JOSHUA 8 - Biblia Ilagho Jiboie Kwa Wandu Wose

Kuwadwa na kunonwa kwa muzi ghwa Ai

¹ BWANA ukamzera Joshua, “Kusakeobua hata kusakefwa ngolo, wada masikari ghose, kujoke nawo cha Ai; ola namfunya mzuri wa Ai ungie mikonunyi kwako chiaimweri na wandu wake, muzi ghwake, na isanga jake.

² Kuchaghubonya muzi ghwa Ai na mzuri waro, sa iji koni koreghubonyereghe muzi ghwa Jeriko na mzuri waro. Vilambo viekeri, na mfugho, niro kusighagha kwa wundu ghonyu. Kughulalirie kupate kughuwada ugho muzi kwa chia ya nanyuma.”

³ Niko Joshua ukawuka andwamweri na masikari ghose wipate kughujokia muzi ghwa Ai, ukasaghua mang'oni gha wandu elfu mirongo idadu, ukawiduma nakio.

⁴ Ukawilaghira ukighamba, “Ugho muzi mchaghulaliria nanyuma; ela msekaie kula nagho; mkuwike tayari putu;

⁵ na ini chiaimweri na wandu wose dikwanye, dichaghughendia muzi. Hata ngelo wichagha kulwa nesi seji werebonyereghe imbiri, dichakimbia imbiri kwawo;

⁶ nawo wichazoya kudiwinga hata dimerie kuwibonya wifume mzinyi putu; angu wichakalikia wei daawuyakimbia sa imbiri; nesi dichachuria kukimbia.

⁷ Niko aho mchafuma kivisonyi konyu na kughuwada ugho muzi, angu BWANA Mlungu onyu uchaghungira mikonunyi konyu.

⁸ Mkameria kughuwada muzi, mchaghukora sa iji koni BWANA umlaghirie. Olenyi nameria kumghoria.”

⁹ Joshua ukawiduma, nawo wikaghenda na kukuvisa, wikakaia ghadi na ghadi ya Betheli na Ai cha magharibi ya Ai, ela kio chija Joshua ukalala aghadi ya wandu.

¹⁰ Nakesho yaro, Joshua ukawuka kokio, ukawikwanya wandu wake, ukajoka naimbiri chiaimweri na vilongozi va Israeli cha Ai.

¹¹ Agho masikari orekwanyeghe nawo, wikajokanya na kusoghoda kaavui na muzi, wikabonya kambi cha kaskazinyi ya Ai, na vololo iko ghadi na ghadi yawo na Ai.

¹² Ukawada wandu elfu isanu, ukawivisa ghadi na ghadi ya Betheli na Ai cha magharibi ya ugho muzi.

¹³ Niko aho wikawika agho majeshi tayari, kambi mbaa ikakaia cha kaskazinyi ya muzi, na walindiri wawo wa nanyuma wikakaia cha magharibi ya ugho muzi. Ela Joshua ukalala vololonyi chija kio.

¹⁴ Nao iji mzuri wa Ai wawona wandu wa Joshua, ukafuma na wandu wake wose wa muzi, wikabonya shwa-shwa wikafuma cha shighadi kokio, wikaghenda cha mshoromotonyi kulangaya Araba wipate kulwa na Waisraeli sa iji koni werebonyereghe imbiri, wisemanyagha wei werekoghe wikilalirilwa nanyuma ya muzi.

¹⁵ Joshua na Waisraeli wose wikakubonya seji waasimwa imbiri kwawo, wikakimbia cha kireti.

¹⁶ Niko wandu wose wa muzi wikawangwa chiaimweri wipate kuwinugha; nawo iji werefungieghe ndighi kuwinugha, wikachuria kukaia kula na muzi ghwawo.

¹⁷ Ndekorekoghe na mndungi oresigharikieghe andenyi ya muzi ghwa Ai na ghwa Betheli userefumieghe kuwinugha Waisraeli; wikasigha muzi ghuari na kuwinugha.

¹⁸ Niko BWANA ukamzera Joshua, “Ghorua ifumu jiko mkonunyi kwako cha Ai, kwa kukaia nichakuneka ugho muzi mkonunyi kwako.” Nao Joshua ukaghorua ifumu jerekoghe mkonunyi kwake cha Ai.

¹⁹ Na awo wandu werekuvisireghe wikafuma shwa-shwa andu werekoghe. Nyuma ya Joshua kughorua mkonu ghwake, wikakimbia wikangia mzinyi na kughuwada; wikaghukora ugho muzi shwa wori.

²⁰ Wandu wa Ai wiendazighana na nyuma, wikawona ikungughu ja mosi jikijoka kufuma mzinyi, nawo wikasirilwa ni ndighi reghenda imbiri angu kuwuya nokonyuma, kwa kukaia wandu awo werekoghe wikikimbia cha kireti werewighalukieghe na kuwiwingisa.

²¹ Hata iji Joshua na Waisraeli wose wawona angu awo wandu werekuvisireghe wameria kughuwada muzi, na mosi ghukifukia nokoighu, wikaghaluka nanyuma na kuwibwagha wandu wa Ai.

²² Waisraeli werekoghe andenyi ya muzi wikafuma kulwa wuda. Kwa huwo wandu wa Ai wikakaia ghadi na ghadi ya Waisraeli; wamu wikakaia ii chia na wamu wikakaia ija chia. Waisraeli wikawikaba na kuwibwagha, hata ndeweresighieghe ungi ukirie angu ufufunukie.

²³ Ela wikamdwa mzuri wa Ai uko moyo hata kwa Joshua.

²⁴ Waisraeli wiendameria kuwibwagha wandu wose wa Ai werekoghe wikiwinugha cha kireti, wikawuya cha muzi ghwa Ai, na kubwagha kula mundu kwa lufu.

²⁵ Wandu wose wa Ai, awo werefueghe ituku ijo, werekoghe elfu ikumi na iwi womi na waka.

²⁶ Angu Joshua, kufuma waghorua ifumu jake cha muzi ghwa Ai, nderelekieghe kughorua hata wandu wose wa Ai wikatoteshwa.

²⁷ Ela wikawusa ng'ombe reni na vilambo vizima va ugho muzi sa iji koni Joshua orelaghiriloghe ni BWANA.

²⁸ Niko Joshua ukaghukora muzi ghwa Ai, ukaghubonya kitungasi hata linu.

²⁹ Ukammbanika mzuri wa Ai aighu ya mudi hata luma lwa kenyi. Ngelo ya iruwa kuneng'ena Joshua ukawilaghira wandu, nawo wikaghusera mumbi ghwake, na kughukumba chienyi ya mbenge ya muzi. Wikakumba kitungu cha magho aighu yake, nacho cheko ahoeni hata linu.

Kushoma Sharia aighu ya Mghondi ghwa Ebali

³⁰ Nao Joshua ukamuaghia BWANA uo Mlungu wa Israeli madhabahu aighu ya Mghondi ghwa Ebali;

³¹ sa iji koni Musa mdumiki wa Mlungu orewilaghirieghe wandu wa Israeli, seji iandikilo Sharienyi ya Musa: “Madhabahu ibonyero kwa magho ghisewachilo.” Wikafunya vizongona vekora kwa BWANA na vizongona va mapatano.

³² Ukaandika aighu ya agho magho iyo Sharia ereandikiloghe ni Musa, wandu wa Israeli wikiwona.

³³ Waisraeli wose, wa kiwughenyi na awo wa kuvalwa, na waghosi wawo, na wabaa, na watanyi wawo, wikakaia kimusi zaria iwi, kulangaya Sanduku ya Ilaghano ja BWANA eredukiloghe ni awo wakohani. Luzaria lumu mighongo yawo ikalangaya Mghondi ghwa Gerizimu, na luzaria lumu mighongo yawo ikalangaya Mghondi ghwa Ebali, sa iji koni Musa mdumiki wa Mlungu orewilaghirieghe koimbiri, wikaie huwo ngelo ya kuwusa irasimio.

³⁴ Konyuma, Joshua ukashoma kwa lwaka sharia yose aighu ya irasimio na aighu ya njowe, sa iji koni iandikilo Sharienyi.

³⁵ Kula Sharia ya Musa ereshomeloghe ni Joshua kwa ikwanyiko jose ja Israeli, wikwanye na waka na wana, chiaimweri na wandu wawuyakaia aghadi kwawo kiwughenyi.