JOSHUA 7 - Biblia Ilagho Jiboie Kwa Wandu Wose

Kaung'a ya Akani

¹ Ela wandu wa Israeli wikachikanya agho malaghiro kwa kuwusa ivo vilambo venonwa; angu Akani mwana wa Karmi wawae Zabdi, wa kichuku cha Zera, wa kichuku cha Juda, orewusireghe vilambo vimu venonwa; na BWANA ukajokwa ni machu aighu ya wandu wa Israeli.

² Joshua ukaduma wandu kufuma Jeriko wighende Ai, muzi ghuko cha mashariki ya Betheli kaavui na Beth-aveni ukighamba, “Jokenyi mzighane jija isanga.” Wandu wikaghenda wikajizighana ijo isanga.

³ Wikawuya kwa Joshua wikamzera, “Ndedina haja eghenja wandu wengi aho, ela wandu sa elfu iwi angu idadu wijoke wikabe ugho muzi ghwa Ai; mseghenje ijeshi jose aho, ni wandu watinieri.”

⁴ Niko aho wandu wa Israeli sa elfu idadu wikajoka aho, ela wikawingwa ni wandu wa Ai.

⁵ Wandu wa Ai wikawiwinga kufuma mbengenyi hata Shebarimu, na kuwibwagha wandu mirongo idadu na warandadu a mishoromotonyi. Niko Waisraeli wikafwa ngolo na kuobua.

⁶ Nao Joshua andwamweri na vilongozi va Israeli wikarashua nguwo rawo kwa wasi, wikaghwa kiwushu-wushu imbiri ya Sanduku ya Ilaghano, wikakudunga teri vongonyi kwawo na kuwonyera wasi ghwawo, na kulala aho hata luma lwa kenyi.

⁷ Joshua ukaghamba, “Ai, e BWANA Mlungu, kwaki korewiredagha awa wandu kukawiruwusa Jordani eri kupate kuwifunya mikonunyi kwa Waamori widitoteshe; si baa derekaiagha kimonu cha Jordani!

⁸ Nighora wada ee BWANA ikakaia Waisraeli wawikimbia wamaiza wawo!

⁹ Angu Wakanaani na waisanga wose wichasikira agho malagho; nawo wichadimaria chia rose na kudibwagha isi diwose! Da oho kuchabonya wada kulindia ishima ja ijo irina jako ibaa?”

¹⁰ BWANA ukamzera Joshua, “Wuka! Kwaki kwaghwa kiwushu-wushu huwo?

¹¹ Israeli wabonya kaung'a, waghichikanya malaghiro ghapo nerewilaghirieghe wighiwadie; wawusa vilambo vimu venonwa; wabonyere mikalo na kuviiwa, nawo waviranganya na vilambo vawo.

¹² Kwa wundu ughu, wandu wa Israeli ndewidimagha kuwisima wamaiza wawo; wichakimbia kwa kukaia nawo weni wori wakungira andenyi ya mtalo ghwa vilambo venonwa. Ini sichaakaianya na inyo sena, msaavinona ivo vilambo venonwa viko aghadi konyu.

¹³ Wuka! Elesha awa wandu kuwizere wikueleshe weni kwa wundu ghwa kesho, angu BWANA Mlungu wa Israeli waghora, ‘Veko vilambo venonwa viko aghadi konyu ee Israeli, nenyo ndemchaadima kuwisima wamaiza wenyu, msaainja ivo vilambo venonwa viko aghadi konyu.’

¹⁴ Kwa huwo kuwizere kesho wicharedwa kaavui kichuku kwa kichuku; icho kichuku chichaafunukulwa ni BWANA, chichacha imbiri kiwenimwana; na icho kikichuku chichaafunukulwa, chichacha imbiri nyumba kwa nyumba; na iyo nyumba BWANA uchaaifunukua, wichacha mundu umu umu.

¹⁵ Uo mundu uchaafunukulwa uko na ivo vilambo, uchakorwa chiaimweri na kula kilambo chake, kwa kukaia wajichikanya ilaghano ja BWANA kwa kubonya ilagho ja waya andenyi ya Israeli.”

¹⁶ Niko Joshua ukawuka kokio nakesho yaro, ukareda wandu kaavui kichuku kwa kichuku. Kichuku cha Juda chikawadwa.

¹⁷ Ukareda kichuku cha Juda, na kichuku cha Zera wikawadwa; ukareda weni wa Zera kaavui mundu kwa mundu; na Zabdi ukawadwa.

¹⁸ Ukareda nyumba ya Zabdi, mundu umu umu, na Akani mwana wa Karmi, wawae Zabdi wa kichuku cha Zera; kichuku cha Juda ukawadwa.

¹⁹ Joshua ukamzera, “Mwana wapo, kwa wundu ghwa ishima ja BWANA wa Israeli, nighorie loli; kwabonyere wada? Kusenivise ilagho jingi.”

²⁰ Nao Akani ukatumbulia, “Ni loli nabonyere kaung'a imbiri ya BWANA Mlungu wa Israeli; nabonyere huwu:

²¹ Niendawona nguwo iboie kufuma Babuloni, kilo iwi ra feza, na kipande cha dhahabu cha nusu kilo, ngawadwa ni bea ngavishoa; ola navirikie andoenyi andenyi hemenyi kwapo, na feza reko nandonyi yaro.”

²² Niko Joshua ukaduma wandu wikaghenda hemenyi, wikawona ivo vilambo vivisiro andoenyi andenyi hemenyi kwake, na feza riko nandonyi.

²³ Wikavifunya hemenyi; wikamredia Joshua na Waisraeli wose, wikaviwika andonyi imbiri ya BWANA.

²⁴ Niko Joshua chiaimweri na Waisraeli wose wikammbwada Akani, na iro feza, na nguwo na icho kipande cha dhahabu, chiaimweri na wana wa Akani wa womi na wa waka, ng'ombe rake, weke punda, ng'ondi, hema, na kula kilambo orekoghe nacho; wikavireda hata Vololo ya Akori.

²⁵ Joshua ukaghamba, “Kwaki kwadiredia wasi? BWANA wakuredia wasi idime.” Waisraeli wose wikamlasa na magho wikam'bwagha. Wikawilasa na magho wandu wa nyumbenyi kwake na kuwikora na modo chiaimweri na vilambo vose.

²⁶ Wikakumba kitungu cha magho aighu yawo, nacho cheko aho hata linu. Niko machu gha BWANA ghikahoa. Kwa huwo, andu aho kwawangwa Vololo ya Akori hata linu.