KILILO CHA JEREMIA 4 - Biblia Ilagho Jiboie Kwa Wandu Wose

Jerusalemu nyuma ya kunonwa

¹ Dhahabu yedu ing'alaa-ng'ala eefuwia; magho gha zoghori mbaa gha Hekalu gheesasarika achienyi.

² Wadawana wa Sioni werekoghe wa zoghori mbaa kodu sa dhahabu, ela idana wawuyabonywa sa nyungu ra wongo, kazi ya mikonu ya mvimbi.

³ Hata mzozo ghwaongoshagha mwana wake; ela wandu wapo weeka sa nyagha ing'etere kwa wana wake.

⁴ Wasigha wana wawo wifo kwa njala na kau; wana walomba vindo, ela ndekuwadie ungi owineka.

⁵ Awandu werekoghe wikija manori waawuyafwa ni njala achienyi; awo werezoghueghe na maseko, waawuyalola vindo a mapipenyi.

⁶ Wandu wapo wakabilo kuchumba wa muzi ghwa Sodoma ugho ghoretotesheroghe mikonunyi kwa Mlungu kwa indo jimweri.

⁷ Wabaa wedu ndewerelushiroghe; werekoghe wielie sa thaluji, wiko na ndighi na wubanana.

⁸ Idana weeka wilale achienyi wisemanyikagha; wafue na mawushu ghawo ghikawuya gha chilu. Mirongo yawo yaomie sa mbande, na kukakadiana na maindi ghawo.

⁹ Wandu wifue wudenyi weko baa kuchumba awo wicheefwa na njala mboa mboa kwa kusowa vindo vewikaisha moyo.

¹⁰ Wasi ghorewichieghe wandu wapo ni ghoobosha; weke mao wiko na lukundo wikawidoghosa wana wawo weni wiwuye vindo!

¹¹ BWANA walekerie machu ghake ghose ghibirie; ukakora muzi ghwa Sioni ghukahia hata misinginyi.

¹² Ndekuwadie mndungi angu m'bonyi nguma ungi wa masanga gha kighenyi, orerumirieghe wei oko ungi udimagha kuwadia mbenge ra Jerusalemu.

¹³ Agha gheebonyeka kwa kukaia walodi wake wabonyere kaung'a, na wakohani wake wikabonya makosa ghiwishekerie wandu wa hachi kubwaghwa.

¹⁴ Vilongozi vake verekoghe vikimara-mara achienyi sa vitungure, wakushingie bagha loli loli mndungi usedimagha kuwiadada.

¹⁵ Wandu werekoghe wikiwikemia, “Ghendenyi noko wandu mseelie; mseniadade!” Kwa huwo wikamara-mara kufuma mbari hata mbari, hata ndewerekaribishiroghe ni mndungi.

¹⁶ BWANA ndecheewuyawitala sena; ukawisaghisa moni. Ndecheewitala wakohani na vilongozi vedu.

¹⁷ Dazighanire dikisuwiria kupata wutesia hata meso ghedu ghikasera kira; ela ndedicheeghupata jingi.

¹⁸ Dikachuria kuweseria wutesia kufuma kwa mbari iserekoghe na wutesia ghungi, ndederedimieghe kufuma hata chienyi koni. Matuku ghedu ghedesia; kutua korekoghe kwavika.

¹⁹ Awo werekoghe wikidinugha werekoghe na iseghe kuchumba indu riburukagha. Werediwingieghe aighu mighondinyi, wikadilaliria kireti.

²⁰ Wammbwadie mzuri oresaghuloghe ni BWANA, orekoghe asili ya wubanana ghodu; uo deremsuwirieghe uchadilindia disengirilo.

²¹ Sekenyi inyo wandu wa Edomu na Uzi; boilonyi seji mchaadima. Na oho wokoni kuchelwa ni wasi; kutatarike kuko duu kwa waya.

²² Ikabo ja Sioni kwa wundu ghwa kaung'a rake jamerie kukata; BWANA ndechaammbika wubarishonyi sena. Ela BWANA uchakukaba oho Edomu. Na kufunukua wuwiwi ghwa mabonyo ghako worinyi.