu wori.

⁴ Niko Musa ukaghamba, “BWANA waghamba huwu, ‘Sa kio ghadi nichaida aghadi ya Misri,

⁵ na wavalwa wa imbiri wose wa isanga ja Misri wichafwa, kufuma mvalwa wa imbiri wa Farao, uo uchaaseria kifumbi chake cha nguma, hata mvalwa wa imbiri wa muka-mdumiki, uo ushagha ngano. Hata na wavalwa wa imbiri wa mfugho wose wichafwa.

⁶ Kuchakaia na kililo kibaa na ndighi isanga jose ja Misri, jingi chisewonekie, hata chisechaawoneka sena anduangi.

⁷ Ela ndeichaakaia huwo kwa wandu wa Israeli anduangi, ikaiagha mundu angu nyamandu, hata koshi ndeichaawiborokia anduangi; mpate kumanya angu ni ini BWANA nibonyagha wuchumbano aghadi ya Wamisri na Waisraeli.’

⁸ Na awa wadumiki wako wose wichacha na kunighoghomia wikighamba, ‘Fuma noko na wandu wako mghende.’ Niko aho nichaghenda.” Musa ukafuma kwa Farao wajokwa ni machu mabaa loli-loli.

⁹ Niko BWANA ukamzera Musa, “Farao ndechaamsikira kungi, eri mashiniko ghapo ghipate kuchurikia isanga ja Misri.”

¹⁰ Musa na Haruni wikabonya agho mashiniko ghose imbiri ya Farao; ela BWANA ukaikurisha ngolo ya Farao, hata nderewisighieghe wandu wa Israeli wifume isangenyi kwake anduangi.