KUFUMA 10 - Biblia Ilagho Jiboie Kwa Wandu Wose

Zighe

¹ Niko BWANA ukamzera Musa, “Ghenda kwa Farao, kwa kukaia naikurisha ngolo yake, na ngolo ra wadumiki wake, eri nipate kubonya weke mwakilimbiti wapo aghadi kwawo,

² na oho kupate kuwighoria wana wako, na weke wawayo seji nerewikitireghe Wamisri, na awo weke mwakilimbiti nerewibonyereghe aghadi kwawo, mpate kumanya angu Ini ne BWANA.”

³ Nao Musa na Haruni wikaghenda na kungia kwa Farao wikamzera, “Bwana, uo Mlungu wa Waebrania waghamba huwu, ‘Kuchalegha kukusera imbiri kwapo hata lii? Sigha wandu wapo wighende winidumikie.

⁴ Nako ngera kwalegha kuwisigha wandu wapo wighende, ola kesho nichareda zighe isangenyi kwako;

⁵ naro richafinikira isanga jose, hata jileme kuwoneka. Richaja kula kilambo cheresighiloghe ni ija vua ya magho, na kula mudi ghuko mbuwenyi kwako.

⁶ Richangia andenyi ya nyumba rako, na andenyi ya nyumba ra wadumiki wako wose, na ra Wamisri wose. Na jingi weke ndeyo hata weke wawayo ndewerewonieghe maza sa iro anduangi.’” Nao Musa ukaghaluka na kufuma kwa Farao.

⁷ Wadumiki wa Farao wikamzera “Welee, umundu udisumbua huwu hata lii? Sigha awa wandu wiendemdumikia BWANA Mlungu wawo. Kwaduagha kusemanyagha kukaia Misri yazama putu?”

⁸ Niko Musa na Haruni wikawunjwa kwa Farao; nao ukawizera, “Ghendenyi mumdumikie BWANA Mlungu onyu, ela kukakoni ni weke ani wighendagha?”

⁹ Musa ukamzera, “Dichaghenda chiaimweri na wana wedu na waghosi wedu; dichaghenda chiaimweri na wana wedu wa womi na wa waka, ng'ondi na mfugho redu, angu suti dibonye ndima kwa BWANA.”

¹⁰ Farao ukaghamba, “Aho loli mchakaia na BWANA, ikakaia jingi namsigha mghende na wana wenyu! Nawona moko na maghesho ghizamie inyo.

¹¹ Hata! Womi wiko konyu ndewighende wimdumikie BWANA, angu niko mkunde.” Nao Musa na Haruni wikawingwa wifume kwa Farao.

¹² Niko BWANA ukamzera Musa, “Ghorua mkonu ghwako aighu ya isanga ja Misri zighe ripate kucha, na kuja miwalwa yose isangenyi ja Misri. Richaja icho chose cheresigharikieghe ngelo ya vua ya magho.”

¹³ Aho Musa ukaghorua mzata ghwake aighu ya isanga ja Misri. BWANA ukareda kuweta kwa mbeo ya mashariki aighu ya isanga dime dii na kio chee. Hata nakesho, uko kuweta kwa mbeo ya mashariki kukareda zighe.

¹⁴ Nao zighe rikacha kwa wungi na kukaria aighu ya isanga jose ja Misri. Ijo izungu ja zighe ndejiwonekie jingi, hata na jingi ndejichaawoneka sena anduangi.

¹⁵ Kwa kukaia rerefinikireghe isanga jose hata jikasera kira; naro rikaja kula muwalwa isangenyi, na matunda gha midi eresigharikieghe ngelo ya vua ya magho; ndekorekoghe na ilemba jingi iwishi, hata mudi, angu muwalwa ghungi ghwa mbuwenyi ghoresigharikieghe isanga jose ja Misri.

¹⁶ Niko Farao ukawiwanga Musa na Haruni kwa shwa-shwa ukawizera, “Nabonya kaung'a kwa BWANA Mlungu onyu na konyu wori.

¹⁷ Namlomba munifue wughoma kaung'a yapo indo iji jeni jimweri tu, munilombie kwa BWANA Mlungu onyu, uniinjire iji ikabo jizamie.”

¹⁸ Nao Musa ukafuma kwa Farao, ukamlomba BWANA.

¹⁹ Niko BWANA ukaghalusa uko kuweta kwa mbeo ya mashariki kuweta kufuma magharibi kwa ndighi mbaa, na kuwusira iro zighe; rikadwalwa hata bahari ya Shamu. Ndekoresigharikieghe zighe hata imweri isanga ja Misri.

²⁰ Ela BWANA ukaikurisha ngolo ya Farao, nao nderewisighieghe wana wa Israeli wighende anduangi.

Kira

²¹ Niko BWANA ukamzera Musa, “Ghorua mkonu ghwako nokoighu, kira chipate kungia isanga ja Misri, kira kibaa loli-loli.”

²² Musa ukaghorua mkonu ghwake nokoighu, na kira kibaa na ndighi chikangia isanga jose ja Misri kwa matuku adadu.

²³ Wamisri ndeweredimieghe kuwonana weni na weni, hata mndungi nderedimieghe kufuma andu uko kwa matuku adadu. Ela kwa Waisraeli wose korekoghe na mwengere.

²⁴ Niko Farao ukammbanga Musa ukamzera “Ghendenyi mumdumikie BWANA; waka wenyu na wana wenyu wori mwadima kughendanya nawo, ela ng'ondi na mfugho renyu riekeri niro richasigharika.”

²⁵ Ela Musa ukaghamba, “Ni suti kudipatire nyamandu kwa wundu ghwa mafunyo na vizongona vekora dipate kumfunyira BWANA Mlungu odu.

²⁶ Mfugho redu wori suti dirido; ndeichasigharika kochokocho ingi aha, kwa kukaia ni suti dirido dipate kumdumikia uo BWANA Mlungu odu; angu ndedimanyagha ni nyamandu riao rifwanagha kwa kumdumikia BWANA, hata dameria kuvika aho.”

²⁷ Ela BWANA ukaikurisha ngolo ya Farao, hata nderewisighieghe wighende anduangi.

²⁸ Niko Farao ukamzera Musa, “Fuma noko! Kukulindie kumoni, jingi kuseniwone sena, angu ituku kuchaaniwona kuchafwa.”

²⁹ Musa ukamzera, “Ni woruwo! Sichaakuwona sena anduangi.”