KUFUMA 1 - Biblia Ilagho Jiboie Kwa Wandu Wose

Kutirirwa kwa Waisraeli aja Misri

¹ Wana wa Israeli wereghendanyeghe na Jakobo Misri, kula umu na kinyumba chake, niwo awa:

² Reubeni, Simeoni, Lawi, Juda,

³ Isakari, Zebluni, Benjamini;

⁴ Dani, Naftali, Gadi, na Asheri.

⁵ Mtalo ghwa kivalwa chose cha Jakobo ghorekoghe wandu mirongo mfungade. Mwana wake Josefu orekoghe ajaeni Misri.

⁶ Niko Josefu na waruna, andwamweri na chija kivalwa chose wikafwa.

⁷ Ela kivalwa cha Israeli werekoghe wikiva na kuchurikia kwa wungi; wikachurikia na kukaia na ndighi loli-loli, nawo wikachua ijo isanga.

⁸ Niko ukawuka mzuri mzima Misri useremmanyireghe Josefu anduangi.

⁹ Nao ukawizera wandu wake, “Zighanenyi Waisraeli seji wiko wengi, sena wiko na ndighi kudichumba isi.

¹⁰ Nndokonyi diwibonyere mpango kwa wuya wisechechurikia, eri wuda ghukabuka, wisechekukwanya na wamaiza wedu na kudikaba, nao wifume na kughenda.”

¹¹ Kwa huwo Wamisri wikawiwikia wanyapara wiwikoronge kwa kazi rikurie; Waisraeli wikamuaghia mzuri mizi ya nganya rewika viro, Pithomu na Ramesesi.

¹² Ela seji Wamisri werechurieghe kuwikoronga Waisraeli, niko koni Waisraeli werechurikieghe na kuera isangenyi. Na Wamisri wikakaia na wowa na wandu wa Israeli.

¹³ Kwa huwo wikawidumikisha Waisraeli kwa kubia,

¹⁴ wikabonya maisha ghawo kukaia gha wasi kwa wundu ghwa kazi rikurie; kazi ya chokaa na matofali, na kula kazi ya mbuwenyi; kwa kula kazi yawo, werewidumikishireghe kwa kubia.

¹⁵ Nao mzuri wa Misri ukaghora na waka wevarisha wa Kiebrania, umu uwangwagha Shifira, na umu uwangwagha Pua, ukawizera,

¹⁶ “Ngelo mwakawivarisha waka wa Waebrania, mkawona mwana wa womi wavalwa, mum'bwaghe ela mkawona mwana wa waka mumsighe ukaie moyo.”

¹⁷ Ela awo waka wevarisha werekoghe wikimuobua Mlungu, kwa huwo wikalemwa ni kubonya seji mzuri orewilaghirieghe, wikawisigha wana wa womi wikaie moyo.

¹⁸ Mzuri wa Misri ukawiwanga awo waka wevarisha ukawizera, “Kwaki m'bonyagha huwu, muwisighaawana wa womi wikaie moyo?”

¹⁹ Waka wevarisha wikamzera Mzuri, “Waka wa Waebrania ndewiko sa waka wa Kimisri, kwa kukaia awo weko na ndighi, hata wadakufungua weni imbiri uo mvarishi usechee.”

²⁰ Kwa wundu ugho, Mlungu ukawibonyera nicha awo waka wevarisha, na wandu wikachurikia; wikachuria kukaia na ndighi.

²¹ Na kwa kukaia awo waka wevarisha weremuobueghe Mlungu, Mlungu ukawineka kivalwa.

²² Mzuri ukawilaghira Wamisri ukighamba, “Kula mwana wa womi uchaavalwa kwa Waebrania, mumkumbe modenyi ghwa Naili, ela kula mwana wa waka mchamsigha ukaie moyo.”