JOSHUA 5 - Biblia Ilagho Jiboie Kwa Wandu Wose

¹ Wazuri wose wa Waamori werekoghe cha magharibi kimonu cha Jordani, na wazuri wose wa Kanaani werekoghe kaavui na Bahari ya Mediterania, wiendasikira seji BWANA ughiomeshere machi gha Jordani kwa wundu ghwa wandu wa Israeli hata wikaruwuka, wikafwa ngolo; hata ndeweresigharikieghe na wuing'oni ghungi andenyi kwawo, kwa kuwiobua wandu wa Israeli.

Kushamishwa aja Gilgali

² Ngelo iyo BWANA ukamzera Joshua, “Bonya ndagha ra magho ghikalie, kuwishamishe sena wandu wa Israeli.”

³ Joshua ukabonya sa iji koni BWANA oremlaghirieghe; ukawishamisha wandu wa Israeli andu kuwangwagha Gibeath-laarolothi.

⁴ Ihi niyo shekeria ya wandu kushamishwa: wandu wose wa womi werefumieghe Misri, awo wose welwa wuda, werefueghe chienyi nyuma ya kufuma Misri.

⁵ Hata ngera wandu wose werefumieghe Misri wereshamishiroghe, ela awo wandu wose werevailoghe chienyi kireti nyuma ya kufuma Misri, ndewereshamishiroghe anduangi.

⁶ Kwa kukaia wandu wa Israeli werekoghe wikidamba kireti kwa miaka mirongo ina; hata mbari yose, awo wandu wa wuda werefumieghe Misri, wikatota; angu ndewerelusikireghe lwaka lwa BWANA, hata ukaghema angu ndewichaajiwona jija isanga BWANA orewilaghirieghe weke ndee kukaia uchadineka; isanga jinorie na ndighi.

⁷ Kwa huwo wana wawo niwo Joshua orewishamishagha, kwa kukaia ndewereshamishiroghe chienyi.

⁸ Nyuma ya wandu wose kushamishwa, wikakaia kambinyi hata wikaboa.

⁹ BWANA ukamzera Joshua, “Idime iji nameria kuinja na mbai agho masholio morebonyerwagha ni Wamisri.” Niko andu aja kukawangwa Gilgali, hata idime.

¹⁰ Ngelo wandu wa Israeli weredungieghe kambi Gilgali, werebonyereghe Pasaka luma lwa kenyi lwa ituku ja ikumi na inya ja ugho mori.

¹¹ Nakesho yaro, niko wijie vindo vilimilo Kanaani, mkate ghuseko na chachu na viro viochelo.

¹² Nyuma ya kuja vindo va mbuwenyi, nakesho yaro ija mana ikasia; na wandu wa Israeli ndewereiwonieghe sena anduangi. Nawo wikakaia wikija vindo va isanga ja Kanaani mwaka ghuja.

Joshua na mundu uko na lufu

¹³ Nao iji Joshua wavika kaavui na Jeriko, ukawona mndumu uko na lufu imbiri kwake. Ukamghendia na kumkotia, “Welee, oho koko luwaru lodu angu luwaru lwa wamaiza wedu?”

¹⁴ Uja mundu ukamtumbulia, “Hata. Ini nacha, ne m'baa wa majeshi gha BWANA.” Nao Joshua ukaghwa kiwushu-wushu na kudunga chongo chake andonyi. Ukatasa ukighamba, “Bwana wapo wakunde ini mdumiki wake nibonye wada?”

¹⁵ Uja m'baa wa majeshi gha BWANA ukamzera, “Funya vadu vako, angu andu kwakaia kimusi ni ndoe ya wueli.” Joshua ukabonya wokoni.