JOSHUA 6 - Biblia Ilagho Jiboie Kwa Wandu Wose

Kughwa kwa Jeriko

¹ Mbenge ra muzi ghwa Jeriko rederughwa cha nandenyi na cha shighadi wori, kwa wundu ghwa kuwiobua wandu wa Israeli. Mndungi nderefumieghe shighadi hata mndungi nderengirieghe andenyi ya muzi anduangi.

² BWANA ukamzera Joshua, “Zighana nakuneka Jeriko mkonunyi kwako, mzuri waro na majeshi gharo ghose.

³ Wandu wose wa wuda wichaghumara ugho muzi indu jimweri kula ituku kwa matuku arandadu.

⁴ Na wakohani mfungade wichadwa tarumbeta mfungade ra mbembe ra bauru imbiri ya Sanduku, na ituku ja mfungade, mchaghumara ugho muzi mando mfungade, wakohani wikikaba tarumbeta.

⁵ Hata iji wakaba iro tarumbeta na ndighi, mkasikira iro chwaka ra tarumbeta woruwu, niko wandu wose wichakema na chwaka mbaa, na wurigha ghwa muzi ghuchaghwa hata andoenyi; niko wandu wichajoka, na kula mundu uchaghenda imbiri kughungiria muzi.”

⁶ Niko Joshua mwana wa Nuni ukawiwanga wakohani ukawizera, “Wadenyi Sanduku ya Ilaghano, na wakohani mfungade wido tarumbeta mfungade ra mbembe ra bauru imbiri ya Sanduku ya BWANA.”

⁷ Ukawizera wandu, “Ghendenyi imbiri mughumare muzi, na wandu widwae maswagha wikirie imbiri ya Sanduku ya BWANA.”

⁸ Na sa iji koni Joshua orewilaghirieghe, wakohani mfungade wikadwa tarumbeta mfungade ra mbembe ra bauru imbiri ya BWANA, wikaghenda imbiri wikirikaba iro tarumbeta na Sanduku ya Ilaghano ja BWANA ikiwinugha na nyuma.

⁹ Wandu widwae maswagha wikakiria imbiri ya wakohani wekaba tarumbeta, na walindiri wa nanyuma wikainugha Sanduku, na tarumbeta rikikabwa ngelo yose.

¹⁰ Ela Joshua ukawilaghira wandu, “Msedoghode, hata msedede, mkaie kima hata ituku nichaamzera mkeme, niko mchaakema.”

¹¹ Ukabonya Sanduku ya Ilaghano ya BWANA imare ghuja muzi indo jimweri, na wandu kuwuya kulala kambinyi.

¹² Joshua ukawuka kokesho kio, na wakohani wikaiduka Sanduku ya BWANA.

¹³ Wakohani mfungade wedwa iro tarumbeta mfungade ra mbembe ra bauru, wikakiria imbiri ya Sanduku ya BWANA, na tarumbeta rikakaia rikikabwa ngelo yose.

¹⁴ Ituku ja kawi wikaghumara ugho muzi indo jimweri, na kuwuya kambinyi. Wikabonya huwo koni kwa matuku arandadu.

¹⁵ Ituku ja mfungade wikawuka kokio na ngama, wikaghumara ugho muzi kwa chia ija cheni mando mfungade. Ni ijo ituku tu wereghumarieghe ugho muzi mando mfungade.

¹⁶ Nao izughe ja mfungade, wakohani wiendakaba tarumbeta, Joshua ukawizera wandu, “Kemenyi! Kwa kukaia BWANA wameria kumneka ughu muzi.

¹⁷ Muzi na icho chose chiko andenyi yaro vichafunywa kwa BWANA vipate kunonwa, ela Rahabu jija ilaya jiekeri chiaimweri na awo wiko nyumbenyi kwake wichasigwa wikaie moyo; angu orewivisireghe waja washeki derewidumieghe.

¹⁸ Ela inyo, mkulindie msewuse vilambo vifunyiro vipate kunonwa. Isechekaia nyuma ya inyo kuvifunya vinono, kuvishoa sena na kuishekeria kambi ya Waisraeli inono, na kuiredia wasi.

¹⁹ Feza yose na dhahabu, na vilambo va shaba na chuma vichakaia wakfu kwa BWANA; vichawikwa andenyi ya mali ra BWANA.”

²⁰ Niko aho tarumbeta rikakabwa; na wandu wiendasikira, wikakema kwa chwaka mbaa, na ugho wurigha ghwa muzi ghukaghwa andoenyi, na awo wandu wikajoka, wikaghungiria ugho muzi, na kughuwada.

²¹ Wikanona vilambo vose va ugho muzi kwa lufu; womi na waka na waghosi, ng'ombe, ng'ondi, na weke punda.

²² Joshua ukawizera waja washeki wawi, “Ghendenyi kwa nyumba ya jija ilaya, mumrede uo muka aha chia imweri na wandu wake wose sa iji moremlaghirieghe.”

²³ Waja washeki wikaghenda na kumreda Rahabu, na ndee, mae, waruna na awo wose werekoghe nyumbenyi kwake, wikawiwika shighadi ya kambi ya Waisraeli.

²⁴ Wikakora ugo muzi kwa modo chia imweri na vose verekoghe andenyi yaro. Ela feza na dhahabu, na vilambo va shaba na va chuma wereviwikieghe andu mali ya BWANA iwikwagha.

²⁵ Ela Joshua ukamkira Rahabu jija ilaya, ukaie moyo chiaimweri na ndee, na kichuku chake chose; nao ukakaia andenyi ya Israeli hata linu, angu orewivisireghe awo washeki weredumiloghe ni Joshua kughuzighana muzi ghwa Jeriko.

²⁶ Ngelo iyo, Joshua ukawighemesha wandu ukighamba, “Kula mundu uchaatima kuagha ughu muzi ghwa Jeriko, ndewado ni njowe ra Mlungu. Uo ose uchaagha msingi ghwaro, uchafuilwa ni mwana wake wa imbiri wa womi; Na uo uchaagha mbenge raro, uchafuilwa ni mwana wake wa womi mtini.”

²⁷ BWANA ukakaia andwamweri na Joshua, na sare yake ikaera andenyi ya isanga jose.