KILILO CHA JEREMIA 5 - Biblia Ilagho Jiboie Kwa Wandu Wose

Ilombi jelomba wughoma

¹ Kumbuka agho ghidipatire ee BWANA; zighana kuwone seji disowelo ishima.

² Mali redu ranekelo waghenyi; waghenyi waawuyakaia andenyi ya nyumba redu.

³ Weke aba wabwaghilo ni m'maiza, na idana weke mao weewuya waka wakiwa.

⁴ Suti dilipie machi dawuyanywa, na mbande suti dirighuo.

⁵ Daawuyadumikishwa kwa ndighi; dasirilo, ela ndedinekwagha kuhora kungi.

⁶ Dakufunyire kwa Wamisri na wandu Waashuru, eri dipate vindo vidikate.

⁷ Weke wawa wabonyere kaung'a, nawo waidie; nesi daawuyapata wasi kwa wundu ghwa kaung'a rawo.

⁸ Daawuyabonyerwa nguma ni wazumba, hata ndekuwadie mndungi odivuvua wisedibonyere nguma.

⁹ Dapata vindo kwa kuwika marangi ghedu ndengonyi, kwa kukaia wabwaghi waawuyamara-mara kireti.

¹⁰ Njala yadishekerie dikapatwa ni iruke ja homa, mimbi yedu ehia shuu sa iriko jedekia.

¹¹ Waka wedu wadidikilo aighu ya Mghondi ghwa Sioni ghoni; wai wedu wadidikilo andenyi ya mizi ya Juda.

¹² Vilongozi vedu vadwalo vikanyonyoreshwa; na waghosi wedu weesowelwa ishima putu.

¹³ Wandu wedu wa irika wiadumikishwa kusha viro sa wazumba, wanake wiaghenda wikitatarika kwa kudukishirwa mbande rilemere.

¹⁴ Waghosi walekie kukaia na mandu mbengenyi; wandu wa irika walekie kubora.

¹⁵ Ngolo redu reesirilwa ni kuboilwa; kuvina kodu kooghaluswa kukaia wasi.

¹⁶ Vilambo vose derekukasagha navo vasirie. Ni bugha kodu angu dibonyere kaung'a.

¹⁷ Dakaia wakongo kondenyi ngolonyi; daawuyawona miramira angu dawuyadikwa ni mbori,

¹⁸ kwa wundu ghwa Mghondi ghwa Sioni kusighwa mduu, na mizozo kusela-sela aighu ya kunoneka kwaro.

¹⁹ Ela oho ee BWANA, ko mzuri kwa kala na kala; kuchabonya nguma hata kutua kwa ngelo.

²⁰ Kwaki kudiliwie luma huwu? Kwaki kudisighie?

²¹ Diwunje kwako BWANA, diwunje kwako! Diwunjire wubaa ghodu ghwa kala.

²² Da loli koodilegha putu? Koozamilwa ni isi putu?