KILILO CHA JEREMIA 1 - Biblia Ilagho Jiboie Kwa Wandu Wose

Wasi ghwa muzi ghwa Jerusalemu

¹ Muzi ghwa Jerusalemu ghorechuloghe ni wandu ghwasighwa wada mduu! Muzi ghorenekeloghe ishima ni wurumwengu ghwakaia wada idana sa muka mkiwa! Muzi ghuboie kuchumba yose ghwangirie wuzumbenyi.

² Ghwadalalalila kwa kuwawa ghukidikwa ni mbori. Ndekuwadie mghenyi ungi wake wa kala usigharikie omhoresha. Wangara wake wamfunyire, na wose wawuya wamaiza wake.

³ Wandu wa Juda wadwalo wunyika na kubonywa wazumba; wakaia isanga izima jiseko jawo jeni. Warughailwa ni wamaiza wisedimagha kufufunuka.

⁴ Ndekuwadie mndungi uchagha Hekalunyi kutasa matuku gha ndima; wai wereboragha aho waawuyaja wasi, na wakohani waawuyasirimika. Andu kokwania koosighwa kuduu, na Sioni, eeka na luwawo lubaa.

⁵ Wamaiza wake wawuya wabaa wake; wamaiza wake wawona nicha, BWANA wam'bonya uje wasi kwa wundu ghwa kaung'a rake nyingi. Wana wake wawadwa na kudwalwa wunyika.

⁶ Kuboa kwa Jerusalemu kwamerie kusia; vilongozi varo veeka sa sarigha ridarumishiro ni njala, rasilwa ni ndighi kwa kuwingwa ni wadiwi.

⁷ Wandu wa Jerusalemu wakumbuka kuboa kwa muzi ghwawo kwa kala ngelo wiko matirironyi. Ngelo werewadiloghe ni wamaiza, ndekorekoghe na mndungi owitesia. Wandu wiwisimie wikaseka kwa kughwa kwawo.

⁸ Ishima jawo jeesia, weesighwa duu; wikawuya wemenyeka, wasirimika na kuvisa mawushu ghawo kwa waya. Jerusalemu ookulusha moni kwa kaung'a rake.

⁹ Wuchafu ghwake ghorewonekieghe worinyi, ela nderetalieghe kutua kwake kukaia wada. Kughwa kwake korekoghe koobosha; mndungi usedimagha kumhoresha. Wasimwa ni wamaiza wawo, nawo wamkemia BWANA uwifuye wughoma.

¹⁰ Wamaiza wawisokie mali rawo rose. Werewiwonieghe wikingia Hekalunyi cheni tiki, andu BWANA orewighirieghe wandu wa mbari zima wisengie.

¹¹ Wandu wa Jerusalemu wasirimika wikilola kindo chingi cheja, wabadilisha mali rawo na vindo eri wikaie moyo. Wandu wa muzi walila, “Wona seji dakaia na wasi ee BWANA.”

¹² Muzi ghwaawuyakema, “Nizighanenyi inyo mmbose muidagha! Ndekuwadie mndungi upatire wasi sa ghwapo; wasi ghuredelo ni BWANA ngelo ya machu ghake ghibirie.

¹³ “Oredumieghe modo kufuma koighu, ghukanikora kondenyi. Orenideghieghe shaghala, ikanighusha andonyi; sena ukanilegha na kunisigha na luwawo lusesiagha.

¹⁴ “Wazighanire kaung'a rapo ukarifunga rose chiaimweri; warifungie singonyi kwapo, nani ngawuya mnyonge; BWANA wanifunyire kwa wamaiza wapo, nani seredimieghe kulwa nawo.

¹⁵ “BWANA wawisekie masikari ghapo ghose ghiwadie ndighi; wadumie ijeshi jinone wandu wapo wa irika, wawifashire wandu wapo sa zabibu rakumbwa kidunyi.

¹⁶ “Kwa wundu ugho naawuyalila; ndekuwadie mndungi onihoresha hata onikumba ngolo. M'maiza wanisima; wandu wapo ndewiwadie kindo chingi chasigharika.

¹⁷ “Naghorua mikonu yapo ngilomba wutesia, sipatire ungi onitesia. BWANA waniwangie wamaiza wifumie kula andu; wanibonyere karakara na kilambo chilue.

¹⁸ “BWANA ni mhachi ni ini nimleghie. Nisikirenyi inyo wandu andu kose muko mmbone wasi ghwapo. Wandu wapo wa irika na wai wapo wadwalwa wunyika.

¹⁹ “Nawangie wangara wapo wikalegha kunitesia; wakohani na vilongozi wafue mzinyi achienyi wikilola vindo vewiwika moyo.

²⁰ “Zighana wasi na kuwawa kwapo kwa ngolonyi ee BWANA! Ngolo yapo yawawa kwa wundu ghwa kaung'a rapo. Wandu waawuyabwaghwa achienyi, hata nyumbenyi wori kifwa cheko aeni.

²¹ “Sikira seji nisirimikagha, ndekuwadie mndungi onihoresha. Wamaiza wapo waboilo angu kuniredie wasi. Bonya ijo ituku kujilaghirie jivike, kuwibonye wamaiza wapo witiririke karakara na ini.

²² “Kuwitanye kwa wundu ghwa mawiwi ghawo; wikabe seji kunikabie kwa wundu ghwa kaung'a rapo. Nasirimika kwa wasi, na ngolo yapo yakaia mkongo.”