KILILO CHA JEREMIA 2 - Biblia Ilagho Jiboie Kwa Wandu Wose

Ikabo ja BWANA kwa Jerusalemu

¹ BWANA waiwikie Jerusalemu kirenyi kwa wundu ghwa machu ghake. Wakunonie kughoka kwake kwa wubaa kukanoneka putu. Ituku ujokelo ni machu ndecheekumbuka hata Hekalu yake.

² BWANA wanonie kula muzi ghwa Israeli kuseko wughoma. Wavuchue ngome ra wandu wa Juda kwa machu ghake; ukainja ishima ja mawuzuri na wabonyi nguma waro.

³ Wamerie ndighi rose ra wandu wa Israeli kwa machu ghake ghibirie; waleghie kuditesia ngelo derecheloghe ni wamaiza; ukadisaghisa sa modo ghuhiagha na kumeria kula kilambo.

⁴ Wadilengie na iwanu sa m'maiza, ukabwagha wose werediboiagha; dawonie machu ghake ghiakagha sa modo aha Jerusalemu.

⁵ BWANA waitoteshere Israeli sa m'maiza; wabonyere ngome rake rose riwuye maghacho; wawiredia wandu wa Juda wasi ghusesiagha.

⁶ Wainona Hekalu yake andu derekoghe dikimtasa, waribonya ndima na sabato risekaie. Mzuri na mkohani wawona seji uko na ndighi.

⁷ BWANA waileghie madhabahu yake na kuisigha Hekalu yake ya wueli. Warumiria m'maiza ukavuchua mawurigha gharo. M'maiza ukakema kwa wusimi andu derekoghe dikitasa kwa kuboilwa.

⁸ BWANA odewona mawurigha gha Jerusalemu ghigho. Waghipimie na kuhakikisha kukaia ghanoneka putu. Idana minara na mawurigha ghose gheewuya maghacho.

⁹ Mbenge raro reerikika, mirigho yaro ikaachika vipande vipande; mzuri na wandu wa ishima weebarishwa. Chuo cha Sharia ndechiwuefundishwa, na walodi ndewiwadie mafunuo ghangi kufuma kwa BWANA.

¹⁰ Waghosi wa Jerusalemu wasea kidombo kwawo, na kurwa nguro ra magunia kwa wasi. Wai waghoghomesha vongo vawo andonyi.

¹¹ Meso ghapo ghasera kira kwa kulila; roho yapo eko na kuwawa kubaa. Wasi ghwanisirisha ndighi kwa wundu ghwa kutoteshwa kwa wandu wapo. Wanake na awo wiongagha wiadumbuka achienyi ra muzi.

¹² Walilia weke mae kwa wundu ghwa njala na kau; “Mkate na divei ghoko hao?” waghwa achienyi sa wandu wishoghonolo, nawo wafwa mboa mboa mikonunyi kwa weke mae.

¹³ Ee Jerusalemu, mkundwa Jerusalemu, nighora wada? Nikuhoresha wada? Na jingi mndungi ndekorongelo huwu. Wasi ghwako ndeghuwadie mpaka, ghooka sa bahari; isuwirio ndejiko.

¹⁴ Walodi wako weeduakughoria tee; machilo ghawo gheeduakukalia kwa kuleghafunukua kaung'a yako. Wikakubonya kugheshe wei ndekune haja ehea.

¹⁵ Wandu wawuyaida kaavui na muzi waawuyakuzighana kwa lumenyo. Wasughusa vongo vawo na kuseka kunoneka kwa Jerusalemu. Wakotia “Welee, ughu ni ghuja muzi ghoni ghorekoghe ghughokie? Nigho ghoni wurumwengu ghorekukasagha nagho?”

¹⁶ Wamaiza wako wose wakudema sare na kukuzighana kwa lumenyo. Wachunua memu yawo na kuzoma wikighamba, “Dameria kughunona. Wakema, iji nijo ituku derejisuwirieghe, idana dajipata, dajiwona.”

¹⁷ BWANA wabonya sa iji koni oreghorieghe. Waditotesha kuseko wughoma sa iji koni oreghambieghe.

¹⁸ Ee Jerusalemu, mawurigha gheni ghako ndeghimkemie BWANA, mbori rako nderidike kio na dime sa meda; kukudarumishe kwa kulila na wasi.

¹⁹ Wuka sena na sena kio chee kukimlilia BWANA; kumghorie wasi ghwako loli, kukimlomba uwifue wughoma wana wako awo wawuyabwaghwa ni njala achienyi.

²⁰ Zighana ee BWANA kupime: Kwabonyere mndungi huwu jingi? Ni hachi waka wije wana wawo aweni werewilindiagha? Welee, ni hachi wakohani na walodi wibwagho andenyi ya Hekalu yako?

²¹ Wandu wa irika na waghosi weefuya achienyi, wai na wadawana weebwaghwa na chufu ni wamaiza. Kwawibwaghie kuseko na wughoma ituku kujokelo ni machu.

²² Kwakaribishire kiture cha kwapo seji kukaribishagha wandu ndimenyi. Ndekuwadie mndungi ufufunukie ituku kujokelo ni machu. Wabwaghie wana wapo aweni niwilelie kwa lukundo.